އެއް ވަނައިގައި ނިއު އިން ފުރަތަމަ ބުރު ނިންމާލައިފި

ތިނަދޫގެ މައްޗަށް 2-1 ގެ ނަތީޖާ އަކުން ކާމިޔާބު ހޯދައި، އުރީދޫ ދިވެހި ޕްރިމިއާ ލީގްގެ ޕޮއިންޓް ތާވަލުގެ އެއް ވަނައިގައި އޮވެ، ނިއު ރޭޑިއަންޓުން ފުރަތަމަ ބުރު ނިންމާ ލައިފި އެވެ.

ނިއު، އެއް ވަނައިގައި އޮތީ، 18 ޕޮއިންޓް ހޯދައިގެން ނެވެ. ދެ ވަނައިގައި އޮތީ، އެންމެ ފަހުގެ ޗެމްޕިއަން މާޒިޔާ އެވެ. އެ ޓީމަށް ލިބިފައި ވަނީ 13 ޕޮއިންޓެވެ. ޓީސީއަށް ވެސް ވަނީ އެ އަދަދަށް ޕޮއިންޓް ލިބިފަ އެވެ. ނަމަވެސް މާޒިޔާ އަށް ކުރި ލިބެނީ ލަނޑުގެ ތަފާތުން ނެވެ. މާދަމާ ކުޅޭ މެޗުތަކުން މޮޅުވެގެން މާޒިޔާ އާއި ޓީސީ އަށް ނިއު އާ ދެ ޕޮއިންޓަށް ފަރަގު ކުޑަ ކުރެވޭނެ އެވެ،

މިއަދުގެ މެޗުގެ 14 ވަނަ މިނެޓްގައި ނިއު އިން ވަނީ ލީޑް ނަގާފަ އެވެ. ނިއުގެ އަހްމަދު އަބްދުﷲ (ލިލީ) އަށް، އަލީ ފާސިރު (ސެންޓޭ) ދިން ބޯޅަ، ލިލީ ވަނީ، ޕެނަލަްޓީ އޭރިއާ ދިމާލުން އަރިމަތީގައި ހުރެފައި އެބޯޅަ އޭރިއާ ތެރެއަށް ހުރަސް ކޮށްފަ އެވެ. ލިލީ ދިން ބޯޅަ، ލިބުނީ، ހަމްޒާ މުހައްމަދު (ހަމްޕް) އަށެވެ. ހަމްޕް ގޯލާ އަމާޒު ކޮށް ފޮނުވާލި ބޯޅަ ތިނަދޫގެ ބިދޭސީ ޑިފެންޑަރު ޖޯޖް އިވާން ރޮޑްރިގޭޒް ފައިގައި ޖެހިފައި ބްލޮކް ވެގެން ޕެނަލްޓީ އޭރިއާ ނިކުތް ބޯޅަ، ރުއިޒް ފާޒް އެންހަލް ލުއިޒް (ކަންޑޭލާ) ވަނީ ގޯލްގެ ކަނަށް އަމާޒުކޮށް ބޯޅަ ފޮނުވާލާފަ އެވެ.

މެޗުގައި، ތިނަދޫއިން ނަތީޖާ ހަމަހަމަ ކުރީ، ނިއުގެ ޕެނަލްޓީ އޭރިއާ ބޭރުން އެ ޓީމަށް ލިބުނު ހިލޭ ޖެހުމަކުން، އަހްމަދު ނިޔާޒު (ނިޔާ) ނިއުގެ އޭރިއާ ތެރެއަށް ނަގައިދިނުމުން، ތިނަދޫގެ ޑިފެންޑަރު ޖޯޖް އީވާން ރޮޑްރިގޭޒް ބޮލުން ފޮނުވާލި ބޯޅައިން ނެވެ. އެ ބޯޅަ ގޯލް ތެރެއަށް ވަނީ، ކީޕަރު އިމްރާން މުހައްމަދު ކުޑަކޮށް، ކުރިއަށް ނިކުމެ ހުރުމުން އޭނާ ބޯމަތިން އޮހިގެން ގޮހެވެ.

މިއީ ހަތަރު މެޗަށް ފަހު، ނިއު ކޮޅަށް ވަން ފުރަތަމަ ގޯލެވެ. އެ ޓީމު ކޮޅަށް މީގެ ކުރިން ގޯލް ޖާހާފައި ވަނީ މާޒިޔާއިން ނެވެ. ނިއުގެ ކޯޗް އޮސްކާ ބުރުޒޯން ބުނީ، މިއަދުވެސް، އޭނާ މެޗަށް އައީ ބައިކޮޅަށް ގޯލެއް ނުވަދެ ނިންމާ ލުމުގެ އުންމީދުގައި ކަމަށާއި ނަމަވެސް، ތިނަދޫއިން ގޯލް ޖެހީ ޑިފެންޑަރަށް، ތިނަދޫގެ އީވާން ރޮޑްރިގޭޒް ރަނގަޅަށް މާކު ނުކުރެވި ހުރުމުން ކަމަށެވެ.

ތިނަދޫއިން އެއްވަރު ކުރި ފަހުން، ފުރަތަމަ ހާފު ނިމެންދެން ރަނގަޅަށް ކުޅުނީ އެޓީމުން ނެވެ. އެ ޓީމުގެ ނިޔާ އަށް ވަނީ ގޯލް ޖަހާނެ ރަނގަޅު ފުރުސަތެއް ލިބިފަ އެވެ. ރިޝްވާން ތަނަވަސް ކޮށްދިން ބޯޅަ، ނިޔާ އަށް ލިބުނު އިރު، ގޯލައާ ބޯޅަ އާ ދެމެދު ހުރީ ނިއުގެ ކީޕަރު އިމްރާން އެކަންޏެވެ. ރަނގަޅަށް ކޮންޓްރޯލް ކޮށްލާފައި ފޮނުވާލަން އުޅުނު ބޯޅަ ނިޔާ އަށް ފޮނުވާ ނުލެވިނީ ނިއުގެ ދެ ޑިފެންޑަރުން ހުރަސް އެޅެމުން ނެވެ.

ފުރަތަމަ ހާފަުގެ ފަހު ކޮޅުގައި، އަރިމަތިން ޕެންލްޓީ އޭރިއާގެ ރޮނގުމަތިން، ހަމްޕް ވަނީ ރީތި ބޯޅަ އެއް ގަލާޑޯ އަށް ނަގައި ދީފަ އެވެ. ނަމަވެސް އެ ބޯޅަ ދިޔައީ ގަލާޑޯ ބޮލުން ޖެހޭ ހިސާބަށް ވުރެވެސް މަތިން ނެވެ.

ދެ ވަނަ ހާފު ނިއު އިން ފެށި ބަދަލާކާ އެކު އެވެ. އަބްދުﷲ މިދުހަތު ފަހްމީގެ ބަދަލުގައި، އިބްރާހިމް ފަޒީލް (އޮއްޕޮ) ކުޅެން އެރުވުމުން، ނިއުގެ ހަމަލާތައް ވަރުގަދަ ވެގެން ދިޔަތަން ފެނިގެން ދިޔަ އެވެ. ތިނަދޫއިން ވެސް ފެށީ، ބަދަލަކާ އެކު އެވެ. ރިޝްވާންގެ ބަދަލުގައި އަހްމަދު ރިޒްވާން އިސްމާއީލް (ރިޒޭ) ކުޅެން އެރުވި އެވެ.

ނަމަވެސް، މެޗަށް ފަހު، ތިނަދޫ ޓީމުގެ ކޯޗް ހުއާން މެނައުލް މާޓީނޭޒް ވާހަކަތައް ހުރި ގޮތުން، ރިޒޭ ކުޅެން އެރުވީ އޭނާ ބޭނުން ވެގެން ނޫން ކަން ހާމަ ވެއެވެ. މެޗުގެ ކުރިން، ޕްރީ މެޗް ޕްރެސް ކޮންފަރެންސްގައި މާޓިނޭޒް ބުނެފައި ވަނީ، މިލަންދޫއާ ދެކޮޅަށް ކުޅުނު މެޗުގެ ފަހުން ރިޒްވާން ޕްރެކްޓިހުން ނެފެންނަ ކަމަށާއި ދިމާވީ ކޮންކަމެއް ކަމެއްވެސް ނޭންގޭ ކަމަށެވެ.

"މެނޭޖްމެންޓުން ވަނީ ޕްރެކްޓިހަށް ނާންނަ ކުޅުންތެރިޔަކު މެޗުން ފުރުސަތު ދިނުމަށް އަންގާފަ، އެމީހުން ވިސްނާ ގޮތް ރަނގަޅެއް ނޫން އަހަންނަކީ، ޕްރެކްޓިހަށް ނާންނަ ކުޅުންތެރިންނަށް ފުރުސަތު ދޭ މީހެއް ނޫން،" މިއަދުގެ މެޗަށް ފަހު ވާހަކަ ދައްކަމުން މާޓިނޭޒް ބުންޏެވެ. "އަހަރެންގެ ޓީމަކީ ސްޕަ ހީރޯއިން ތިބި ޓީމެއް ނޫން މިޓީމުގައި މިތިބީ އިންސާނުން އަހަރެންގެ ޓީމުން ފުރުސަތު ދޭނީ ބަރާބަރަށް ޕްރެކްޓިހަށް އައިސް މަސައްކަތް ކުރާ ކުޅުންތެރިންނަށް."

ދެ ވަނަ ހާފުގައި، ނިއުގެ ހަމާލާތައް ވަރުގަދަ ވެގެން ދިޔަތަން ފެނުނެވެ. ދެ ވަނަ ހާފުގައި، ނިއުއިން އުފެއްދި ނުރައްކާތެރި ފުރަތަމަ ބޯޅަ ފޮނުވާލީ ގަލާޑޯ އެވެ. ސެންޓޭ ހިލޭ ޖެހުމަކުން، އޭރިއާ ތެރެއަށް ހުރަސް ކުރި ބޯޅަ ގަލާޑޯ ބޮލުން ފޮނުވާލި ބޯޅަ ދިޔައީ ގޯލް ދަނޑި ކައިރިން ބޭރަށެވެ.

މެޗުގެ 69 ވަނަ މިނެޓްގައި، ގަލާޑޯ ލަނޑު ޖެހީވެސް އެކަހަލަ ފުރުސަތަކުން ނެވެ. ތިނަދޫގެ ހާފުގެ މެދެއްހާ ހިސާބުން ސެންޓޭ ނަގައިދިން ބޯޅަ ގަލާޑޯ ބޮލުން ފޮނުވާލައި ގޯލްގެ ކަނަށް ބޯޅަ ފޮނުވާލި އެވެ.

އޭގެ ފަހުން، ނިއުގެ އަލީ އަޝްފާގް (ދަގަނޑޭ) އަށް ވެސް ސެންޓޭ ރަނގަޅު ބޯޅައެއް ތަނަވަސް ކޮށްދިނެވެ. ސެންޓޭ އަށް ލިބުނު ބޯޅަ ހިފައިގެން އައިސް ހާފުގެ މެދެއްހާ ހިސާބުން، އޭނާ ބޯޅަ ދިނީ އޭނާ އާ އެއް ލައިނެއްގައި ހުރި އަޝްފާގަށެވެ. އަޝްފާގް ބޯޅަ ހިފައިގެން ގޮސް، އޭނާ މަސައްކަތް ކުރީ، ތިނަދޫގެ ކީޕަރު ރުސްލާން ކަޓްވާލުމަށް ފަހު ލަނޑު ޖަހާށެވެ. ނަމަވެސް، ވެއްޓިގެން ފައި ރުސްލާން ވަނީ އެ ބޯޅަ ދިފާއު ކޮށްފަ އެވެ.