ދިވެހި ޕްރިމިއާ ލީގުގައި ވާދަކުރާ ގދ. ތިނަދޫ އޮތީ ތިނަދޫގެ ނަމުގައި ކަމަށާއި އެޓީމުގައި ގިނައިން ތިބީ މާލޭ ލީގުގައި ކްލަބް އީގަލްސްއަށް ކުޅުނު ކުޅުންތެރިން ކަމަށާއި އަދި އެޓީމަކީ ވަރަށް ވަރުގަދަ ޓީމެއް ކަމަށް ނިއު ރޭޑިއަންޓްގެ އެސިސްޓެންޓް ކޯޗު އަޝްރަފް ލުތުފީ (ސަމްޕަތު) ބުނެފި އެވެ.
ދިވެހި ލީގުގެ އެއްވަނަ މަގާމުގައި އޮތް ނިއުއާއި ފަސްވަނަ މަގާމުގައި އޮތް ތިނަދޫ މާދަމާ ރޭ ބައްދަލުކުރާ މެޗުގެ ކުރިން ބޭއްވި ޕްރެސް ކޮންފަރެންޝްގައި ވާހަކަ ދައްކަމުން އަޝްރަފް ބުނީ ނިއު ރޭޑިއަންޓާއެކު ލީގަށް ވާދަކުރަނީ ޓީސީއިން ކަމަށެވެ. އަދި ނިއުއާއި ޓީސީ ބައްދަލުކުރާ މެޗުގެ ކުރިން ނިއުއިން ތިނަދޫ އަދި ކުޑަހުވަދޫއާ ބައްދަލުކުރާ ދެމެޗު ކާމިޔާބުކުރުން ވަރަށް މުހިންމު ކަމަށް އޭނާ ބުންޏެވެ.
މެޗުގެ ތައްޔާރީތަކާ ބެހޭގޮތުން ސުވާލުކުރުމުން ސަމްޕަތު ބުނީ ނިއުގެ ޑިފެންސް ލައިން އަދި ފޯވާޑް ލައިންވެސް ވަރަށް ރަނގަޅަށް ތައްޔާރުވެފައިވާ ކަމަށެވެ. އަލީ ފާޝިރު (ސެންޓޭ) އަދި އަލީ އަޝްފާގް (ދަގަނޑޭ)ގެ ކޮންބިނޭޝަން ކުޅުން ރަނގަޅު އިރު ސްޕެއިން ފޯވާޑް އެޑްރިއަން ގަލާޑޯ ބާކީވެފައި ހުންނަނީ ކީއްވެގެންތޯ ސުވާލުކުރުމުން އަޝްރަޕް ލުތުފީ ބުނީ ދިވެހި ކުޅުންތެރިން މީގެކުރިންވެސް އެކުގައި ކުޅެފައިވާކަމަށާއި އެހެންވުމުން އެކުޅުންތެރިންނަށް އެއް ކުޅުންތެރިޔަކު އަނެއް ކުޅުންތެރިއެއްގެ ކުޅުން ރަނގަޅަށް އެންގޭކަމަށެވެ.
"އަޝްފާގް، ސެންޓޭ އަދި ހަމްޕުމެންމީ ކުރިންވެސް އެއްކޮށްކުޅެފަތިބި ކުޅުންތެރިން. ހާއްސަކޮށް އަޝްފާގް އާއި އޮއްޕޮ ވަރަށް ގިނަ ދުވަސަތަކެއްވަންދެން އެކުގައި ކުޅެފަވޭ. ދެން ފަހުން ސެންޓޭ އެހެންވީމަ އެމީހުންގެ ކޮންބިނޭޝަން ކުޅުން އަންނާނެ އެކަމަކު އެޑްރިއާން އަކީ ތިބޭފުޅުން މާލޭ ލީގު ބެލިޔަސް ފެންނާނެ އޭނަގެ ވަރަށް ކޮލިޓީ ފިނިޝްތަކެއް. ކޮމްބިނޭޝަން ޕްލޭގަ އޭނަގެ ޕްލޭ އެހާ ރަނގަޅު ނުވިޔަސް. ދެން ޓެކްނިކަލީ ހެޑް ކޯޗު އޮސްކާ ނިންމާނީ ޕްރިމިއާ ލީގަށް އާއިރު އޭނަގެ ޕާފޯމަންސް ދަށްވެފައިނީ އެކަމަކު އޭނަ މިހާރު އެންބުރި އެބަ އާދޭ
މާލޭ ލީގުގައި ނިއުއަށް މުހިންމު ގޯލްތަކެއް ކާމިޔާބުކޮށްދިން އެޑްރިއަން ގަލާޑޯގެ ފަރާތުން ޕްރިމިއާ ލީގުގައި އެންމެ އެދެވޭ ކުޅުމެއް ފެނިގެންގޮސްފައެއް ނުވެއެވެ. ނިއުގެ ކުރިއަށް ކުޅޭ ކުޅުންތެރިންނާއި އެޑްރިއަން އާއި ދެމެދު މެޗުތަކުގެ ތެރޭގައި ގުޅުން ފެންނަނީ ކުޑަކޮށެވެ. ލީގުގައި ނިއު ކުޅުނު ބައެއް މެޗުތަކުގައި އެޓީމުގެ ސަޕޯޓަރުން އެޑްރިއަން ބަދަލުކުރުމަށްވެސް ގޮވައިހަދައެވެ. ފަހަކަށް އައިސް ނިއު ކުޅުނު ބައެއް މެޗުތަކުގައި އެޑްރިއަން ވަނީ ގޯލްޖެހުމަށް ލިބޭ ރަނުގެ ފުރުސަތު ނަގާލާފަ އެވެ.
ކުރީގެ ކޯޗު ޓަވަރޭޒްގެ އިރުޝާދުގެ ދަށުން ސެންޓޭގެ ކުޅުންއެވަރަށް ނުފެނުނީ ކީއްވެތޯ ސުވާލުކުރުމުން ސަމްޕަތު ބުނީ އެއީ މިހާރުގެ ކޯޗު އޮސްކާ ގެންގުޅޭ ސްޓައިލްގެ ގޮތުންނަމަށެވެ.
"ޓަވަރޭޒް އަކީ އޭރިއަލް ފުޓުބޯޅައެއް ކުޅުއްވި ކޯޗެއް އެއީ ބޯޅަ ކުރިއަށް ޖަހައިގެން ކުޅުނީ ޓާގެޓް ޕްލެޔަރުންތަކެއް ބައިތިއްބައިގެން ކުޅުނީ. އޭރު ސެންޓޭއަކީ ޓާގެޓް ޕްލެޔަރެއް ދެން އޭތި އޭރު އެހާ ރަނގަޅަށް ވޯކް އެއް ނުކުރި. ކޮމްބިނޭޝަން ޕްލޭގައި ސެންޓޭ މިފެންނަނީ ވަރަށް ތަފާތުކޮށް އަޝްފާގުމެންނާއެކީ" ސަމްޕަތު ބުންޏެވެ.
"ނިއު ރޭޑިއަންޓު އޯވާ ކޮންފިޑެންޓެއް ނުވާނެ ނިއު ރޭޑިއަންޓުން ހުރިހާ ޓީމަކީވެސް ވަރަށް ވަރުގަދަ ޓީމުތަކެއްގެ ގޮތުގަ ބަލައިގެން ނިކުންނަނީ. ދެން އަޅުގަނޑުމެނަށް މެޗު ފަސޭހަ މިވަނީ ރިޒަލްޓު އެންނަން ފެށީމަ އެހިސާބުން. ގޯލް ޖަހާ ހިސާބުން ފެށިގެން." އިތުރަށް ވާހަކަ ދައްކަމުން ސަމްޕަތު ބުންޏެވެ.
ނިއުއާއި ތިނަދޫ ބައްދަލުކުރާ މެޗު ފަށާނީ މިރޭ 9:00 ގައެވެ.