އއ. މާޅޮސްގެ މައްޗަށް 3-0 ގެ ނަތީޖާ އަކުން ކާމިޔާބު ހޯދައި، މާޒިޔާއިން އުރީދޫ ދިވެހި ޕްރިމިއާ ލީގްގެ ތާވަލުގެ އެއް ވަނައިގައި އޮތް ނިއު ރޭޑިއަންޓާ ދެ ޕޮއިންޓަށް ފަރަގު ކުޑަ ކޮށްފި އެވެ.
މެޗަށް ނިކުތް އިރު، މާޒިޔާ އާއި ނިއުއާ ދެމެދު ފަސް ޕޮއިންޓްގެ ފަރަގު ހުއްޓެވެ. ނިއު އެއް ވަނައިގައި އޮތީ 18 ޕޮއިންޓާއެކު އެވެ. މެޗުން މޮޅުވުމުން، މާޒިޔާ އަށް 16 ޕޮއިންޓް ވަނީ ލިބިފަ އެވެ. މިރޭ ޓީސީ އާއި ގްރީން ސްޓްރީޓް ކުޅޭ މެޗުން މޮޅުވެ ޓީސީއަށް މާޒިޔާ އާއި ޕޮއިންޓްގެ ގޮތުން ހަމަހަމަ ކުރެވޭނެ އެވެ.
މެޗުގެ ކުރީ ކޮޅު މާޒިޔާއިން، ތިން ހަމަލާއެއް އުފެއްދި ނަމަވެސް، މާޅޮސްގެ ޓީމުން ވަނީ އެ ޓީމަށް އުނދަގޫ ކުރިމަތި ކޮށްފަ އެވެ. ހޫނުގައި ކުޅެން ޖެހުމުގެ ސަބަބުން، މެޗުގެ 30 ވަނަ މިނެޓްގައި ދިން ވޯޓާ ބްރޭކާ ހަމަޔަށް، މާޅޮސްއިން ވަނީ މާޒިޔާއާ ދެކޮޅަށް ރަނގަޅު ކުޅުމެއް ދައްކާފަ އެވެ.
މާޒިޔާއަށް ހަމަޖެހުމެއް ލިބުނީ، ވޯޓާ ބްރޭކަށް ފަހު އެވެ. މާޒިޔާއިން ލީޑް ނެގީވެސް ވޯޓާ ބްރޭކަށް ފަހު އެވެ. ނަމަވެސް އެ ގޯލަކީ މާޅޮސް އަބްދުﷲ އިބްރާހިމް (ކޮރެސްޕޯ) އަތން ބައިކޮޅަށް ވަން ލަނޑކެވެ. މެޗުގައި މާޒިޔާގެ ކެޕްޓަންކަން ކުރި މުހައްމަދު އުމޭރު ނެގި ކޯނަރު ޖެހުނީ އަބްދުﷲ އިބްރާހިމް ގައިގައިގައެވެ. އޭޏާގެ ގައިގައި ޖެހުމުން ބޯޅަ ވަނީ ބައި ގޯލްގެ ތެރެއަށެވެ.
މެޗުގެ 45 ވަނަ މިނެޓްގައި، މާޒިޔާއަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފަ އެވެ. އެޓީމުގެ ޔަޝްފާދު ހަބީބު (މުލަކޭ)، މާލޮސްގެ އޭރިއާ ބޭރުން ފޮނުވާލި ބާރު ބޯޅަ އަމާޒުވީ ގޯލް ދަނޑި އަށެވެ.
ދެ ވަނަ ހާފު ފެށުނު ތަނުންވެސް މުލަކޭ އަށް ވަނީ ފުރުސަތެއް ލިބިގެން ގޮސްފަ އެވެ. މާލޮސްގެ ހާފުގެ މެދެއްހާ ހިސާބުން، އަސްހަދު އަލީ (އަޑޭ) ދިން ބޯޅަ، މުލަކޭ، މާޅޮސްގެ ކީޕަރު އިބްރާހިމް ޒަމީރު ގާތުން ނައްޓާވެސް ލިއެވެ. ނަމަވެސް ބޯޅައިގެ ކޮންޓްރޯލް ގެއްލި އެ ބޯޅަ ދިޔައީ ބޭރަށެވެ.
މާޒިޔާގެ ދެ ވަނަ ލަނޑު ކެރިޗް ކާމިޔާބު ކުރީ، އުމާރު ހުރަސް ކޮށްދިން ރީތި ފުރުސަތަކުން ނެވެ. ހާފުގެ މެދެއްހާ ހިސާބުން، ޕެނަލްޓީ އޭރިއާ ކައިރިން އުމޭރު އަށް ލިބުނު ބޯޅަ ހިފައިގެން އޭރިއާ ތެރެއަށް ވަދެ، އޭނާ ތިރިތިރިން ބޯޅަ ދިނީ ކެރިޗް އަށެވެ. ކެރިޗް ވަނީ އެއްފަހަރުން ޖަހައި ގޯލްގެ ތެރެއަށް ބޯޅަ ފޮނުވާލާފަ އެވެ. ބޯޅަ ގޯލަށް ވަނީ މާޅޮސްގެ ކީޕަރު ޒަމީރުގެ އަތުގައި ޖެހިފަ އެވެ.
މެޗުގެ 66 ވަނަ މިނެޓްގައި، މާޅޮހަށް ލިބުނު ހިލޭ ޖެހުމަކުން ނުރައްކާތެރި ހަމަލާއެއް އުފެއްދި އެވެ. އަލީ ހާފިޒް އޭރިއާ ބޭރުން ފޮނުވާލި ބޯޅަ ދިޔައީ ގޯލައާ ހުރަސްވެ ބޭރަށެވެ. މާޅޮސްގެ ކުޅުންތެރިން އޭރިއާ ތެރޭގައި ތިބި ނަމަވެސް އެ ޓީމުގެ ކުޅުންތެރިޔަކަށް ބޯޅަ ފޮނުވާ ނުލެވުނެވެ.
މެޗުގެ 73 ވަނަ މިނެޓްގައި، މާޒިޔާ އަށް ލިބުނު ހިލޭ ޖެހުމަކުން އުމޭރު ނުރައްކާތެރި ބޯޅައެއް މާޅޮސްގެ ގޯލާ އަމާޒުކޮށް ފޮނުވާލި އެވެ. އޭރިއާ ބޭރުން ލިބުނު ހިލޭ ޖެހުން އުމޭރު މަސައްކަތް ކުރީ، ގޯލްގެ މަތީ ކަނަށް އަމާޒުވާ ގޮތަށް ފޮނުވާލާށެވެ. ނަމަވެސް އެބޯޅަ ދިޔައީ ގޯލްގެ ކަނާ ދިމާލުން ހުރަސް ދަނޑިއަށްވުރެ ކުޑަ ތަން ކޮޅެއް މަތިން ބޭރަށެވެ.
މެޗުގެ 84 ވަނަ މިނެޓްގައި، ބަދަލު ކުޅުންތެރިޔެއްގެ ގޮތުގައި ކުޅެން ނިކުތް އިސްމާއީލް އީސާ ވަނީ، މާޅޮސްގެ އޭރިއާ ތެރެއަށް ރީތި ހުރަހެއް ނަގައިދީފަ އެވެ. ޕެނަލްޓީ އޭރިއާ ތެރޭގައި، ކެރިޗް ހުރި ނަމަވެސް އޭނާ އަށް އެ ބޯޅަ ބޭނުން ނުކުރެވި، މާޅޮސްގެ ކުޅުންތެރިން އެ ބޯޅަ ދިފާއު ކުރީ އެވެ.
މާޒިޔާގެ ތިން ވަނަ ލަނޑު އުމާރު ކާމިޔާބު ކުރީ، މެޗުގެ އިތުރު ވަގުތުގެ ގޮތުގައި ދެއްކި ހަތަރު މިނެޓްގެ ތެރެއިން ތިން ވަނަ މިނެޓްގައި ލިބުނު ހިލޭ ޖެހުމަކުން ނެވެ. މިފަހަރު ހިލޭ ޖެހުން އުމޭރު ފޮނުވާލީ ގޯލްގެ ތިރީ ކަނަށެވެ.