ދެ މަހުގެ ދިގު ޗުއްޓީއަކަށްފަހު، 75،000 އަށްވުރެ ގިނަ ދަރިވަރުންނާއެކު ދިރާސީ އާ އަހަރުގެ ކިޔެވުން ރާއްޖޭގެ ހުރިހާ ސްކޫލްތަކެއްގައި މިއަދު ފަށައިފި އެވެ. ރާއްޖޭގެ ހުރިހާ ސްކޫލެއްގެ ކިޔެވުން މިއަދު ފަށާފައިވާއިރު ސްކޫލްތަކުން ކުދިންނަށް ކިޔާފައިވަނީ ހޫނު މަރުހަބާއެކެވެ. ގިނަ ސްކޫލްތައް ވަނީ ކުދިންނަށްޓަކައި ތަހުނިޔާގެ މެސެޖްތަކާއެކު ވަރަށް ބޮޑަށް ޒީނަތްތެރި ވެސްކޮށްފަ އެވެ.
މިއަހަރަކީ ރާއްޖޭގެ ތައުލީމީ ދާއިރާއަށް ބޮޑު އަހަރެކެވެ. ރާއްޖޭގެ ކިޔަވައިދިނުމުގެ ދާއިރާއަށް ޓެކްނޮލޮޖީ ތައާރަފްކޮށް، ކިޔަވައިދިނުމުގެ ވައްޓަފާޅިއަށް ބޮޑު ބަދަލެއް ގެންނަން އެޑިއުކޭޝަން މިނިސްޓްރީން މިއަހަރު ބޮޑު ފިޔަވަޅެއް އަޅާނެ އެވެ. އެހެންކަމުން ދަރިވަރުންގެ އިތުރަށް ކިޔަވައިދިނުމުގެ ދާއިރާއާ ގުޅުންހުރި ހުރިހާ ފަރާތްތަކަށް މިއަހަރު ވެގެންދާނީ ހާއްސަ އަހަރަކަށެވެ.
އެހެން އަހަރުތަކެކޭ އެއްގޮތަށް މި އަހަރުވެސް އާ އަހަރަށް ތައްޔާރުވުމުގެ ގޮތުން ރާއްޖޭގެ އެކި ސްކޫލްތަކަށް އާ ބަދަލުތަކެއް ވަނީ ގެނެސްފަ އެވެ. އެގޮތުން ރާއްޖޭގެ އެންމެ ގިނަ ދުވަސްވީ އެއް ސްކޫލްކަމަށްވާ އަމީނިއްޔާ ސްކޫލަށް އެތައް ދުވަހަކަށް ފަހު ކިޔަވައިދޭން ފަށާނީ އާ އިމާރާތެއްގަ އެވެ. އެ ސްކޫލްގެ ދަރިވަރުން މިއަދު ވަނީ އާ އިމާރާތް މުޅިން އަލަށް ބޭނުންކުރަން ފަށާފަ އެވެ.
މި އަހަރުގެ ފުރަތަމަ ޓާމް ގައި ކިޔަވައިދިނުމަށް ހަމަޖެހިފައިވަނީ 98 ދުވަހުއެވެ. އެއީ ޖެނުއަރީ 14 އިން ޖޫން ހަތަކަށެވެ. އަދި ދެވަނަ ސެމިސްޓާ ގައި ކިޔަވައިދިނުމަށް ހަމަޖެހިފައިވަނީ 105 ދުވަހު އެވެ. ދެވަނަ ސެމިސްޓާގެ ކިޔެވުން 18 ޖޫން ގައި ފަށާއިރު ދެވަނަ ސެމިސްޓާގެ މިޑް ބްރޭކް ލިބޭނީ އޮގަސްޓް 19 އިން 23 އަށެވެ.
ދިރާސީ ކަލަންޑަރުގައިވާ ގޮތުން 2018 ވަނަ އަހަރުގެ ދިރާސީ އަހަރު ނިމޭނީ ނޮވެމްބަރު މަހުގެ 22 ވަނަ ދުވަހު އެވެ.