ރާއްޖޭގެ ގާނޫނީ އަސާސީ އާއި ގާނޫނީ ބާރުވެރިކަން ހިފެހެއްޓުމުގެ ބާރު ސަރުކާރުގެ މުއައްސަސާތަކުން ލިބިގަންނަންޖެހޭ ކަމަށް ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން ފާރިސް މައުމޫން ވިދާޅުވެއްޖެ އެވެ.
މިދިޔަ ބުރާސްފަތި ދުވަހު ކުރިމިނަލް ކޯޓުން ނެރުނު އަމުރާއެކު ގެއަށް ދޫކޮށްލާފައިވަނިކޮށް އަނެއްކާވެސް ފާރިޝް ހައްޔަރުކުރަން އުޅޭ ކަމުގެ މައުލޫމާތު ލިބިފައިވާކަމަށް އާއިލާއިން ބުނެފައިވަނިކޮށް ފާރިޝް ދެންމެ ޓުވީޓެއް ކުރައްވައި ވިދާޅުވީ ގާނޫނީ ބާރުވެރިކަން ނެގެހެއްޓުމަކީ ވަކި ފަރުދަކަށް ކުރަން އުނދަގޫ ކަމެއް ކަމަށެވެ.
ނަމަވެސް ސަރުކާރުގެ މުއައްސަސާތަކުން އެ ހިއްވަރާއި ބާރު ހޯދަން އެބަޖެހޭ ކަމަށާއި ކޮންމެ ކަމެއްވެސް ބަރުދާސްތުކުރާނެ ހައްދެއް އޮންނަޖެހޭ ކަމަށެވެ. ފާރިޝްގެ އެ ވާހަކަފުޅު އަމާޒުކުރެއްވީ ސީދާ ކޮން ކަމަކަށް ކަމެއް ހާމައެއް ނުކުރައްވަ އެވެ.
ފާރިސް ހައްޔަރު ކުރާ ކަމުގެ އަޑުތަކެއް ފެތުރިފައިވިޔަސް އެފަދަ އަމުރެއް ހޯދިކަން އަދި ރަސްމީ އެއްވެސް އިދާރާއަކުން ސާފެއް ނުވެއެވެ. މިއަޑުތައް ފެތުރުނު އިރު ރޭ އޮތް އިންޑީއާގެ 69 ވަނަ ރިޕަބްލިކް ޑޭގެ ހަރަކާތުގައި ފާރިސް އާއި އޭނާގެ ބައްޕާފުޅު މައުމޫން ބައިވެރިވެ ވަޑައިގެންނެވި އެވެ.