އޭއެފްސީ ކަޕްގައި މާދަމާ ހަވީރު މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް އިންޑިއާގެ ބެންގަލޫރު އެފްސީ ނުކުންނައިރު، ގަލޮޅު ދަނޑުގައި ރާއްޖޭގެ ޓީމެއް ބަލިކުރުމަކީ ފަސޭހަކަމެއް ނޫން ކަމަށް ބެންގަލޫރުގެ ކެޕްޓަން ސުނިލް ޗެތުރީ ބުނެފި އެވެ.
މާޒިޔާ އަށް އޭއެފްސީ ކަޕްގެ ދެވަނަ ބުރުގެ އުންމީދު ދެމެހެއްޓޭނީ މާދަމާ ބެންގަލޫރު އަތުން މޮޅުވެގެންނެވެ. ގުރޫޕް އީގެ ދެވަނައިގައި ބެންގަލޫރު އޮތީ ނުވަ ޕޮއިންޓާއެކު އެވެ. މާޒިޔާ އޮތީ ހަތަރު ޕޮއިންޓާއެކު އޮތީ ތިން ވަނައިގަ އެވެ. މާޒިޔާއާ ދެކޮޅަށް މާދަމާ ކުޅޭ މެޗު އެއްވަރުވިޔަސް، ބެންގަލޫރަށް ދެވަނަ ބުރުގެ ޖާގަ ކަށަވަރުވާނެ އެވެ.
އިންޑިއާގެ ގައުމީ ޓީމުގެ ކެޕްޓަންކަން ވެސް ކުރަމުންދާ ޗެތުރީ ވަނީ މީގެ ކުރިން ގަލޮޅު ދަނޑުގައި ކުޅުމުގެ ތަޖުރިބާ ހޯދައިފަ އެވެ. އެއީ 2008 ވަނަ އަހަރު އޮތް ސާފް ޗެމްޕިއަންޝިޕްގައި އަދި 2011 ވަނަަ އަހަރު ދިވެހިރާއްޖޭގެ ގައުމީ ޓީމާއި އިންޑިއާގެ ގައުމީ ޓީމު ބައްދަލުކުރި އެކުވެރިކަމުގެ މެޗުންނެވެ.
އެ ތަޖުރިބާތަކަށް ބިނާކޮށް މިއަދު އޮތް ނޫސްވެރިންގެ ބައްދަލުވުމުގައި ވާހަކަދައްކަމުން ޗެތުރީ ބުނީ ގަލޮޅު ދަނޑުގައި ރާއްޖޭގެ ޓީމެއް ބަލިކުރުމަކީ ފަސޭހަކަމަކަށް ނުވާނެ ކަމަށެވެ.
"ރާއްޖޭގެ ގައުމީ ޓީމާ ދެކޮޅަށް ކުޅުނު (ދެ މެޗުގައި) ވެސް ވަރަށް ގިނަ އަދަދެއްގެ ސަޕޯޓަރުން ދަނޑަށް ވަދެ، ރާއްޖޭގެ ޓީމަށް ވަރަށް ބޮޑު ތަރުހީބެއް ދިން. އެހެންކަމުން އަހަރެން ގަބޫލެއް ނުކުރަން މި ދަނޑުގައި ރާއްޖޭގެ ޓީމެއް ބަލިކުރަން ފަސޭހަވާނެކަމަކަށް. މި މޫސުމަގައި ކުޅުމަކީ ވެސް އުނދަގޫ ކަމެއް. އެކަމަކު އަހަރެމެންނަށް ވީ އެންމެ ރަނގަޅަކަށް މެޗަށް ތައްޔާރުވެ، ރަނގަޅު ނަތީޖާއެއް ނެރުމަށް މަސައްކަތްކުރާނަން،" ޗެތުރީ ބުންޏެވެ.
މާޒިޔާ އާއި ބެންގަލޫރު އިންޑިއާގައި ބައްދަލުކުރި މެޗު 2-1 އިން ކާމިޔާބުކުރީ ބެންގަލޫރެވެ.
ޗެތުރީ ބުނީ މާޒިޔާ އަކީ ވެސް ވަރުގަދަ ޓީމެއް ކަމަށް ގަބޫލްކުރާ ކަމަށާއި ބެންގަލޫރުގެ ޓީމުން ވަރަށް ރަނގަޅަށް ކުޅެގެން ނޫނީ މާދަމާ މާޒިޔާގެ މައްޗަށް ކުރި ނުހޯދޭނެ ކަމަށެވެ.
މިދިޔަ އަހަރު އިންޑިއާ ލީގު ކާމިޔާބުކުރި ބެންގަލޫރުގެ ކޯޗު އޭޝްލީ ވެސްޓްވުޑް ބުނީ މާދަމާގެ މެޗުން ޕޮއިންޓަކާއެކު ބެންގަލޫރާށް ފުއްދާލެވުނު ނަމަވެސް، އެ ޓީމު ބޭނުންވަނީ މެޗުން މޮޅުވެ، ގުރޫޕްގެ އެއްވަނަ ހޯދަން ވާދަކުރަން ކަމަށެވެ.
"ދެވަނަ ބުރުގެ ޖާގައެއް ހޯދަން އަހަރެެމެން ބޭނުންވަނީ ޕޮއިންޓެއް. އެކަމަކު އަހަރެމެންގެ އަމާޒަކީ ގުރޫޕްގެ އެއްވަނަ އަށް ވާދަކުރުން. އެކަން ހާސިލްވާން އޮތީ މާދަމާގެ މެޗުން މޮޅުވެގެން. އަހަރެމެން މަސައްކަތްކުރާނީ ތިން ޕޮއިންޓަށް،" ކުރިން މެންޗެސްޓާ ޔުނައިޓެޑަށް ކުޅުނު ވެސްޓްވުޑް ބުންޏެވެ.
ވެސްޓްވުޑް ބުނީ މާޒިޔާގެ ޓީމުގައި "ސަމާލުވާންޖެހޭ" ކުޅުންތެރިންތަކެއް އެބަތިބި ކަމަށާއި އެ ކުޅުންތެރިންނަށް މާދަމާގެ މެޗުގައި ސަމާލުކަން ދޭނެ ކަަމަށެވެ. އޭގެ ތެރޭގައި މާޒިޔާގެ ކެޕްޓަން އަސަދުﷲ އަބްދުﷲ އާއި ސްޕެއިންގެ ފޯވަޑް ޕަބްލޯ ރޮޑްރިގޭޒް އަދި ހުސެއިން ނިޔާޒް މުހައްމަދު (ބޮކުރީ) ވެސްޓްވުޑް ފާހަގަކުރި އެވެ.