މިދިޔަ ހުކުރު ދުވަހު އިދިކޮޅު ފަރާތްތަކުން މާލޭގައި ބޭއްވި މުޒާހަރާގައި ފުލަހަކަށް އަނިޔާކުރި މައްސަލައާ ގުޅިގެން މިއަދު ފުލުހުންގެ ބެލުމުގެ ދަށަށް ގެންދިޔަ ކްލަބު އީގަލްސްގެ ޒުވާން ގޯލްކީޕަރު އިބްރާހިމް ލަބާން ޝަރީފުގެ ކޮންޓުރެކްޓް އުވާލަން އެ ކްލަބުން ނިންމައިފި އެވެ.
ރާއްޖޭގެ 19 އަހަރުން ދަށުގެ ގައުމީ ޓީމުގެ ގޯލްކީޕަރު ލަބާން މިއަދު ހަވީރު ފުލުހުން ހައްޔަރުކުރީ ކްލަބް އީގަލްސްގެ ފަރިތަކުރުންތަކުގައި ބައިވެރިވުމަށް ޓާފް ދަނޑަށް ގޮސް ހުއްޓަ އެވެ.
"އަވަސް"އާ ވާހަކަދައްކަމުން އީގަލްސްގެ ޖެނެރަލް ސެކްރެޓަރީ މުފާވިޒް ހާޝިމް (މުފާ) މިރޭ ވިދާޅުވީ ލަބާންގެ ކޮންޓުރެކްޓް އެ ކްލަބުން ނިންމާފައިވާ ކަމަށެވެ.
"ފުލަހަކަށް ހަމާލާ ދިނުން ކަހަލަ ސީރިއަސް ކަމެއް، އަދި އެފަދަ އެއްވެސް ކަމަކީ މި ކްލަބުން ގަބޫލްކުރާނެ ކަމެއް ނޫން. އެހެންވެ ކްލަބުގެ މެނޭޖްމަންޓް އިން ނިންމާފައިވަނީ ލަބާންގެ ކޮންޓުރެކްޓް އުވާލަން،" މުފާ ވިދާޅުވި އެވެ.
މުފާ ވިދާޅުވީ "ސަރުކާރުން ކުޅިވަރަށް ބޮޑެތި އެހީތަކެއް ދޭއިރު" އެ ކްލަބުގެ ކުޅުންތެރިއެއް ފުލަހަކަށް ހަމަލާދިނުމުގައި ބައިވެރިވުމަކީ އެ ކްލަބުން ހިތާމަކުރާ ކަމެއް ކަމަށެވެ. އަދި މައްސަލައަކީ ލަބާންގެ "ސިޔާސީ ފިކުރެއް ނޫން" ކަމަށާއި މައްސަލައަކީ އެ ހަމަލާދިނުމުގައި ބައިވެރިވުން ކަމަށެވެ.
"މައްސަލައަކީ ސިޔާސީ ފިކުރެއް ނޫން. އަދި އެތަނަށް ދިއުމެއް ވެސް ނޫން. މައްސަލައަކީ އެކަހަލަ ދަށު ދަރަޖައިގެ އަމަލެއްގައި މި ކްލަބުގެ ކުޅުންތެރިއެއްގެ ގޮތުގައި ހުރެ ބައިވެރިވުން. މި ކްލަބުން އެކަހަލަ ކަމަކަށް ތާއީދެއް ނުކުރާނެ. ސަރުކާރުން ކުޅިވަރަށް އެހީތެރިވެ، ބޮޑެތި އެހީތަކެއް ދޭއިރު މި ކްލަބުގެ ކުޅުންތެރިއެއް މި ކަހަލަ އަމަލެއްގައި ބައިވެރިވުމަކީ މި ކްލަބުން ހިތާމަކުރާ ކަމެއް،" މުފާ ވިދާޅުވި އެވެ.
އިންޓަ ސްކޫލް ފުޓްބޯޅަ މުބާރާތުން ވިދާލައި، ކްލަބު ވެެލެންސިއާ އަށް ކުރިން ކުޅުނު ލަބާން ،19، ލަބާން ހައްޔަރުކުރިއިރު، އުރީދޫ ދިވެހި ޕްރިމިއާ ލީގުގައި ބުރާސްފަތި ދުވަހު މަހިބަދޫ ސްޕޯޓްސް ކްލަބާ ދެކޮޅަށް އީގަލްސް ނުކުންނަން ޖެހެ އެވެ. އީގަލްސްގެ އެއްވަނަ ގޯލްކީޕަރު މުހައްމަދު ފައިސަލް އަށް އަނިޔާވެ، ކުޅުމާ ދުރުގައި ހުންނަން ޖެހުމުގެ ސަބަބުން ލީގުގައި ފުރަތަމަ މެޗުގައި ވެސް އީގަލްސްގެ ގޯލް ބެލެހެއްޓީ ލަބާން އެވެ.