މިމަހުގެ ކުރީކޮޅު ލ ގަމުގައި ހިނގި އެކްސިޑެންޓެއްގައި ލިބުނު އަނިޔާއަށް ފަރުވާ ދެމުންދަނިކޮށް އެރަށު ތުނޑީ ކަނީރުމާގޭ ހާރޫން އަބްދުއްރަހުމާން، 72 މަރުވެއްޖެ އެވެ. ހާރޫން މަރުވެފައިވަނީ މިއަދު އައިޖީއެމްއެޗްގައި ފަރުވާދެނިކޮށެވެ.
މީގެ 15 ވަރަކަށް ދުވަސް ކުރިން ހިނގި އެ އެކްސިޑެންޓްގައި ހާރޫނަށް ބޭރުފުށަށް ފެންނަންހުރި ބޮޑެތި ޒަހަމްތަކެއް ލިބިފައެއް ނުވެ އެވެ. ނަމަވެސް ކުރިން ބައިޕާސް ހަދާފައިވާ ހާރޫން އެކްސިޑެންޓަށް ފަހު އުޅުނީ ވަރަށް ބޮޑަށް ބަލިވެ އެވެ. އެކްސިޑެންޓަށްފަހު ގަމު ހޮސްޕިޓަލްގައި ފަރުވާދިނުމަށްފަހު މާލެ ގެނެސް ފަރުވާދެމުން ގެންދިޔައީ އައިޖީއެމްއެޗް ހޮސްޕިޓަލްގަ އެވެ.
އަވަސްއަށް މައުލޫމާތު ދެއްވަމުން ގަމު ކައުންސިލުގެ ރައީސް މުހައްމަދު ޝިޔާމް ވިދާޅުވީ، ހާރޫން މިއަދު މަރުވިއިރު އައިޖީއެމްއެޗްގައި ރޭ އޮޕަރޭޝަނެއް ވެސް ކޮށްފައިވާ ކަމަށެވެ.
"އެކްސިޑެންޓުގައި ވަރަށް ބޮޑެތި ޒަހަމްތަކެއް ނެތް ލިބިފަ. އެކަމަކު ހާލު ސީރިއަސްވެގެން އައިސީޔޫގައި ފަރުވާކުރަމުން ދިޔައީ މާލެ ގެންގޮސްގެން ވެސް. ބޮޑަށް ބެލެވެނީ އެތެރެހައްޓަށް އަނިޔާވީ ކަމަށް. ރޭ ކޮށްފައިވަނީ ގޮހޮރާބެހޭ އޮޕަރޭޝަނެއް ކަމަށް މައުލޫމާތު ލިބެނީ،" ޝިޔާމް ވިދާޅުވި އެވެ.
ގަމު ހޮސްޕިޓަލްގައި ފަރުވާ ދިނުމަށްފަހު ހާރޫން މާލެ ގެނައީ މީގެ ދެ ހަފުތާ ކުރިންނެވެ.