އަންނަ އަހަރުގެ އިންޑޮނޭޝިއާގައި ބާއްވާ އޭއެފްސީ 19 އަހަރުން ދަށުގެ ފުޓުބޯޅަ މުބާރާތުގެ ކޮލިފައިންގައި މިއަދު ގްރޫބް ބީގައި ތަޖަކިސްތާންގެ ހިސޯރުގައި ރާއްޖެ އާއި އަވައްޓެރި ސްރީ ލަންކާ ބައްދަލުކުރި މެޗު 2-2 އެއްވަރުވެއްޖެ އެވެ.
ތިން ޕޮއިންޓާއި ދިމާލަށް ރާއްޖެއިން މިސްރާބު ޖަހައިގެން ތިއްބާ މެޗުގެ 92 ވަނަ މިނެޓްގައި ލަންކާއިން ނަތީޖާ ހަމަހަމަކޮށް ޕޮއިންޓެއް ހޯދި އެވެ. މިލަނޑު ލަންކާއަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ލަންކާއިން ދެވަނަ ހާފްގައި ކުޅެން އެރުވި ނެތެމާ މަލްޝަންއެވެ.
ރަނގަޅު ކުޅުމަކާއެކު މެޗު ފަށައި ރާއްޖެއިން ވަނީ މެޗުގެ 15 ވަނަ މިނިޓުގައި ލީޑު ނަގާފަ އެވެ. މިލަނޑު ރާއްޖެއަށް ކާމިޔާބުކޮށްދިނީ ރިޝްވާން އިސްމާއިލް އެވެ.
މެޗުގެ ކުރީކޮޅު ރާއްޖެއިން ލީޑު ނެގުމާއެކު ލަންކާއިން ޓީމު ކުރިއަށް ޖައްސައިގެން ކުޅެން ފެށި އެވެ. ނަތީޖާއަކަށްވީ ފުރަތަމަ ހާފް ނިމެން މިނިޓަކަށް ވެފައިވަނިކޮށް ލަންކާއިން ލަނޑެއް ޖަހައި އެއްވަރުކުރުމެވެ. މިލަނޑު ލަންކާއަށް ކާމިޔާބުކޮށްދިނީ ރަޒޫނިޔާ މުހައްމަދު ޝަބީރު އެވެ.
މެޗުގެ ނަތީޖާ 1-1 ހަމަހަމަކޮށް އޮވެގެން ހާފް ޓައިމްއަށް ދިޔަ ނަމަވެސް ރާއްޖެއިން ވަނީ ދެވަނަ ހާފް ފެށުނުތާ މާގިނަ އިރުތަކެއް ނުވެ އަލުން ލީޑު ނަގާފައެވެ. މިލަނޑު ރާއްޖެއަށް ކާމިޔާބުކޮށްދިނީ މިޑްފިލްޑަރު މުސަންނިފް މުހައްމަދު އެވެ. ނަމަވެސް ލަންކާއިން ޖެހި ލަސް ގޯލާއެކު ރާއްޖެއަށް ތިން ޕޮއިންޓު ގެއްލިގެން ދިޔައެވެ.
ސާފް ޗެމްޕިއަންޝިޕުގައި ޕޮއިންޓެއް ނުލިބި މުބާރަތް ނިންމާލި ރާއްޖެ ޓީމުގެ ފަރާތުން މިފެނިގެނދިޔައީ ރަނގަޅު ނަތީޖާއެކެވެ. ދެން ރާއްޖެ އެންމެ އަވަހަށް ކުޅޭ މެޗުގައި ނިކުންނާނީ ބުރާސްފަތި ދުވަހު ހަވީރު ރާއްޖެ ގަޑިން 15:00 ގައި ތަޖަކިސްތާންގެ ވެރިރަށް ދުޝަންބޭގައި ބަންގްލަދޭސް އާއި ދެކޮޅަށެވެ.
ރާއްޖެ އާއި ބަންގްލަދޭޝް ސާފް 18 އަހަރުން ދަށުގެ މުބާރާތުގައި މިދިޔަ ސެޕްޓެމްބަރު މަހު ބޫޓާނުގައި ބައްދަލުކުރި މެޗު ރާއްޖެ ބަލިވީ 0-2 ނެވެ.
ކޮލިފިކޭޝަންގައި ރާއްޖެ އާއެކު ގްރޫޕް ބީގައި އޮތީ ލަންކާ، ބަންގްލަދޭޝް، ގްރޫޕް މެޗުތަށް ބާއްވާ ގައުމު ތަޖަކިސްތާން އަދި އޭޝިޔާގެ ގަދަބާރު އުޒްބެކިސްތާނެވެ.