ގދ. ތިނަދޫގެ މައްޗަށް 3-1 ގެ ނަތީޖާ އަކުން ކާމިޔާބު ހޯދައި، އުރީދޫ ދިވެހި ޕްރިމިއާ ލީގްގެ ތާވަލުގެ އެއް ވަނައިގައި ނިއު ރޭޑިއަންޓުން ފަސް ޕޮއިންޓަށް ލިޑް ފުޅާ ކޮށްފި އެވެ.
ނިއު އެއް ވަނައިގައި އޮތީ 30 ޕޮއިންޓް ހޯދައިގެން ނެވެ. ލީގް ޗެމްޕިއަން ކަން ހޯދުމުގެ ރޭހުގައި ނިއު އާ އެންމެ ގާތުގައި އޮތް ޓީސީ އަށް ލިބިފައި ވަނީ 25 ޕޮއިންޓެވެ. ޓީސީ އަށް މިލަންދޫ އާ ދެކޮޅަށް ކުޅޭ މެޗުން މޮޅުވެ، އަލުން ނިއު އާ ދެ ޕޮއިންޓަށް ފަރަގު ކުޑަ ކުރެވޭނެ އެވެ.
ނިއުގެ ކޯޗް އޮސްކާ ބުރުޒޮން ބުނީ، ޓީސީ އިންވެސް ކުރިއަށް ހުރި މެޗުތައް ގެއްލުވާލާނެ ކަމަށް ވިސްނައިގެން ނުވާނެ ކަމަށެވެ. އަދި ލީގްގެ ޗެމްޕިއަންކަން ކަށަވަރު ވާނީ، ޓީސީ އާ ނިއު ކުޅޭ މެޗުގެ ނަތީޖާއިން ކަމަށެވެ.
ތިނަދޫ މެޗުގައި، ނިއުއިން ލީޑް ނެގީ މެޗުގެ 21 ވަނަ މިނެޓްގަ އެވެ. އެ ޓީމުން ނެގި ކޯނަރެއްގައި ތަނަވަސްވި ބޯޅައިން ލަނޑު ކާމިޔާބު ކުރީ، ސްޕެއިންގެ ރުއިޒް ޕާޒް އެންހަލް ލުއިސް (ކަންޑެލާ) އެވެ. މެޗުގެ މޮޅު ކުޅުންތެރިޔަކަށްވެސް ހޮވުނީ އޭނާ އެވެ.
ލަނޑު ޖެހިތާ ކުޑަ އިރުކޮޅެއް ފަހުން ނިއުގެ އަލީ ފާސިރު (ސެންޓޭ) އަށް ވަނީ ރަނގަޅު ބޯޅަ އެއް ލިބިފަ އެވެ. ތިނަދޫގެ ޕެނަލްޓީ އޭރިއާ ތެރެއިން އޭނާ އަށް ލިބުނު ބޯޅަ، ތިނަދޫގެ ޑިފެންޑަރު އަހްމަދު ނޫމާން (ހެލްމެޓް) ކައިރިން ނައްޓާލަން އުޅެނިކޮށް، ނޫމާން ވަނީ ބޯޅަ ހޯދާފަ އެވެ.
މެޗުގެ 29 ވަނަ މިނެޓްގައި، އަހްމަދު ރިޒްވާން އިސްމާއީލް (ރިޒޭ) ފޮނުވާލި ބޯޅަ، ދިޔައީ ގޯލް ދަނޑި ކައިރިން ބޭރަށެވެ.
އޭގެ ދެ މިނެޓް ފަހުން، ނިއުގެ ޑިފެންޑަރު ލުބުނާންގެ ހުސައިން އަލް ޑޯރް، ތިނަދޫގެ ހާފުގެ މެދެއްހާ ހިސާބުގައި ހުރެފައި ފޮނުވާލި ބާރު ބޯޅަ ތިނަދޫގެ ކީޕަރު ރުސްލާން ދީފާއު ކުރުމުން އެ ބޯޅަ ބޭރުވީ ކޯނަރަކަށެވެ.
މެޗުގެ 33 ވަނަ މިނެޓްގައި، ނިއުގެ ޕެނަލްޓީ އޭރިއާ ތެރެއިން، ހޯސޭ އެލެކްސެންޑާ އަވީލާ (ޗިޗާ) ފޮނުވާލި ބޯޅަ، ނިއުގެ ޑިފެންޑަރު އަހްމަދު އަބްދުﷲ (ލިލީ) ފައިގައި ޖެހިފައި ނިކުތީ ބޭރަށެވެ. އޭގެ ދެމިނެޓް ފަހުން އަލުން ސެންޓޭ ފޮނުވާލި ބޯޅަ ކީޕަރު ރުސްލާން ދިފާއު ކުރީ އެވެ.
ނިއުގެ ދެ ވަނަ ލަނޑު ޖެހީ ތިނަދޫއިން ރަނގަޅަށް ކުޅެކުޅެ ތިއްބަ އެވެ. މެޗުގެ 41 ވަނަ މިނެޓްގައި އަލީ އަޝްފާގް (ދަގަނޑޭ) އޭރިއާ އިރުމަތީ ފަރާތު ކަނާ ދިމާލުން އޭރިއާ ތެރެއަށް ވަދެ، އޭނާ އަށް ލިބުނު ބޯޅަ ފޮނުވާލީ ގޯލްގެ ތިރީ ކަނަށެވެ. އެ ބޯޅަ ދިފާއު ކުރަން ތިނަދޫގެ ކީޕަރު ކުރިމަތިލި ނަމަވެސް އަޝްފާގް އޭނާ އަށް އެއްވެސް ފުރުސަތެއް ނުދެ އެވެ.
ދެ ވަނަ ހާފު ފެށިގެން ހަތަރު ވަނަ މިނެޓް ތެރޭގައި ނިއުގެ ޑިފެންޑަރުންނަށް ހެދުނު މިސްޓޭކެއްގައި، ގޯލް ތެރެއަށް ބޯޅަ ނުވަދެ ސަލާމަތްވީ ކިރިޔާ އެވެ. ތިނަދޫއިން އުފެއްދި ހަމަލާއެއް ހުއްޓުވަން ނިއުގެ ޑިފެންސުން ބޯޅަ ފަހަތައްލީ، ނިއުގެ ކެޕްޓަން އަދި ކީޕަރު އިމްރާން މުހައްމަދަށް ދިނުމަށެވެ. ނަމަވެސް އެބޯޅަ އިމްރާން ނެއްޓިގެން ގޮސް އަމާޒުވީ ގޯލް ދަނޑި އަށެވެ. ބޯޅަ ހޯދަން ތިނަދޫގެ ރިޒޭ މަސައްކަތް ކުރި ނަމަވެސް ދަނޑިގައި ޖެހިފައި ރީބައުންސްވި ބޯޅަ އިމްރާން ވަނީ ސަލާމަތް ކޮށްފަ އެވެ.
މެޗުގެ 56 ވަނަ މިނެޓްގައި، އަޝްފާގަށް އޭރިއާ ތެރެއިން ލިބުނު ބޯޅައަށް ހުރަސް އަޅަން އޭރިއާ ތެރޭގައި ތިނަދޫގެ ޑިފެންޑަރުން ތިބުމުން، އޭނާ ބޯޅަ ދިނީ، އޭރިއާ ބޭރުގައި ހުރި ސެންޓޭ އަށެވެ. އޭނާ ފޮނުވާލި ބޯޅަ ތިނަދޫގެ ކީޕަރު ދިފާއު ކުރީ އެވެ.
ތިނަދޫގެ ފުރަތަމަ ލަނޑު ކާމިޔާބު ކުރީ (ޗިޗާ) އެވެ. އެ ލަނޑު ޖެހުމުގައި ރިޒޭ މަސައްކަތް ވަރަށް ބޮޑަށް ފެނިގެން ދިޔަ އެވެ. ނިއުގެ ހާފުގެ ތެރެއިން އޭނާ އަށް ލިބުނު ބޯޅަ، ހިފައިގެން އަރިމަތިން އޭނާ ދިޔައީ ނިއުގެ ޑިފެންޑަރު ލިލީ ކައިރިންވެސް ނައްޓާލުމަށްފަހު އެވެ. އޭރިއާގެ އަރިމައްޗަށް ގޮސް އޭނާ ގޯލް ކުރިމައްޗަށް ހުރަސް ކޮށްދިން ބޯޅަ އަވީލާ ގޯލްތެރެއަށް ފޮނުވާލީ އެވެ.
ނަތީޖާ 2-1 ށް ބަދަލު ކޮށްލުމަށް ފަހު، ފަރަގު ކުޑަކޮށް ތިނަދޫ އަށް ހިތްހަމަ ޖެހުމެއް ލިބުނު ނަމަވެސް، އޭގެ ހަ މިނެޓް ފަހުން ނިއު އަނެއްކާވެސް ދެ ލަނޑުގެ ލީޑެއް ނެގި އެވެ. މިފަހަރުވެސް އެ ޓީމުން ލަނޑު ޖެހީ ކޯނަރަކުން ތަނަވަސްވި ބޯޅައިން ނެވެ. ލަނޑު ކާމިޔާބުކުރީ އެޑްރިއަން ގަލޯޑޯ އެވެ.