ރާއްޖޭގެ އިގްތިސޯދީ ސަރަހައްދުން ވަދެ އުޅުނު ސީޝެލްސްގެ މަސްބޯޓެއް އެމްއެންޑީއެފް ކޯސްޓުގާޑުން ހިފަހައްޓައިފި އެވެ.
އެމްއެންޑީއެފުން ބުނީ ސީޝެލްސްގެ މަސްބޯޓު ހިފަހައްޓާފައިވަނީ ލ. ކައްދޫއާ 38 މޭލު ބޭރުން ދަތުރުކުރަމުން ދަނިކޮށް މަސްވެރިންތަކެއް އެމްއެންޑީއެފް އަށް ކުރި ރިޕޯޓަކާއި ގުޅިގެން ކަމަށެވެ. މިއަދު މެންދުރު 11:45 ހާއިރު ބޯޓު ހިފެހެއްޓި އިރު އޭގައި ލަންކާގެ ހަ މީހަކުވެސް ތިބި ކަމަށެވެ.
ސީޝެލްގެ "އެފްވީ ވިކެޑް ޓޫނާ 01" ނަމަކަށް ކިޔާ އެ ބޯޓަކީ ލަންކާއިން ފުރައިގެން ސީޝެލްގެ ޕޯޓް ވިކްޓޯރިއާ ބަނދަރަށް ދަތުރުކުރި ބޯޓެއް ކަމަށް އެމްއެންޑީއެފުން ވަނީ ބުނެފައެވެ. އެ ބޯޓު ކޯސްޓްގާޑުގެ ބެލުމުގެ ދަށުން ލ. ކައްދޫއަށް މިހާރު ދަތުރުކުރަމުންދާ ކަމަށާއި ބޯތު ރާއްޖެ ސަރަހައްދަށް ވަނީ ހުއްދައެއް ނެތި ކަމަށްވެސް އެމްއެންޑީއެފުން ބުންޏެވެ.
ލަންކާގެ މަސްބޯޓެއް އެމްއެންޑީއެފުން މިއަދު ހިފަހައްޓާފައިވާއިރު މިދިއަ ހަފުތާ ތެރޭގައި ރާއްޖޭގެ ކަނޑުގެ ސަރަހައްދުން ސޯމާލިޔާގެ ކަނޑުފޭރޭ ދެ ބޯޓެއްވެސް ސިފައިން ވަނީ އަތުލައިގެންފަ އެވެ.