އޭޝިއާގެ 16 އަހަރުން ދަށުގެ މުބާރާތުގެ ކޮލިފައިގައި އިއްޔަ ތަޖަކިސްތާން އަތުން 14-0 ގެ ތަފާތު ބޮޑު ނަތީޖާ އަކުން ރާއްޖެ ބަލި ވުމާއީ، 19 އަހަރުން ދަށުގެ ސާފް ޗެމްޕިއަންޝިޕްގައި، ޒުވާން ޓީމުގެ ދަށް ނަތީޖާ ތަކުގެ ސަބަބުން، ގިނަ ބައެއްގެ ފާޑު ކިޔުން އެފްއޭއެމް އަށް އަމާޒު ވެއްޖެ އެވެ.
ސާފް ޗެމްޕިއަން ޝިޕްގެ 19 އަހަރުން ދަށުގެ މުބާރާތުގައި، ރާއްޖެ ކުޅުނު ތިން މެޗުން ވެސް ބަލިވީ އެންމެ ލަނޑެއް ވެސް ރާއްޖެ އަށް ކާމިޔާބު ނުކުރެވި އެވެ. ފުރަތަމަ މެޗުގައި، ބޫޓާން އަތުން ރާއްޖެ ބަލިވީ 1-0 ން ނެވެ. ދެ ވަނަ މެޗު ބަންގްލަދޭޝް އަތުން 2-0 ން ނެވެ. އިއްޔަ ނޭޕާލާ ދެކޮޅަށް ކުޅުނު މެޗުން ވެސް ބަލިވީ 2-0 ން ނެވެ.
ސޯޅަ އަހަރުން ދަށުގެ، އޭޝިއަން ކަޕް ކޮލިފައިންގެ ފުރަތަމަ މެޗުގައި އޮމާން އަތުން ރާއްޖެ ބަލިވީ، 8-0 ން ނެވެ. އިއްޔަ ތަޖަކިސްތާން އަތުން ރާއްޖެއަށް ވަނީ ކޮލިފައި ވުމުގެ ފުރުސަތު ގެއްލިފަ އެވެ.
ދެ މުބާރާތުގައިވެސް، ރާއްޖޭގެ ޓީމަށް ލަނޑެއް ކާމިޔާބު ނުކުރެވުނެވެ. ޒުވާން ގައުމީ ޓީމުތަކުގެ ނަތީޖާ ތަކުގެ ސަބަބުން، ގިނަ ބައެއްގެ ފާޑު ކިޔުން އޮއްސާލީ ފުޓްބޯޅަ އިދާރާ އެފްއޭއެމް އަށެވެ. އިންތިހާބީ މައްސަލަތަކުން އަރައި ގަނެ، އެފްއޭއެމް ހިންގަމުންދާތާ އެއް އަހަރު ވުމާ ކައިރި ވަނީ އެވެ. ރާއްޖޭގެ ފުޓްބޯޅައިގެ ޕްލޭނެއް ނެތެވެ. އަމާޒާއި މިސްރާބަކީ ކޮބައި ކަމެއް ނޭންގެ އެވެ.
އެފްއޭއެމްގެ ޓޭކްނިކަލް ޑައިރެކްޓަރަކަށް، ވީބީ ސްޕޯޓްސް ކުލަބަށް ކުރިން ކޯޗް ކޮށްދިން، ތުރުކީގެ ކޭން ވަންލީ ހަމަޖެއްސި ދުވަހު، އެފްއޭއެމްގެ ރައިސް، ބައްސާމް އަދީލް ޖަލީލް ވިދަޅުވީ، އެފްއޭއެމްގެ ސްޓްރެޓެޖިކް ޕްލޭން ހަދާނީ، ވަންލީގެ ބެލުމުގެ ދަށުން ކަމަށާއި ސްޓްރެޓެޖިކް ޕްލޭން އެކުލަވާލުމަށް ހަދަން ޖެހޭ އައުޓްލައިން ހެދުމަށް ވަންލީއާ ހަވާލު ކޮށްފައި ވާނެ ކަމަށެވެ.
އެފްއޭއެމުން އެހެން ބުނީ، އޭޕްރީލް މަހު އެވެ. މިހާރު މިއޮއްގެން ސެޕްޓެމްބަރު މަސް ހުސްވަނީ އެވެ. އައުޓް ލައިން ނިމި، ސްޓްރެޓެޖިކް ޕްލޭން މަސައްކަތް ފެށޭނެ ދުވަހެއް އަދިވެސް ނޭންގެ އެވެ. ފޭސްބުކްގައި ޝުއޫރު ފާޅު ކުރި އެކަކު ބުނީ، ފުޓްބޯޅައިގެ މައްސަލަތައް ހައްލެއް ނުލިބި ހުއްޓައި އިތުރު މައްސަލަތައް ފުނި ޖެހެމުންދާ ކަމަށެވެ.
ގިނަ ބައެއްގެ ފާޑު ކިޔުން އެންމެ ބަޮޑަށް ފެނިގެން ދިޔައީ، ބުޓާން އަތުންވެސް ރާއްޖެ ބަލިވުމުން ނެވެ. ބޫޓާނަކީ، ވަސީލަތްތަކާއި، ހުނަރުގެ ގޮތުން ރާއްޖެ އަށް ވުރެ އެތަށް ގޮތަކުން ފަހަތުގައި އޮތް ގައުމެކެވެ.
މިދިޔަ މަހު ނޭޕާލްގައި ބޭއްވި 15 އަހަރުން ދަށުގެ މުބާރާތުގައިވެސް، ރާއްޖެ އަށް ވީ ކަމެއް ނެތެވެ. އަވަސްއާ ވާހަކަ ދެއްކި، ރާއްޖޭގެ ފުޓްބޯޅައިގެ ކަމުވޮށިގެންވާ ބޭފުޅަކު ވިދާލުވީ، ޓީމު ތަކުގެ ދަށް ނަތީޖާ ތަކަށް ފަހު، އިތުރަށް ރަނގަޅު ކުރަން އެފްއޭމްގެ ރިއެކްޝަން މާ ލަސް ކަަމަށެވެ.