ޕީޕަލްސް ކަޕްގައި ނިއު ރޭޑިއަންޓާއި ސިންގަޕޫރުގެ ލަޔަންސް ބައްދަލުކުރި މެޗުގައި ލަޔަންސްގެ ކުޅުންތެރިއެއްގެ ކަރަށް ފައިން އެރި މައްސަލައިގައި ނިއު ރޭޑިއަންޓްގެ ޑިފެންޑަރު މުހައްމަދު ރަޝީދު (ހޮކޭ) ހަ މެޗަށް ސަސްޕެންޑްކޮށް، 15000ރ އިން ޖޫރިމަނާކުރަން އެފްއޭއެމް އިން ނިންމައިފި އެވެ.
އެފްއޭއެމް އިން މިއަދު ނެރުނު ބަޔާނެއްގައި ބުނެފައިވަނީ އެފްއޭއެމްގެ ޑިސިޕްލިނަރީ ކޮމޭޓީން މި ގޮތަށް ނިންމީ ޖެނުއަރީ މަހުގެ 24 ވަނަ ދުވަހު ޕީޕަލްސް ކަޕްގައި ނިއު އަތުން ލަޔަންސް މޮޅުވި މެޗުގައި ލަޔަންސްގެ ކުޅުންތެރިއެއްގެ ކަރަށް ހޮކޭ ފައިން އެރި މައްސަލައިގައި މެޗު ކޮމިޝަނަރުގެ ރިޕޯޓާއި މެޗުގެ ވީޑީއޯ އަދި ރެފްރީގެ ބަޔާނަށް ބެލުމަށް ފަހު ކަމަށެވެ.
ލަޔަންސް އާއި ނިއު ބައްދަލުކުރި މެޗުގައި ލަޔަންސްގެ ކުޅުންތެރިއެއްގެ ކަރަށް ހޮކޭ ފައިން އެރުމުން މެޗުގެ ރެފްރީ ވަނީ ހޮކޭ އަށް ދެވަނަ ރީނދޫ ކާޑަކާއެކު ރަތްކާޑު ދައްކައިފަ އެވެ. އެ މައްސަލައިގައި ނިއު އިން ހޮކޭ އަށް މާފަށް އެދުމަށް އެންގުމުން، އޭނާ ވަނީ ފަހުން ލަޔަންސްގެ އެ ކުޅުންތެރިއާ އާއި އެ ޓީމު އަދި ނިއުގެ ސަޕޯޓަރުންގެ ކިބައިން މާފަށް އެދިފަ އެވެ.