އިނގިރޭސި ޕްރިމިއާ ލީގުގެ ޓޮޓެންހަމް ހޮޓްސްޕާއާ ދެކޮޅަށް މެލޭޝިއާގެ ލީގުން ހޮވާލެވޭ ޓީމުން މި މަހުގެ ފަހުކޮޅު ކުޅޭ އެކުވެރިކަމުގެ މެޗުގައި މެލޭޝިއާގެ ޓީމަށް ޕީޑީއާރްއެމް އަށް ކުޅެމުންދާ ރާއްޖޭގެ ގައުމީ ޓީމުގެ ކެޕްޓަން އަލީ އަޝްފާގް (ދަގަނޑޭ) ނަގަން ބޭނުންވާ ކަމަށް މެލޭޝިއާގެ ގައުމީ ޓީމުގެ ކޯޗު ޑޯލާ ސަލޭހް ބުނެފި އެވެ.
މެލޭޝިއާ ލީގުން ހޮވާލެވޭ ޓީމުގެ ކޯޗަކަށް ހުންނަ ޑޯލާގެ އެދުމުގެ މަތިން، މެލޭޝިއާގެ ފުޓްބޯލް އެސޯސިއޭޝަން އިން ވަނީ މެލޭޝިއާ ލީގުން ހޮވާލެވޭ ޓީމުގައި ބިދޭސީ ފަސް ކުޅުންތެރިން ހިމެނުމުގެ ފރުސަތު ދީފަ އެވެ. މެލޭޝިއާގެ ޕްރިމިއާ ލީގުގައި މިދިޔަ އަހަރު ޕީޑީއާރްއެމްއާއެކު ދަގަނޑޭ ކުޅުނުއިރު، އެ ޓީމުގެ ކޯޗަކަށް ހުރީ ޑޯލާ އެވެ. ދަގަނޑޭ އަކީ ޑޯލާ ވަރަށް އިތުބާރުކުރާ ކުޅުންތެރިއެކެވެ. މެލޭޝިއާ ޕްރިމިއާ ލީގުގައި މިދިޔަ އަހަރު ދެއްކި މޮޅު ކުޅުމާއެކު، މެލޭޝިއާގައި މިދިޔަ އަހަރު ކުޅުނު އެންމެ މޮޅު ބިދޭސީ ކުޅުންތެރިއާގެ މަގާމު ދަގަނޑޭ އަށް ވަނީ ލިބިފަ އެވެ. މި އަހަރު މެލޭޝިއާގެ ސުޕަ ލީގުގައި ވެސް ދަގަނޑޭ ދަނީ ރަނގަޅު ކުޅުމެއް ދައްކަމުންނެވެ.
ގޯލް ޑޯޓް ކޮމްއާ ވާހަކަދައްކަމުން ޑޯލާ ބުނީ ދަގަނޑޭ އަކީ މިދިޔަ އަހަރު މެލޭޝިއާގެ އެންމެ މޮޅު ބިދޭސީ ކުޅުންތެރިއާ ކަމަށާއި އޭނާ ޓީމަށް ނަގަން ބޭނުންވާ ކަމަށެވެ. އަދި މެލޭޝިއާގެ އެފްއޭގެ ޖެނެރަލް ސެކްރެޓަރީއާ މަޝްވަރާ ކުރުމަށް ފަހު، މިއަދު މެޗަށް ނަގާ ކުޅުންތެރިންގެ ލިސްޓު ފައިނަލް ކުރާނެ ކަމަށެވެ.
މިދިޔަ އަހަރު މެލޭޝިއާގެ ދެވަނަ ޑިވިޝަންގެ ޗެމްޕިއަންކަން ހޯދައި، ޕީޑީއާރްއެމް މެލޭޝިއާގެ ފުރަތަމަ ޑިވިޝަން ޕްރޮމޯޓްކޮށްދިނުމުގައި ދަގަނޑޭ މުހިންމު ރޯލެއް އަދާކުރި އެވެ. މީގެ އިތުރުން މެލެޝިއާގެ އެފްއޭ ކަޕްގެ ކުއާޓާ ފައިނަލާއި މެލޭޝިއާ ކަޕްގެ ސެމީ ފައިނަލާ ހަމައަށް ޕީޑީއާރްއެމް ގެންގޮސްދިނުމުގައި ދަގަނޑޭ ހިއްސާބޮޑެވެ.
މިދިޔަ ސީޒަންގައި ޕީޑީއާރްއެމް އަށް 22 ލަނޑު ޖަހައިދިން ދަގަނޑޭ ވަނީ ޕީޑީއާރްއެމްގެ ކޮންޓުރެކްޓް ދެ އަހަރަށް އާކޮށްފަ އެވެ.