އަންނަ މޭ މަހު ރާއްޖޭގެ ހުރިހާ ސްކޫލެއްގައި ޓެބްލެޓް ބޭނުންކުރަން ފަށާއިރު، އެކަން ތަންފީޒުކުރަން ކުރަންޖެހޭ އެކި މަސައްކަތްތަކަށް މިއަހަރު ތެރޭގައި 150 މިލިއަން ރުފިޔާ ހަރަދުވާނެ ކަމަށް އެޑިއުކޭޝަން މިނިސްޓްރީން ބުނެފި އެވެ. ރާއްޖޭގެ ސްކޫލްތައް ޒަމާނީ ކުރުމުގެ މަޝްރޫއުގެ ދަށުން ސްކޫލްތަކަށް ޓެބްލެޓް ތައާރަފްކުރާ މަޝްރޫއަށް މިއަހަރަށް ފިނޭންސް މިނިސްޓްރީން އެކުލަވާލި ބަޖެޓުގައި ހިމަނާފައި ވަނީ 154 މިލިއަން ރުފިޔާ އެވެ.
އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު މިއަދު "އަވަސް" އަށް ވިދާޅުވީ، ޓެބްލެޓް މަޝްރޫއުގެ ހަރަދުތައް ކުރަން ހަމަޖެހިފައިވަނީ ބައި ބަޔަށް ބަހާލައިގެން ކަމަށެވެ. އެގޮތުން ޓެބްލެޓް ގަންނަން "މެކްސް ކޮމްއާ" ހަވާލުކޮށް، ސްކޫލްތަކަށް ބޭނުންވާ ވައިފައި ނިޒާމް ގާއިމްކުރަން ދިރާގާއެކު މިހާރު މަސައްކަތް ފަށާފައިވާއިރު އެ ފަރާތްތަކަށް އެ މަސައްކަތް ހަވާލުކޮށްފައިވަނީ ބައިބަޔަށް ފައިސާ ދައްކާ ގޮތަށް ކަމަށެވެ.
"ހަރަދުތަކަކީ މުޅި އަދަދު އެއް ވަގުތެއްގައި ދައްކާ ކަހަލަ ގޮތަކަށް ކުރާ ހަރަދުތަކެއް ނޫން. މިހާރު ޓެބްލެޓް ގަންނަން ހަވާލުކޮށްފައިވާ ކުންފުންޏަށް ފައިސާ ދައްކަން އެއް އަހަރުގެ މުއްދަތެއް މި އޮތީ. ދިރާގުން ކުރާ އިންވެސްޓްމަންޓަށް ދައްކަންޖެހޭ މުޅި އަދަދު އޮތީ ދެ އަހަރަށް ބަހާލާފަ،" ޝަފީއު ވިދާޅުވި އެވެ.
ދިރާގާއި މެކްސްކޮމް އަށް ދައްކަން ޖެހޭ ފައިސާގެ ޕްރޮކިއުމަންޓް މަސައްކަތްތައް މިހާރު ކުރިއަށްދާ ކަމަށާއި އެ ފަރާތަތްތަކަށް އެޑްވާންސް ޕޭމަންޓްގެ ގޮތުގައި މިނިސްޓްރީން ދައްކާނީ ޖުމްލަ އަގުގެ 15 ޕަސެންޓް ކަމަށް ވެސް ޝަފީއު ވިދާޅުވި އެވެ. އެހެން ނަމަވެސް އެ ފަރާތާ ޕްރޮޖެކްޓް ހަވާލުކުރި ޖުމްލަ އަގު ޝަފީއު ވިދާޅެއް ނުވެ އެވެ.
އޭނާ ވިދާޅުވީ މޭ މަހުގެ ޓެކްސްޓް ފޮތުގެ ބަދަލުގައި ޓެބްލެޓް ބޭނުންކުރަން ފަށާއިރު ޓެބްލެޓަށް ދިމާވާ މައްސަލަތަކާ ދޭތެރޭ އަމަލުކުރާނެ ގޮތުގެ އުސޫލު ވެސް އާންމު ކުރާނެ ކަމަށެވެ. އަދި އެކަންކަން ބެލެނިވެރިންނަށް އޮޅުންފިލުވައިދިނުމުގެ ކަންކަން ވެސް ކުރިއަށްގެންދާނެ ކަމަށް ވިދާޅުވި އެވެ.
"ކުދިން ދެއްތޮ ޓެބްލެޓް ގެންގުޅޭނީ. މައްސަލަތައް ދިމާވާނެކަން އަޅުގަނޑުމެންނަށް ވެސް އެނގޭ. އެކަމުގެ ރައްކާތެރި ފިޔަވަޅެއްގެ ގޮތުން ޓެބްލެޓްގެ އިންޝޫއަރެންސްކޮށް ވޮރެންޓީވެސް އެކްސްޑެންޑް ކުރާނެ. ދެން ޓެބްލެޓް ގެންނަ ކުންފުނިން އެ އޮންނަ ވޮރެންޓީއެއްގެ ދަށުން ރާއްޖޭގެ އެކި ތަންތަނުގައި ސާވިސް ސެންޓާ ތައް ވެސް ގާއިމްކުރާނެ. އޭގެ ތަފްސީލު ޓެބްލެޓް ކުދިންނާ ހަވާލުކުރުމުގެ ކުރިން ހާމަކުރާނަން،" ޝަފީއު ވިދާޅުވި އެވެ.
މިއަހަރުގެ ދިރާސީ އާ އަހަރުގެ ކިޔެވުން މާދަމާ ފަށާއިރު، ސްކޫލްތަކަށް ޓެބްލެޓް ތައާރަފްކުރާނީ އަންނަ މޭ މަހުގެ 7 ވަނަ ދުވަހު އެވެ. ޓެކްސްޓް ފޮތް އުވާލައި ސްކޫލްތަކަށް ޓެބްލެޓް ތައާރަފްކުރުން ވެގެންދާނީ ރާއްޖޭގެ ތައުލީމީ ދާއިރާއަށް މިއަހަރު ގެންނަ އެންމެ ބޮޑު ބަދަލުތަކުގެ ތެރެއިން ބަދަލަކަށެވެ.