ޕާކިސްތާން ސަރުކާރުގެ އެހީއާއެކު މިއަހަރު ރާއްޖޭގައި ގާއިމްކުރާ މެޑިކަލް ކޮލެޖް ހިންގަން އައިޖީއެމްއެޗްގައި އަލަށް އިމާރާތްކުރާ ދަރުމަވަންތަ ހޮސްޕިޓަލުގެ ދެ ފްލޯ ނަގަން ހަމަޖެހިފައިވާކަމަށް ހެލްތު މިނިސްޓްރީން މިއަދު ބުނެފި އެވެ.
ހެލްތު މިނިސްޓްރީގެ މސައްކަތްތައް އާންމުކުރަން މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަބްދުﷲ ނާޒިމް ވިދާޅުވީ މެޑިކަލް ކޮލެޖް މިއަހަރު ހުޅުވާނެ ކަމަށެވެ. އެކަމަށްޓަކައި ދަރުމަވަންތަ ހޮސްޕިޓަލުގެ ފްލޯ ނަގަން ހަމަޖެހި އެކަން ފައިނަލްވެފައިވާ ކަމަށެވެ.
"ދަރުމަވަންތަ ހޮސްޕިޓަލުން މިހާރު ވަނީ ދެ ފްލޯ ނަގަން ހަމަޖެހިފައި. އެތަނުން އެއް ފްލޯގައި ކިޔަވާކުދިންނަށް ބޭނުންވާ ލެބޯޓްރީ ގާއިމްކުރާނެ،" މިނިސްޓަރު ނާޒިމް ވިދާޅުވި އެވެ.
މިނިސްޓަރު ނާޒިމް ވިދާޅުވީ މެޑިކަލް ކޮލެޖްގެ ހިދުމަތްދޭން ފެށުމުން ގިނަ އަދަދެއްގެ ދިވެހި ދަރިވަރުންނަށް ވަރަށް ބޮަޑު ފަސޭހައެއް ލިބިގެންދާނެ ކަމަށެވެ.
އެ ކޮލެޖާއެކު ރާއްޖޭގައި ތިބެގެން އެމްބީބީއެސް އަށް ކިޔެވޭނެ އެވެ. އަދި އެނޫނަސް މެޑިކަލް ސައިންސްގެ ދާއިރާއިން ތަފާތު ކޯސްތައް ރާއްޖެ ތައާރަފްކުރާނެ އެވެ.
މެޑިކަލް ކޮލެޖުގެ މަޝްރޫ ޕާކިސްތާނު ސަރުކާރުން ވަނީ ފަސް މިލިއަން ޑޮލަރުގެ އެހީ ވެސް ދީފަ އެވެ. މެޑިކަލް ކޮލެޖެއް ރާއްޖޭގައި ގާއިމްކުރުމުގެ މަސައްކަތަށް އިސްނެންގެވައި އެކަންކުރިއަށްގެންދިއުމުގައި އިސްކޮށް ހުންނެވީ ކުރީގެ ފޮރިން މިނިސްޓަރު، އަދި މިހާރު ހެލްތުގެ ސްޓޭޓް މިނިސްޓަރު ދުންޔާ މައުމޫނެވެ.