ދިވެހިންގެ އަމާޒަކަށް ވާންވާނީ އެކި ރޮނގުން "ރަންތަށި" އުފުލާ ބަޔަކަށް ވުން ކަމަށާއި އެއީ އަބަދުވެސް ކުރައްވާ އުންމީދެއް ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
މި އަހަރު ރަޝިއާގައި ބާއްވާ ވޯލްޑްކަޕް ޕްރޮމޯޓްކުރުމުގެ ގޮތުން ފަށާފައިވާ ވޯލްޑްކަޕް ޓުވާގައި ވޯލްޑް ކަޕްގެ އޮރިޖިނަލް ތަށި ރާއްޖެއަށް ގެނެސް އެތަށި އުފުއްލަވާލެއްވުމުގެ ފުރުސަތު މިރޭ ރައީސް ޔާމީނަށް ވަނީ ލިބިވަޑައިގަންނަވާފަ އެވެ. އެމަނިކުފާނު ވަނީ ކުޅިވަރުގެ ދުނިޔޭގެ އެންމެ ބޮޑު ޝަރަފެއް ހޯދާފައިވާ އެ އަގު ބޮޑު ތަށި ރާއްޖެއަށް އައުން "ރާއްޖޭގެ ކުޅިވަރުގެ ދާއިރާއަށާއި ގައުމަށް ލިބުނު ބޮޑު ޝަރަފެއްގެ" ގޮތު ސިފަ ކުރައްވާފަ އެވެ.
ފީފާގެ ތައްޓަށް މަރުހަބާ ދަންނަވައި ވާހަކަފުޅު ދައްކަވަމުން މިރޭ ރައީސް ވިދާޅުވީ، މަދުން ނޫނީ ފެންނަން ނުލިބޭ އެ ތަށި ރާއްޖެއަށް އައުމަކީ ރާއްޖޭގެ ކުޅުންތެރިން ފަހުރުވެރިވާންޖެހޭ ކަމެއް ކަމަށް ވިދާޅުވެފަ އެވެ. އަދި މިފަދަ މުނާސަބަތެއްގައި އަޒުމް ކަނޑައަޅަންވީ ދިވެހިންނަކީ ވެސް އެފަދަ ރަންތަށިތައް އުފުލާ ބަޔަކަށް ވުމަށް ކަމަށެވެ.
"..މިކަހަލަ ޓްރޮފީއެއް ރާއްޖެ އައިމަ އުފާވޭ. ހިތްހަމަޖެހޭ. ލޯތަކުން ހިލެނީ އުފަލުގެ ކަރުނަ. ހަޔާތުގެ އެއްފަހަރު ނޫނީ މިކަހަލަ ކަމެއް ބައްދަލެއް ނުކުރާނެ. މިފަދަ ފުރުސަތުތަކަކީ ކުޅިވަރުގެ ތެރެއިން ގުޅުން ބަދަހިކުރަން ލިބޭ ފުރުސަތުތަކެއް،" ރައީސް ވިދާޅުވި އެވެ. "އަޅުގަނޑުމެންގެ އަމާޒަކަށް ވާންވާނީ ކުޅިވަރުގެ މައިދާނުގަ މިކަހަލަ ރަން ތަށި އުފުލާ ބަޔަކަށް ވުން، މެހުމާންދާރީގައި ރަންތަށި ހޯދާ ބަޔަކަށް ވުން،"
ރާއްޖޭގެ ކުޅިވަރުގެ ދާއިރާގެ ކުރިއެރުމަށް އުންމީދުކުރައްވައި އެކަމަށް ރާއްޖޭގެ ތާރީހުގައިވެސް ނުކުރާ ވަރުގެ ގިނަ މަސައްކަތްތަކެއް އެމަނިކުފާނު ވެރިކަމަށް ވަޑައިގަންނަވައިގެން ކުރެއްވިކަމަށާއި މިއަދު އޭގެ ނަތީޖާ ފެންނަމުންދަނީ ވަރަށް ފޮނިކޮށް ކަމަށް ވެސް ރައީސް ޔާމީން މިރޭ ވިދާޅުވި އެވެ.
"މިހާރު މިހިނގާ ހަތަރު އަހަރު ތެރޭގައި ރާއްޖޭގެ ކުޅިވަރު އިންފްރާސްޓްރަކްޗާ ގާއިމްކުރެވިފައި މިވަނީ ރާއްޖޭގެ ތާރީހުގައި ވެސް ނުކުރާ ވަރުގެ މަސައްކަތްތަކާއެކު. ފާއިތުވި ހަތަރު އަހަރަކީ ރާއްޖެއިން ކުޅިވަރުގެ ދާއިރާއިން އެންމެ ގިނަ ވަނަ ހޯދި އަހަރު. އުންމީދަކީ އަބަދު އެ ހިދުމަތް ޒުވާނުންގެ ހައްގުގައި ކުރުން. މި އިންވެސްޓްމަންޓް ތަކަކީ ޖީލުތަކަށް މަންފާކުރަނިވި އިންވެސްޓްމަންޓް ތަކަކަށް ހެދުން،" ރައީސް ޔާމީން ވިދާޅުވި އެވެ.
ވޯލްޑްކަޕްގެ އަސްލު ތަށި އުފުލާލުމުގެ ޝަރަފު ލިބިވަޑައިގެނެވި ހަމައެކަނި ދިވެއްސަށް ރައީސް ޔާމީން ވެވަޑައިގެންފައިވާއިރު އެ ޝަރަފުވެރި ތަށި ދިވެހިންނަށް ދައްކާލުން މާދަމާ އެފްއޭއެމްގެ ޓާފް ދަނޑުގައި ވެސް ތައްޓާ އެކު އެކި ހަރަކާތްތައް އޮންނާނެ އެވެ. އެކަމަކު ޓްރޮފީ ބަލާލައި ފޮޓޯ ނެގުމުގެ ފުރުސަތު ލިބޭނީ ޓިކެޓް އޮތް ފަރާތްތަކަށެވެ.