އައްޑޫ ސިޓީގައި ހުންނަ ކޮންވެންޝަން ސެންޓަރުގައި އަޅާ ތާޝިއަރީ ހޮސްޕިޓަލުގެ ކޮންސްޓްރަކްޝަން މަސައްކަތް މި އަހަރުގެ ފުރަތަމަ ކުއާޓަރުގައި ނިމޭނެ ކަމަށް ހެލްތު މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ. އެ ހޮސްޕިޓަލުގެ ކޮންސްޓްރަކްޝަން މަސައްކަތް ހައުސިން މިނިސްޓްރީން ހަވާލުކޮށްފައިވަނީ އެލިއާ އާ އެވެ.
މިއަދު ހެލްތު މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ނާޒިމް ވިދާޅުވީ، އައްޑޫ ސިޓީގެ ހޮސްޕިޓަލަކީ ވަރަށް ބޮޑު އިސްކަމެއް ދީގެން ވަރަށް ގާތުން ބަލަމުންދާ ކަމެއް ކަމަށެވެ. އެގޮތުން އެ ހޮސްޕިޓަލުގެ ކޮންސްޓްރަކްޝަން މަސައްކަތް މިހާރު ކަނޑައަޅާފައި އޮތް ޓައިމްލައިނާ އެއްގޮތަށް ކުރިއަށްދާ ކަމަށެވެ. ފުރަތަމަ ކުއާޓަރުގައި ކޮންސްޓްރަކްޝަން މަސައްކަތް ނިމި އެތަނަށް އެމްއާރްއައި މެޝިނެއް ވެސް އިންސްޓޯލް ކުރާނެ ކަމަށް ނާޒިމް ވިދާޅުވި އެވެ.
"ހޮސްޕިޓަލުގެ މަސައްކަތް ކުރިއަށް ގެންދަން އޮތް ޓައިމްލައިނަށް އެއްވެސް ޑިލޭ އެއް އަންނަ ގޮތަކަށް ނޫން އަދި އޮތީ. އެހެންވީމަ އޭގެ މާނައަކީ މަސައްކަތް ފުރަތަމަ ކުއާޓަރުގައި ނިމި އެތަނަށް އެމްއާރުއައި މެޝިން ގެނެސް މެޝިނަރީޒް ތައް ވެސް މިއަހަރު ގެނަނާނެ ކަން،" ނާޒިމް ވިދާޅުވި އެވެ.
މިނިސްޓަރު ވިދާޅުވީ، އައްޑޫ ހޮސްޕިޓަލަށް ބޭނުންވާ މެޝިނަރީތައް ގަތުމަށް އިއުލާންކޮށް ނިންމަންޖެހޭ އެފަދަ މަސައްކަތްތައް މިހާރު ނިމުމަކަށް އައިސްފައިވާކަމަށެވެ. އަދި އެމްއާރުއައި މެޝިން ގަތުމަށް ބޭނުންވާ ފައިސާވެސް ބަޖެޓް ކޮށް ނިމިފައިވާ ކަމަށެވެ.