ޓީޓީ މުބާރާތްތައް ކުރިއަށް ގެންދަން ހޯލެއް ހަމަ ނުޖެހެތީ، ގައުމީ މުބާރާތް ސޯޝަލް ސެންޓަރު އެތެރޭ ކޯޓުގައި ފަށައިފި އެވެ.
މުބާރާތް ބޭއްވޭނެ ފެންވަރުގެ އިމާރާތެއް ނެތުމުން، މިދިޔަ އަހަރު ބާއްވަން އޮތް ޓީޓީ މުބާރާތް ފަސް ކުރީ އެވެ. އެސޯސިއޭޝަނުން އޭރު އުންމިދު ކުރީ މި އަހަރު ފެށެންވާއިރަށް ޓީޓީ މުބާރާތްތައް ކުރިއަށް ގެންދަން ހާއްސަ ހޯލެއް ހަމަޖެހޭނެ ކަމަށެވެ. މީގެ ކުރިން ނަމަ، ޓީޓީއަށް ހާއްސަ ހޯލެއް ހުރެ އެވެ.
ޓިޓީގެ އިމާރާތެއްގެ ގޮތުގައި އެންމެ ފުރަތަމަ ބޭނުން ކުރަމުން ދިޔައީ، ކުޅިވަރު އެކުވެނީގައި ހުންނަ އިމާރާތެކެވެ. ނަމަވެސް އެ އިމާރާތަށް ގިނަ ދުވަސް ވެގެން އިމާރާތް ވެއްޓިދާނެ ކަމަށް ލަފާ ކުރެވުމުން ހައުސިން މިނިސްޓްރީން، 2014 ވަނަ އަހަރު ސޯޝަލް ސެންޓަރަށް ޓީޓީ އެސޯސިއޭޝަން ބަދަލު ކުރި އެވެ.
ދެހާސް ސާދަ ވަނަ އަހަރުން ފެށިގެން، މިދިޔަ އަހަރުގެ ވަކި ހިސާބަކާ ހަމަޔަށް ޓިޓީގެ އިމާރާތެއްގެ ގޮތުގައި ބޭނުން ކުރީ، ސޯޝަލް ސެންޓަރުގެ ގޯތި ތެރޭގައި ހަދާފައިވާ އިމާރާތެއްގެ ތެރޭގައެވެ. ނަމަވެސް ހައުސިން މިނިސްޓްރީގެ ބިމެއްގެ ގޮތުގައި އޮތް އެ ބިން އެމިނިސްޓްރީން ބޭނުން ވުމުން ޓީޓީ އެސޮސިއޭޝަނުން ވަނީ މިދިޔަ އަހަރު އެތަނުން ނިކުމެފައެވެ. މިހާރު އެ އެސޯސިއޭޝަންގެ އޮފީސް ގާއިމު ކޮށްފައި ވަނީ ހެންވޭރުގައި ހުންނަ މުނިއުފާ ޔޫތު ސެންޓަރު ކުރިން ހިންގި ތަނުގަ އެވެ.
ނަމަވެސް އެތަނަކީ، ޓީޓީގެ ބޯޑުތައް އަތުރައި މުބާރާތްތައް ކުރިއަށް ގެންދެވޭނެ ފެންވަރުގެ ތަނެއް ނޫނެވެ. މިދިޔަ އަހަރު ފަހު ކޮޅު ރާއްޖޭގައި ބޭއްވި ޓީޓީގެ ދެކުނު އޭޝިއާ ހޯޕްސް ވީކްސް ނިންމުމުގެ ރަސްމިއްޔަތުގައި ވާހަކަ ދައްކަވަމުން ޔޫތު އެންޑް ސްޕޯޓްސް މިނިސްޓަރު އިރުތިޝާމް އާދަމް ވިދާޅުވެފައި ވަނީ، ދެކުނު އޭޝިއާގެ ޖޫނިއާ ޓީޓީ ޗެމްޕިއަންޝިޕް މިއަހަރު ރާއްޖޭގައި ބޭއްވުމަށް މަސައްކަތް ކުރަމުން ގެންދާ ކަމަށެވެ.
"އަންނަ އަހަރު [މި އަހަރު] ރާއްޖޭގައި ބައިނަލްއަގްވާމީ ޓީޓީ މުބާރާތެއް ރާއްޖޭގައި ބޭއްވުމަށް އަޅުގަނޑުމެން މިގެންދަނީ މަސައްކަތް ކުރަމުން،" ދެކުނު އޭޝިއާގެ ހޯޕްސް ވީކްސްގެ ނިންމުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވެފައި ވެއެވެ. "ރާއްޖޭގެ ކުޅުންތެރިންގެ ކުރިއެރުމަށް ރާއްޖޭގައި މިފަދަ މުބާރާތެއް ބޭއްވުމަކީ ވަރަށް މުހިންމު ކަމެއް."
މިނިސްޓަރު އެހެން ވިދާޅުވި ނަމަވެސް ޓީޓީ ކުޅޭނެ ވަކި ހޯލެއް އަދި ހަމަޖެހިފައެއް ނުވެ އެވެ. ހޯޕްސް ވީކްސް ވެސް ކުރިއަށް ގެންދިޔައީ ހުޅުމާލޭ ގާޒީ ސްކޫލުގެ ހޯލްގަ އެވެ.
ގައުމީ މުބާރާތް ކުރިއަށްދާ، އިންޑޯ ކޯޓް، މިހާރުވެސް ތިން އެސޯސިއޭޝަނަކުން، މުބާރާތްތަށް ބާއްވަން ބޭނުން ކުރެ އެވެ. އެއީ ވޮޅިބޯޅަ، ބާސެކެޓްބޯޅަ އަދި ނެޓްބޯޅަ އެސޯސިއޭޝަނުނެވެ.
މިއަހަރުގެ ގައުމީ މުބާރާތުގައި 57 ކުޅުންތެރިން ވާދަ ކުރެ އެވެ. މުބާރާތް ރޭ ރަސްމީކޮށް ފައްޓަވައި ދެއްވީ ޗައިނާއިން ރާއްޖެއަށް ކަނޑައަޅާފައިވާ ސަފީރު ޒަންގް ލިޒޯންގް އެވެ. މުބާރާތް ފައްޓަވައި ދިނުމުގެ ގޮތުން ސަފީރު ވަނީ އެންމެ ފަހުގެ ގައުމީ އަންހެން ޗެމްޕިއަން އައިޝަތު ރަފާ ނާޒިމް އާއެކު ޓީޓީ ކުޅުއްވާފަ އެވެ. މުބާރާތް ކުރިއަށްދާނީ އަންނަ ބުދަ ދުވަހުގެ ނިޔަލަށެވެ.