އުރީދޫ ދިވެހި ޕްރިމިއާ ލީގްގައި ރޭ ދ. ކުޑަހުވަދޫއާއި ށ. މިލަންދޫ ބައްދަލު ކުރި މެޗުގެ ފުރިހަމަ ވަގުތު ހަމަނުވަނީސް މެޗު ނިންމާލަން ޖެހިއްޖެ އެވެ. ކުޑަހުވަދޫ ޓީމުން ވަނީ މެޗު ފަހު 15 މިނިޓު ކުޅެން ދެކޮޅުހަދާފަ އެވެ. ކުޑަހުވަދޫ ކުޅުންތެރިން ދަނޑު ފޭބިއިރު 0-2 ކުރީގައި އޮތީ މިލަންދޫ އެވެ. ފުރަތަމަ ހާފްގައި އިބްރާހިމް އިޝާން (ސައްޓު) ވަނީ މިލަންދޫއަށް މެޗުގެ ލީޑު ނަގައިދީފަ އެވެ.
ކުޑަހުވަދޫ ޓީމުގެ ކުޅުންތެރިން ދަނޑު ފޭބީ މިލަންދޫ އެ ޓީމުގެ ދެވަނަ ލަނދު ކާމިޔާބު ކުރުމާއެކު އެވެ. މިލަންދޫ ޓީމުން ދެވަނަ ލަނޑު ޖެހުމުގެ ކުރިން ކުޑަހުވަދޫގެ ކްރިސްޓިއަންއަށް މިލަންދޫ ކުޅުންތެރިޔަކު ފައުލް ކޮށްފައި ވެއެވެ. ކުޑަހުވަދޫ ބެންޗާއި ކުޅުންތެރިން ފައުލަކަށް އެޕީލް ކުރި ނަމަވެސް ރެފްރީ ވަނީ ކުޅުން ކުރިއަށް ގެންދިއުމަށް ފުރުސަތު ދީފައެވެ. އަދި އެފުރުސަތުގައި މިލަންދޫއިން ވަނީ ގޯލް ޖަހާފަ އެވެ. މި ގޯލް އެޓީމަށް ކާމިޔާބުކޮށްދިނީ އިބްރާހިމް ޝިޔާމް އެވެ.
މުޅި މެޗުގެ ތެރޭގައިވެސް ކުޑަހުވަދޫގެ ބެންޗާއި ގިނަ ކުޅުންތެރިންތަކެއް އައީ ރެފްރީގެ ނިންމުމަށް ފާޑު ކިޔަމުންނެވެ. އަދި ކުޑަހުވަދޫ ކުޅުންތެރިން ދަނޑުން ފޭބި ވަގުތު ވެސް ކުޑަހުވަދޫ ބެންޗުން އައީ ވަރަށް ބޮޑަށް މައްސަލަ ޖައްސަމުންނެވެ. ރޭގެ މެޗުގައި ރެފްރީކަން ކޮށްފައިވަނީ އިންޑިއާގެ ރެފްރީއެކެވެ.
މެޗު ކޮމިޝަނަރާއި، އެފްއޭއެމްގެ އޮފިޝަލުން ކުޑަހުވަދޫ ޓީމުގެ އޮފިޝަލުންނާއި މެނޭޖާރާ ވާހަކަ ދައްކައިގެން ވެސް އެޓީމު ކުޅެން ދަނޑަށް އަރާފައެއް ނުވެ އެވެ. އަދި ރެފްރީ އަލުން މެޗުގެ ނުނިމި އޮތް ވަގުތުގެ ކުޅުން ކުރިއަށް ގެންދިއުމަށް ދެޓީމުގެ ކުޅުންތެރިން ދަނޑަށް އެރުމަށް އެންގުމުން ކުޅެން އަރާފައިވަނީ ހަމައެކަނި މިލަނދޫގެ ކުޅުންތެރިންނެވެ.
ރެފްރީ އެންގުމުން މެޗު ކުޅެން ކުޑަހުވަދޫ ކުޅުންތެރިން ނޭރުމުން މެޗުން މިލަނދޫ މޮޅުވިކަމަށް ނިންމައި މެޗުވަނީ ނިންމާލާފަ އެވެ. ދިވެހި ރެފްރީންގެ ނިންމުންތަކާ ކްލަބްތަކުން ނުރުހުން ފާޅުކުރާތީ އެފްއޭއެމްއިން ވަނީ ޕްރިމިއާ ލީގުގެ ފަހު ދެބުރުގެ މެޗުތަކަށް އިންޑިއާގެ ރެފްރީން ގެނެސްފަ އެވެ.
މިއީ ޕްރިމިއާ ލީގުގައި ޓީމަކުން މެޗު ކުޅެން ދެކޮޅު ހެދި ދެވަނަ މެޗެވެ. މީގެ ކުރިން މާޒިޔާއާއި ގްރީން ސްޓްރީޓް ކުޅުނު މެޗު ގްރީން ސްޓްރީޓްއިން ވެސް ވަނީ ރެފްރީގެ ނިންމުންތަކާ ހިތްހަމަ ނުޖެހިގެން މެޗުގައި ކުޅެން ދެކޮޅުހަދާފަ އެވެ. އެ މެޗު މާޒިޔާ މޮޅުވިކަމަށް ނިންމައި ގްރީން ވަނީ 25،000 ރުފިޔާއިން ޖޫރިމަނާ ކޮށްފަ އެވެ.
މިއަހަރުގެ ފުޓުބޯޅަ ސީޒަންވެގެން ގޮސްފައިވަނީ ރެފެރީންގެ މައްސަލަ އެންމެ ބޮޑަށް ފެންމަތިވި އެއް އަހަރަށެވެ. މި އަހަރުގެ މާލޭ ލީގާއި ޕްރިމައާ ލީގް ހުރިހާ މެޗެއްގައި ވެސް ދެޓީމުގެ ބެންޗުންވެސް ރެފްރީގެ ނިންމުންތަކަށް ވަރަށް ބޮޑަށް ފާޑު ކިޔާފައި ވެއެވެ. ޕްރިމައާ ލީގުގެވެސް ހުރިހާ މެޗެއްގައިވެސް ރެފްރީންގެ ފަރާތުން ފެނިފައިވަނީ ވަރަށް އާދައިގެ ނިންމުންތަކެކެވެ. ނަމަވެސް ރެފްރީންގެ މައްސަލައިގައި ކުޅުންހުއްޓާލުން އެއީ އެންމެ ރަނގަޅު ހައްލެއްކަމުގައެއި ދެކިގެން މެޗު ނުކުޅެ ތިބުމަކީވެސް ހައްލެއް ނޫނެވެ. އޭގެ ސަބަބުން ކްލަބަށް ލިބޭ ގެއްލުން މާބޮޑެވެ.
އެފްއޭއެމްއިންވަނީ ހިންގުން ހަރުދަނާ ކުރުމުގެ ގޮތުން ރެފްރީޒް ޑިޕާޓްމަންޓުގެ އިސްވެރިއާ އަދި ރެފްރީ އަހުމަދު އަމީޒް މަގާމުން ވަކިކޮށްފަ އެވެ. އަދި ގްރީން ސްޓްރީޓްއާއި މާޒިޔާ ބައްދަލުކުރި މެޗުގެ ރެފްރީ ނިއުޝާދު ވަނީ ސަސްޕެންޑްކޮށްފަ އެވެ