ފުރަތަމަ ބުރުގައި ދ. ކުޑަހުވަދޫ އާއި ށ. މިލަންދޫ ކުޅުނު މެޗުގައި މައްސަލަ ހޫނުވެ މެޗު ކުރިއަށް ނުގެންދެވުނު ނަމަވެސް ދެ ވަނަ ބުރުގައި ކުޅުނު މެޗު 3-0 ގެ ނަތީޖާ އަކުން ކާމިޔާބު ކޮށް ށ. މިލަންދޫއިން ކުޑަހުވަދޫ އާ ދެކޮޅަށް ކުރި ހޯދައިފި އެވެ.
މި ދެ ޓީމު ފުރަތަމަ ބުރުގައި ކުޅުނު މެޗު ވަކި ހިސާބަކުން ހުއްޓާލަން ޖެހުނީ ރެފްރީގެ ނިންމުތަކާ މެދު ހިތްހަމަ ނުޖެހި ކުޑަހުވަދޫގެ ޓީމުން ދަނޑުން ފޭބުމުން ނެވެ. ފަހުން އެފްއޭއެމުން ނިންމީ މެޗުން މިލަންދޫ 2-0 ން މޮޅުވި ކަމަށެވެ. އަދި ކުޑަހުވަދޫގެ ޓީމު 25000 ރުފިޔާއިން ޖޫރިމަނާ ކޮށް ދެން އެފަދަ ކަމެއް ހިނގައިފިނަމަ މުބާރާތުން ވަކި ކުރާނެ ކަމުގެ އިންޒާރު ދިނެވެ.
ކުޑަހުވަދޫ އާއި މިލަންދޫގެ ކުރިމަތިލުން ހާއްސަވާ ސަބަބަކީ، ދެ ޓީމުގެ ކޯޗުންގެ ކުރިމަތި ލުމަކަށް ވުމުންނެވެ. މިލަންދޫގެ ކޯޗް އަދި ކުރީގެ އެއް ވަނަ ޑިފެންޑަރު މުހައްމަދު ނާސިރު ފުޓްބޯޅައިގެ ތެރެއަށް ނެރެދިނީ ކުޑަހުވަދޫ ޓީމުގެ ކޯޗް މުހައްމަދު ޝިޔާޒު (މޯހަން) އެވެ. މޯހަން އަށް ނާސިރު ފާހަގަވީ ޒޯން މުބާރާތުގެ ތެރެއިން ނެވެ.
މެޗުގައި، މިލަންދޫގެ ލަނޑުތައް ކާމިޔާބު ކުރީ އިސްމާއީލް ފަތުހީ، އާދަމް އިމްރާން އިބްރާހިމް ސައީދެވެ. ފުރަތަމަ ލަނޑު ފަތުހީ ކާމިޔާބު ކުރީ މެޗުގެ ހަތް ވަނަ މިނެޓްގައެވެ. ދެ ވަނަ ލަނޑު އިމްރާން ކާމިޔާބު ކުރީ ފުރަތަމަ ހާފު އެންމެ ފަހު މިނެޓްގައެވެ. ތިން ވަނަ ލަނޑު ސައީދު ކާމިޔާބު ކުރީ 60 ވަނަ މިނެޓްގައެވެ.
މި މޮޅާއެކު މިލަންދޫ ވަނީ އަށް ޕޮއިންޓް ހޯދައި، ތާވަލުގެ ހަ ވަނަ އަށް ޖެހިލާފަ އެވެ. އެ ޓީމާ މާޅޮސްއާ ޕޮއިންޓްގެ ގޮތުން ހަމަހަމަ އެވެ. ނަމަވެސް ބައިކޮޅަށް ވަން ގޯލްގެ ތަފާތުން، މިލަންދޫ ކޮޅަށް މަދުން ގޯލް ވަދެފައި ވުމުން މިލަންދޫ އަށް ހަ ވަނަ ލިބެ އެވެ.
ކުޑަހުވަދޫއަށް ލީގްގައި މިހާތަނަށް އެންމެ މޮޅެއް ނުލިބެ އެވެ. ނަމަވެސް އެ ޓީމުން ލީގަށް ނިކުތީ މިނިވަން ޗެމްޕިއަންޝިޕްގައި ކުޅުނު ޓީމަށް މާބޮޑު ބަދަލެއް ނުގެސްއެވެ. އެހެން ހުރިހާ ޓީމެއް ދިވެހި ލީގަށް ވަރުގަދަ އަށް ތައްޔާރުވުމުގެ ގޮތުން ބަދަލުތައް ގެނައި ނަމަވެސް، ކުޑަހުވަދޫއިން ބަދަލެއް ނުގެނެސް ލީގަށް ނިކުތީ ކުރިމަގަށް ރަނގަޅު ޓީމެއް ބިނާ ކުރުމުގެ ގޮތުންނެވެ.