ނެޝަނަލް އިންޓަގްރިޓީ ކޮމިޝަން (އެންއައިސީ)ގެ ރައީސްގެ މުސާރަ މިނިވަން އެހެން މުއައްސަސާތަކުގެ މުސާރައާ އެއް ހަމައަކަށް ގެންނަން ރައްޔިތުންގެ މަޖިލީހުން ފާސްކޮށްފި އެވެ. އެ ބަދަލާއެކު ހުރިހާ މިނިވަން މުއައްސަސާތަކުގެ ރައީސްގެ މުސާރަ އެއްވަރުވާނެ އެވެ.
އެކަން ފާސްކުރީ ރައްޔިތުންގެ މަޖިލީހުން މިރޭ ބޭއްވި ހާއްސަ ޖަލްސާގައި ބައިވެރިވެވަޑައިގެންނެވި 30 މެންބަރުންގެ އިއްތިފާގުންނެވެ.
މިރޭގެ ޖަލްސާގައި ވަނީ އެންއައިސީގެ ރައީސްގެ މުސާރައިގެ ތެރެއަށް ކާރާއި ކާރުގެ ޑްރައިވަރުގެ މުސާރަ ދިނުމަށް އެލަވަންސާއި ޕެޓްރޯލް އެލަވަންސް ދިނުމަށް އިސްލާހެއް ހުށަހަޅާފަ އެވެ. އެގޮތުން ކާރު އެލަވަންސަށް ހަ ހާސް އަދި ޕެޓްރޯލް އެލަވަންސްގެ ގޮތުގައި އެއްހާސް ރުފިޔާ ދޭން ވަނީ ނިންމާފަ އެވެ. އެ އިސްލާހުވެސް މަޖިލީހުން ވަނީ ފާސްކޮށްފަ އެވެ. އެ އިސްލާހު ވެސް ފާސްކޮށްފައިވަނީ މިރޭގެ ޖަލްސާގައި ބައިވެރިވި 30 މެންބަރުންގެ އިއްތިފާގުންނެވެ.
އެހެން މުއައްސަސާތަކުގެ ރައީސުންގެ މުސާރަ އާއި އެންއައިސީގެ ރައީސްގެ މުސާރަ އެއްވަރުކުރީ އެ މަގާމަށް މަދުން މުސާރަ ލިބޭތީ، އެއީ އެންމެ ރަނގަޅު ނޫން ގޮތް ކަމަށް ފެންނާތީ ކަމަށް އެކަން ދިރާސާކުރެއްވި މާލިއްޔަތު ކޮމެޓީގެ މުގައްރިރު އަހުމަދު ނިހާން މިރޭ ވިދާޅުވި އެވެ.
އެންއައިސީގެ ރައީސްގެ މުސާރަ ބޮޑުކުރަން މަޖިލީހުން މިރޭ ފާސްކުރި އިރު އެ މަގާމުގައި ހުރި ޔޫސުފް މާނިއު އެންއައިސީގެ ރައީސްކަމުން އަދި މެންބަރު ކަމުން ވަކިކޮށް، އެ މަގާމަށް ކުރިމަތިލުމުގެ ފުރުސަތު ވަނީ ހުޅުވާލާފަ އެވެ. މާނިއު އެންއައިސީއިން ވަކިކޮށްފައި ވަނީ، ފުލުހުންނާ ގުޅޭ ގޮތުން ބޮޑު ތުހުމަތެއް ކުރެއްވިތާ ދުވަސްކޮޅެއް ފަހުންނެވެ.
އެންއައިސީގެ ރައީސް ކަމަށް މާނިއު އައްޔަން ކޮށްފައިވަނީ އެ ކޮމިޝަންގެ ރައީސް ކަމުގައި ހުންނެވި ފަރުހާދު މުހައްމަދު ވަކިކުރުމަށްފަހު އެވެ. ފަރުހާދު ވެސް ކޮމިޝަނުން ވަކިކުރީ ކުއްލި ގޮތަކަށެވެ. އޭރު މާނިއު ހުންނެވީ ކޮމިޝަނުގެ ނައިބު ރައީސްގެ މަގާމުގަ އެވެ.