ކުރީގެ ރައީސް މުހައްމަދު ނަޝީދުގެ ވެރިކަމުގައި ރައްޔިތުންނަށް ބޭސް ގަތުމުގެ ނަމުގައި ވެސް އެތަކެއް މިލިއަން ރުފިޔާއެއް ހިޔާނާތުގެ ގޮތުގައި ހަރަދުކޮށްފައިވާކަން ލިޔެކިޔުންތަކުން މިހާރުވެސް ފެންނަން އެބަހުރި ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެ އެވެ. މިނިސްޓަރު ވަނީ ހިޔާނާތުގެ މައްސަލަތައް ބަލަން ދައުލަތުގެ މުއައްސަސާތަކަށް ގޮވާލައްވާފަ އެވެ.
ނިމުނު 2017 ވަނަ އަހަރު ހެލްތު މިނިސްޓްރީގެ މަގުސަދުތައް ހާސިލް ކުރެވުނު މިންވަރު ހާމަކުރުމަށް މިއަދު އެ މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ނާޒިމް ވިދާޅުވީ ރައީސް ޔާމީން ވެރިކަމަށް ވަޑައިގެންނެވީ ސިއްހީ ދާއިރާގެ ހާލަތު ވީރާނާވެފައި ވަނިކޮށް ކަމަށެވެ. ސިއްހީ ދާއިރާގެ ހާލަތު ރަނގަޅުކުރުމުގެ ނަމުގައި އެތަކެއް މިލިއަން ރުފިޔާއެއް ނަޝީދުގެ ވެރިކަމުގައި ޙިޔާނާތުގެ ގޮތުގައި ހަރަދުކޮށްފައިވާ ކަމަށް މިނިސްޓަރު ތުހުމަތު ކުރެއްވި އެވެ.
"..ބޭސް ގަތުމަށްޓަކައި އަޅުގަނޑުމެންގެ އަތުން ފައިސާ ކްލެއިމްކޮށްފަ އަދިވެސް ބޭސް ނުލިބި އެބަހުރި އެތައް މިލިއަނެއް. މިއަދުވެސް އެބަހުރި އަޅުގަނޑުމެންގެ ރިކޯޑުތަކުން ފެންނަން. މީހަމަ އެމްޑީޕީ ވެރިކަމުގަ ހިންގާފަ ހުރި ކަންތައް. ދައުލަތުގެ ކަމާ ބެހޭ މުއައްސަސާތަކުން، މިކަންކަން ބަލަން ޖެހޭ. މި ދައްކަނީ 10 މިލިއަނެއްގެ ވާހަކައެއް ނޫން. އެތަކެއް މިލިއަނެއްގެ ވާހަކަ،" ނާޒިމް ވިދާޅުވި އެވެ.
އަތޮޅުތެރޭގެ އިމާރާތްތައް ބާވެ ހަލާކުވެފައިވާއިރު އެތަންތަން ހެދުމަށްވެސް އެއްވެސް މަސައްކަތެއް ކޮށްފައި ނެތުމަކީ ދިވެހި ފައިސާއަށް ގަސްދުގައި ވެފައިވާ ހިޔާނާތްތަކެއްގެ ގޮތުގައި މިނިސްޓަރު ސިފަކުރެއްވި އެވެ.
"އަޅުގަނޑުމެން މި ދާއިރާއާ ހަވާލުވީ އިރު ބައެއް ހެލްތު ފެސިލިޓީތަކުން ބުނި އަށް އަހަރު ދުވަސް ވެއްޖެއޭ ބޭނުންކުރާނެ ކޮމްޕިއުޓަރު ނުލިބިގެން އުޅޭތާ. މިޒަމާނުގަ ކޮމްޕިއުޓަރަކީ ބޯފެން މަސައްކަތްކުރާ ތަނެއްގަ. މީ ނޭނގި ދިމާވެފަ ހުރި މައްސަލައެއް ނޫން ދެއްތޮ. މީ އިހުމާލުގެ ގޮތުގައި އަޅުގަނޑު ދެކެނީ،" މިނިސްޓަރު ވިދާޅުވި އެވެ.
ސިއްހީ ހިދުމަތްދޭ ތަންތަނަށް އެތަކެއް ޒަމާނެއް ވަންދެން ބޭނުންޖެހިފައި ހުރި ކޮމްޕިއުޓަރު ސިސްޓަމް ގަތުމަށް އެކަނި ވެސް މިދިޔަ އަހަރު ނުވަ މިލިއަން ރުފިޔާ ހަރަދު ކުރިކަމަށް ނާޒިމް މިއަދު ވިދާޅުވި އެވެ. ސަރުކާރުގެ ހޮސްޕިޓަލް ވެސް ހުރީ ފަގީރު ހާލުގައި ކަމަށް މިނިސްޓަރު ސިފަކުރެއްވި އެވެ.
ރައީސް ޔާމީން ވެރިކަމަށް އައި އިރު ސަރުކާރުން ހިންގާ މައި ހޮސްޕިޓަލުގައި އެމްއާރުއައި މެޝިނެއްހާ ވެސް ނެތް. ޕްރައިވެޓް ހޮސްޕިޓަލަކުން އޭގެ މެޝިނެއް ލައިގެން އުޅުނު އިރު. އެކަމަކު މި ވެރިކަމަށް އައިސް އެ މެޝިނުގެ ހިދުމަތް ވެސް އެދަނީ ކުރިއަށް. މިހާރު ނުވަހާހެއްހާ މީހުންނަށް އެ މެޝިނުގެ ހިދުމަތް ލިބިއްޖެ،" ނާޒިމް ވިދާޅުވި އެވެ.
މީގެ އިތުރުންވެސް ރާއްޖޭގައި ސިއްހީ ހިދުމަތް ފޯރުކޮށްދޭ އެކި ތަންތަނަށް ބޭނުންވާ ގިނަ އަދަދެއްގެ ވެހިކަލާއި މެޝިނަރީޒް ގަތުމަށްވެސް ބޮޑެތި ހަރަދުތަކެއް ކުރައްވާފައިވާކަން ވެސް ނާޒިމް ވަނީ ފާހަގަކުރައްވާފަ އެވެ.