އޭއެފްސީ ކަޕްގައި މިއަދު ހަވީރު އިންޑޮނޭޝިއާގެ ޕެރްސިބް ބަންޑުންގް އަތުން އަމިއްލަ ދަނޑުގައި 1-0 އިން ބަލިވެ، ނިއު ރޭޑިއަންޓް މުބާރާތުގެ ގުރޫޕް ސްޓޭޖުން ކަޓައިފި އެވެ.
މި މެޗުގެ ހަމައެކަނި ލަނޑު މެޗުގެ 16 ވަނަ މިނިޓުގައި ޖެހީ ޕެރްސިބްގެ މިޑްފީލްޑަރު ރިދުވާނެވެ. ނިއުގެ ޑިފެންޑަރު މުހައްމަދު ޝިފާން (ކުޑައްޓޭ) ކައިރިން ދެމިގަތުމަށް ފަހު ޕެރްސިބްގެ ފޯވަޑް ޓެންޓޭން ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ ރިދުވާން ގޯލާ ދިމާލަށް ފޮނުވާލުމުން، އެ ބޯޅަ ގޯލަށް ވަނީ ހުރަސް ދަނޑީގައި ޖެހިފަ އެވެ.
ފުރަތަމަ ހާފުގައި ނިއު އަށް މާ ނުރައްކާތެރި ހަމަލާއެއް ނުއުފެއްދުނެވެ. މުހައްމަދު ނިޔާޒް (ނިޔާ) އާއި މުހައްމަދު ރަޝީދު (ހޮކޭ) ފޮނުވާލި ދެ ޝޮޓު ގޯލާ އަމާޒުނުވިއިރު، މިޑްފީލްޑަރު ވިލިއަމް މައްކޯ އާއި ހަމްޒާ މުހައްމަދު (ހަމްޕު) ފޮނުވާލި ދެ ޝޮޓު ޕެރްސިބްގެ ގޯލްކީޕަރު ވަނީ ފަސޭހަމަކާއެކު ދިފާއުކޮށްފަ އެވެ. އައްސަދު އަލީ (އަޑުބަރޭ) ޕެނަލްޓީ އޭރިޔާ ތެރެއަށް ރަނގަޅު ބޯޅައެއް ދިން ނަމަވެސް، އެ ބޯޅަ އަށް އެރި ކުޑައްޓޭ އަށް ބޯޅައިގައި ލައްވާލާ ގޮތެއްނުވި އެވެ.
މެޗުގެ ދެވަނަ ހާފުގައި ވެސް ވިލިއަމް ފޮނުވާލި ރަނގަޅު ދެ ޝޮޓެއް، ޕެރްސިބްގެ ގޯލްކީޕަރު ވަނީ ދިފާއުކޮށްފަ އެވެ.
މެޗު ނިމެން ކައިރިވެފައިވަނިކޮށް، ޕެރްސިބްގެ ސުޕާޑީ އަށް ވަނީ ލީޑު ފުޅާކުރަން ރަނގަޅު ފުރުސަތެއް ލިބިފަ އެވެ. އެކަމަކު ޕެނަލްޓީ އޭރިޔާ ތެރެއިން އޭނާ ފޮނުވާލި ބޯޅަ ދިޔައީ ދަނޑި ކައިރިން ބޭރަށެވެ.
މި މެޗުން މޮޅުވެ، ޕެރްސިބް ވަނީ 11 ޕޮއިންޓާއެކު ގުރޫޕް އެޗް އިން ދެވަނަ ބުރުގެ ޖާގަ ޔަގީންކޮށްފަ އެވެ. މި ގުރޫޕުން ދެން ދެވަނަ ބުރުގެ ޖާގަ ހޯދީ ނުވަ ޕޮއިންޓާއެކު އޮތް މިޔަންމާގެ އަޔެޔަވާދީ ޔުނައިޓެޑެވެ. ނިއު ހަތަރު ޕޮއިންޓާއެކު ތިން ވަނައިގައި އޮތްއިރު، ތާވަލްގެ ފުލުގައި ދެ ޕޮއިންޓާއެކު އޮތީ ލާއޯ އެފްސީ އެވެ.
މެޗަށް ފަހު ނިއުގެ ކޯޗު ހަސަން ހަމީދު (ޑަކޭ) ބުނީ މުޅި މެޗަށް ބަލާއިރު ނިއުގެ ކުޅުންތެރިން ކުރި މަސައްކަތާމެދު ހިތްހަމަޖެހޭ ކަމަށެވެ.
"ނަތީޖާއާމެދު ހިތްހަމަނުޖެހުނަސް، ކުޅުންތެރިން ކުރި މަސައްކަތާމެދު ހިތްހަމަނުޖެހޭ. ލިބުނު ފުރުސަތުތައް ބޭނުންނުކުރެވުމުން މައްސަލައަކީ. ނަސީބު ވެސް ދެރައީ،" ޑަކޭ ބުންޏެވެ.
ޑަކޭ ބުނީ ޑިފެންސްގައި ވެސް މައްސަލަތަކެއް އުޅޭ ކަމަށެވެ. އަދި ނިއު އަށް އިތުރު ފޯވަޑެއް ވެސް ބޭނުންވާ ކަމަށެވެ.
"ޑިފެންސްގައި ވެސް މައްސަލަތަކެއް އެބަހުރި. ދެން އެ ލިބޭ ފުރުސަތުތައް ނިންމާލާނެ ރަނގަޅު ފޯވަޑެއް ވެސް ނެތްތަން އެބަ ދައްކާ. އެކަމަކު މިހާރު އޮތް ޓީމުން ވަރަށް ރަނގަޅަށް މަސައްކަތްކުރޭ. ކުރިއަށް އޮތް މެޗުތައް ރަނގަޅުވާނެ،" ޑަކޭ ބުންޏެވެ.