ކުރިން ވިކްޓަރީ އާއި މާޒިޔާއަށް ކޯޗް ކޮށްދީ ކާމިޔާބު ހޯދައިދިން، ރާއްޖޭގެ އެންމެ މަޝްހޫރު އެއް ކޯޗު އަލީ ސުޒޭން، ކުރިއަށް ސީޒަންގައި ގްރީން ސްޓްރީޓާ ހަވާލުވެއްޖެ އެވެ.
މިދިޔަ ސީޒަން ސުޒޭން ފެށީ، ވިކްޓަރީންނެވެ. ނަމަވެސް މާލޭ ލީގްގެ ގަދަ ހަތަރެއްގެ ތެރެއަށް އެ ޓީމަށް ނުވަދެވުނެވެ. ދިވެހި ލީގް ދެ ވަނަ ބުރުން ފެށިގެން އޭނާ ހަވާލުވީ، ގަދ. ތިނަދޫ ޓީމާ އެވެ. އެ ޓީމާއެކު، ދިވެހި ލީގްގެ ގަދަ ހަތަރެއްގެ ތެރެއަށް ވަދެ، ޕްރެޒިޑެންޓް ކަޕްގައި ވާދަ ކުރި އެވެ.
ސުޒޭންއާ އެކު އީގަލްސްއިން ވެސް ވަނީ ކުރިން ވާހަކަތައް ކުރިއަށް ގެންގޮސްފަ އެވެ. އީގަލްސްގެ ކޯޗަކަށް، ނިއުރޭޑިއަންޓްގެ ކުރީގެ ކޯޗް އަދި މިދިޔަ ސީޒަންގައި ދ. ކުޑަހުވަދޫއަށް އިރުޝާދު ދިން މުހައްމަދު ޝިޔާޒު (މޯހަން) ގެނައުމަށް މަސައްކަތް ކުރަމުންދާ ކަމުގެ މައުލޫމާތު ވަނީ ލިބިފަ އެވެ.
ގްރީންއާ އެކު ސުޒޭން އެއްބަސްވުން ހެދީ ކުރިއަށް އޮތް ސީޒަންގެ ނިޔަލަށެވެ. އެ ކުލަބުގެ ޗެއާމަން އަހްމަދު ޝަޒީން ވިދާޅުވީ، އެއް އަހަރަށް ސޮއި ކުރި ނަމަވެސް ގިނަ ދުވަސްތަކަަށް ސުޒޭން އާއެކު ކުރިއަށް ދިއުމުގެ ވިސްނުން ކުލަބުން ގެންގުޅޭ ކަމަށެވެ.
އޭނާ ވިދާޅުވީ އާ ސީޒަނަށް ޓީމު ވަރުގަދަ ކުރުމުގެ ގޮތުން، ޓީމަށް ގެނައުމަށް ބައެއް ކުޅުންތެރިންނާއެކު ވާހަކަ ދައްކަމުން އަންނަ ކަމަށެވެ.
ގްރީންގެ ކޯޗުކަން، މިދިޔަ ސީޒަންގައި ކުރީ، ގައުމީ ޓީމުގެ ކުރީގެ ޑިފެންޑަރު ސޮބާހް މުހައްމަދު އިބްރާހިމް އެވެ. ނަމަވެސް ދިވެހި ލީގަށް ފަހު، ސޮބާ ވަނީ ގްރީންގެ ކޯޗު ކަމުން ދުރައް ގޮސްފަ އެވެ. އޭނާ ގެންދަން ކުލަބު ވެލެންސިއާއިން ވަނީ ވާހަކަ ދައްކާފަ އެވެ.