ރާއްޖޭގެ ސްކޫލްތަކަށް މިއަހަރު ތައާރަފްކުރާ ޓެބްލެޓް ގަންނަން އެޑިއުކޭޝަން މިނިސްޓްރީން މެކްސްކޮމް ޓެކްނޮލޮޖީޒްއާ ހަވާލުކޮށްފި އެވެ. އެ ކުންފުންޏާއެކު މިނިސްޓްރީން ސޮއިކުރި އެއްބަސްވުމުގެ ދަށުން 71،000 އެއްހާ ޓެބްލެޓް ގަންނަން ޖެހެއެވެ.
ރާއްޖޭގެ ސްކޫލްތަކުގައި ކިޔަވައިދޭ ހުރިހާ ޓީޗަރުންނާއި ދަރިވަރުންނަށް ބޭނުންވާ ޓެބްލެޓް ގަންނަން މެކްސްކޮމްއަށް ދީފައިވާކަން ކަށަވަރުކޮށްދެއްވައި، އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު މިއަދު ވިދާޅުވީ، އެކަމަށް ފުދޭ ވަރެއްގެ ހަރަދެއް މިނިސްޓްރީން ކޮށްފައިވާކަމަށެވެ. ނަމަވެސް ޓެބްލެޓް ގަންނަން ދިޔަ ހަރަދުކުރި ވަރެއް ހާމައެއްނުކުރައްވަ އެވެ.
ރާއްޖޭގެ ސްކޫލްތައް ޑިޖިޓަލައިޒްކޮށް ހިންގަން އެޑިއުކޭޝަން މިނިސްޓްރީން ފަށާފައިވާ ޓެބްލެޓް މަޝްރޫއު މިއަހަރުގެ ފުރަތަމަ ސެމެސްޓާގެ ފަހުކޮޅު ފަށާނެ އެވެ. އެކަމަށް ބޭނުންވާ ވައިފައި ސްޓްރަކްޗާ ސްކޫލްތަކުގައި ގާއިމްކުރުމަށް އެ މިނިސްޓްރީން ވަނީ ދިރާގާ އެކު މަސައްކަތް ވެސް ފަށާފަ އެވެ.