މާވަހަރެއް ކަމަށް ބެލެވޭ ޒާތުގެ އެއްޗެއް މީގެ ހަފުތާއެއްހާ ދުވަސް ކުރިން ނ. މަގޫދޫ "ކަނޑުރޯދި" ނަމަކަށް ކިޔާ ދޯންޏަކުން ހޮވައިގެން މާލެ ގެނެސްފައިވާއިރު އެއީ ސަރުބީ ގަނޑެއް ކަމަށް ބައެއް ފަރާތްތަކުން ބުނަން ފަށާފައިވާ ކަމަށް އެ މާވަހަރު ހޮވި ދޯނިން ބުނެފި އެވެ.
ކަނޑުރޯދި ދޯނިން ހޮވީ 11 ކިލޯގެ ހުދަންބަރެއް ކަމަށް ބެލެވޭ އެއްޗެކެވެ.
މިދިޔަ ހޮނިހިރު ދުވަހު ހއ. ކެލާގެ 60 ހަކަށް މޭލު ބޭރުން އޮޔާ ދަނިކޮށް ފެނުނު އެ މާވަހަރާ ބެހޭގޮތުން ވާހަކަ ދައްކަމުން ދޯނީގެ ވެރިޔާ އަލީ ވަހީދު މިއަދު ބުނީ، ފެނުނީ މާވަހަރެއްތޯ ޔަގީންކުރަން ފްރާންސްގެ ކުންފުންޏަކަށް ފޮޓޯ ފޮނުވާފައިވާ ކަމަށެވެ. ނަމަވެސް އެ ކުންފުނިން އަދި ޖަވާބެއް ނުލިބޭ އިރު މިހާތަނަށް އެ މާވަހަރު ބަލަން އައި "މާވަހަރުގެ ދަންނަ" މީހުން ބުނަނީ އެއީ މާވަހަރެއް ނޫން ކަމަށް ކަމަށް އޭނާ ބުންޏެވެ.
"އެގާރަ ކިލޯ އެބަހުރި އޭގަ. އަޅުގަނޑުމެންނަށް އޭތި ފެނުނީ މިދިޔަ ހޮނިހިރު ދުވަހު 2:30 ހާއިރު މަސްވެރިކަމުގަ ނިކުމެ އުޅެނިކޮށް ކެލާއާ ފަސްދޮޅަހަކަށް މޭލު ބޭރުން. އެހެންވެ ހިފައިގެން މި އައީ މާވަހަރެއްތޯ ޔަގީންކުރަން. މާލެއިން ޓެސްޓު ކުރެވެން މިވަގުތު ނެތީ ޗަމްޕާ އަފީފް ރަށުން ބޭރުގައި އުޅުއްވާތީ. އެކަމަކު މީތި ބަލަން އަންނަ ގިނަ މީހުން ބުނަނީ މީ މާވަހަރެއް ނޫން ކަމަށް. ސަރުބީގަނޑެއްކަމަށް،" އަލީ ވަހީދު ބުންޏެވެ.
މާވަހަރު ހިފައިގެން އައި ކަނޑުރޯދި ދޯނި މިހާރު އޮތީ މާލޭ ފަޅުގަ އެވެ.