ދިވެހި ޕްރިމިއާ ލީގުގައި ށ. މިލަންދޫއަށް ކުޅެމުން އަންނަ މުހައްދު ނިޒާމް (ޕީކޭ) ޓްރާންސްފާއެއް ނަހަދާ މިލަންދޫއަށް ކުޅެމުން އަންނަ މައްސަލަ ޓީސީއިން އެފްއޭއެމްއަށް ހުށައަޅައިފިއެވެ.
އެފްއޭއެމްގެ ޖެނެރަލް ސެކެޓްރީ ޖަވާޒް ވަނީ މިފަދަ މައްސަލައެއް އެފްއޭއެމްއަށް ހުށައަޅާފައިވާކަން ކަށަވަރުކޮށްދީފައެވެ. "ޓީސީއިން މައްސަލައެއް ހުށައަޅާފަ އޮތީ ޓްރާންސްފާ ނަހަދައި ނިޒާމް ކުޅޭ މައްސަލަ. އެފްއޭއެމްއިން އެމައްސަލަ ބަލަމުން މިދަނީ" ޖަވާ ވިދާޅުވިއެވެ.
މައުލޫމާތު ލިބުނު ގޮތުގައި ޓްރާންސްފާއާ ނުލާ ނިޒާމް މިލަންދޫ ޓީމަށް ކުޅޭ މައްސަލަ ލީގު ފެށުމުން ބައެއް ކްލަބްތަކުގެ ސަމާލުކަމަށް އައިސްފައިވެއެވެ. ނަމަވެސް އެއްވެސް ޓީމަކުން އެއިރު އެފްއޭއެމްއަށް މައްސަލައެއް ހުށައަޅާފައި ނުވެއެވެ.
އެންގިފައިވާ ގޮތުގައި ނިޒާމް މިސީޒަނުގެ ކުރީ ކޮޅު ކްލަބް ވެލެންސިއާއަށް އޭއެފްސީ ކަޕުގައި ކުޅެފައިވެއެވެ. އެހެންކަމަށް ވާނަމަ ނިޒާމް ވެލެންސިއާ ޓީމް ލިސްޓުގައި އޮންނާނެއެވެ. ނިޒާމް ވެލެންސިއާ އާއެކު ކޮންޓްރެކްޓެއް ނެތް ނަމަވެސް އޭނާ އެހެން ޓީމަކަށް ކުޅެން ވެލެންސިއާގެ ރިލީޒް ބޭނުންވާނެއެވެ.
ގަވައިދު ބުނާގޮތުން ޓީމް ލިސްޓުގައި ނުހިމެނޭ ނުވަތަ ޓީމްގައި އެ މެޗުގައި ކުޅުމަށް ފާހަގަނުކުރާ ކުޅުންތެރިޔަކު ކުޅުވައިފިކަން ސާބިތުވެއްޖެނަމަ އެ ކުޅުންތެރިޔަކު ކުޅުނު މެޗުން އެޓީމަށް ލިބިފައިވާ ޕޮއިންޓާއި ގޯލް އުނިކުރެވޭނެއެވެ. އަދި ޑިސިޕްލިނަރީ ކޯޑުގެ ދަށުން، އެ ކްލަބާއި ކުޅުންތެރިޔާ މެދު ފިޔަވަޅު އެޅޭނެއެވެ. އަދި އިދިކޮޅު ޓީމަށް ތިން ޕޮއިންޓާއި، ދެ ގޯލް ލިބިދެވޭނެއެވެ.
މައްސަލަ ސާބިތުވެއްޖެނަމަ ނިޒާމް އަދި މިލަންދޫއަށް އެފްއޭއެމްއިން ފިޔަވަޅު އަޅާނެއެވެ. އަދި ނިޒާމް މިލަންދޫ ޓީމުގައި ހިމެނިގެން ކުޅުނު މެޗުތަކުން އެޓީމު އަތުން ޕޮއިންޓްތަށް ގެއްލިގެންދާނެއެވެ.