ޗެލްސީން ދޫކޮށްލި ޑިއޭގޯ ކޮސްޓާ، އޭނާގެ ކުރީގެ ޓީމު އެތުލެޓިކޯ މެޑްރިޑަށް އެނބުރި އައިސް ބަދަލު ކުޅުންތެރިޔެއްގެ ގޮތުގައި ކުޅެން އަރިތާ ފަސް މިނެޓް ތެރޭ އެތުލެޓިކޯ އަށް ގޯލެއް ހަދިޔާ ކޮށްފި އެވެ.
މިދިޔަ ސީޒަންގެ، އިނގިރޭސި ޕްރިމިއާ ލީގް ޗެލްސީއަށް ހޯދައިދިނުމުގައި މުހިންމު ދައުރެއް އަދާ ކުރި، ކޮސްޓާ ދޫކޮށްލަން އެ ޓީމުން ނިންމީ، ޗެލްސީގެ ކޯޗު އެންޓޯނިއޯ ކޮންޓޭގެ މި ސީޒަންގެ، ޕްލޭންގައި ކޮސްޓާ ނުހިމެނޭ ކަމަށް ބުނެ އެވެ. ކޮސްޓާ ޗެލްސީ އަށް ބަދަލުވީ އެތުލެޓިކޯ މެޑްރިޑްގައި ހުރުމަށްފަހު 2014 ވަނަ އަހަރުގެ ހޫނު މޫސުމުގެ ޓްރާންސްފާގައެވެ. ކޮސްޓާއަކީ، އެތުލެޓިކޯ މެޑްރިޑުން 2014 ވަނަ އަހަރު ސްޕެނިޝް ލީގް ކާމިޔާބު ކުރިއިރު، އެޓީމުގެ މުހިންމު ކުޅުންތެރިޔެކެވެ.
ސްޕެނިޝް ކަޕްގެ ކްއާޓާ ފައިނަލުގެ ފުރަތަމަ ލެގްގައި ލެއިދާ އެސްޕޯޝޫއާ ދެކޮޅަށް 4-0 މޮޅުވި މެޗަށް، އެތުލެޓިކޯގެ ކޯޗް ޑިއޭގޯ ސިމިއޯނޭ، ކޮސްޓާ، ނެރުނީ މެޗުގެ 64 ވަނަ މިނެޓްގައި، އެންހަލް ކޮރެއާގެ ބަދަލުގައެވެ. އޭގެ ފަސް މިނެޓް ފަހުން، ކޮސްޓާ ވަނީ އެތުލެޓިކޯގެ ތިން ވަނަ ލަނޑު ޖަހައިދީފަ އެވެ. އޭގެ ކުރިން ކާމިޔާބު ކުރި، އެތުލެޓިކޯގެ ދެ ލަނޑު ކާމިޔާބު ކުރީ، ޑިއޭގޯ ގޯޑިން އާއި ފެނާންޑޯ ޓޯރޭޒް އެވެ. އެތުލެޓިކޯގެ ހަތަރު ވަނަ ލަނޑު ކާމިޔާބު ކުރީ 92 ވަނަ މިނެޓްގައި، އެންޓޯން ގްރީޒްމަން އެވެ.
މެޗަށް ފަހު ވާހަކަ ދައްކަމުން، ކޮސްޓާ ބުނީ، އެނބުރި އައުމުން އަލުން ފުޓްބޯޅަ ކުޅުންތެރިޔެއް ކަމުގެ އިހްސާސް ކުރެވިއްޖެ ކަމަށެވެ.
"އަހަރެން މިހުރީ ވަރަށް ބޮޑަށް ހިތްހަމަޖެހިފައި، އެތުލެޓިކޯ މެޑްރިޑާއެކު އަލުން އެނބުރި އާދެވުމުން، އަލުން ފުޓްބޮޅަ ކުޅުންތެރިޔެއްކަމުގެ އިހްސާސް ކުރެވިއްޖެ،" ކޮސްޓާ ބުންޏެވެ.