ރާއްޖޭގެ ދެވަނަ ޖުމްހޫރިއްޔަތަށް 50 އަހަރު ފުރުން ފާހަގަ ކުރުމުގެ ގޮތުން ޒުވާނުންގެ ނަމޫނާ މަޖިލީހެއް ބާއްވަން ހޯމް މިނިސްޓްރީން ނިންމައިފި އެވެ. ނަމޫނާ މަޖިލިސް ބާއްވަން ނިންމާފައިވަނީ އަންނަ މާޗު މަހުގެ ތެރޭގަ އެވެ.
އެ މިނިސްޓްރީން މިއަދު ބުނީ، ސަރުކާރުގެ ސިޔާސަތުތަކާ އެއްގޮތަށް ހަރުދަނާ ޒުވާނުން ބިނާކުރާނެ ގޮތްތަކާއި ރައްޔިތުންގެ ބަސް މުޖުތަމައަށް އިއްވާނެ ގޮތްތަކާ ބެހޭގޮތުން އެ މަޖިލީހުގައި މަޝްވަރާކުރާނެ ކަމަށެވެ. އަދި މިނިވަން މާހައުލެއްގައި އާންމުންގެ ޝުއޫރުތައް ހިއްސާކުރުމުގެ ފުރުސަތުވެސް އެ މަޖިލީހުގައި ހުޅުވައިލާނެ ކަމަސެވެ.
ނަމޫނާ މަޖިލީހުގައި ބައިވެރިވާން ބޭނުން ފަރާތްތަކަށް ނަން ފޮނުވައި ރަޖިސްޓްރީވުމުގެ ފުރުސަތު މިހާރު ހުޅުވާލާފައިވާއިރު ކޮލެޖް ޔުނިވާސިޓީ އަދި ހައި ސްކޫލުތަކުގެ ދަރިވަރުންނަށް ވެސް މަޖިލީހުގައި ބައިވެރިވެވޭނެއެވެ.
ހޯމް މިނިސްޓްރީން ބުނީ، ނަމޫނާ މަޖިލީހުގެ އިންތިހާބީ ދާއިރާތައް ތަމްސީލު ކުރުމަށް ކުދިން ހޮވާނީ ޝަރުތުތައް ފުރިހަމަވާ ކުދިންގެ މެދުގައި އިންޓަވިއުކޮށްގެން ކަމަށެވެ. އަދި ބައިވެރިވެވޭނީ 18 އަހަރާއި 30 އަހަރާ ދެމެދުގެ ޒުވާނުންނަށް ކަމަށެވެ.
މަޖިލިސް އޮންނާނީ މާޗު މަހުގެ 30 އަދި 31 ވަނަ ދުވަހު އެވެ. ރަޖިސްޓްރީވުމަށް ހޯމް މިނިސްޓްރީއަށް ސިޓީ ފޮނުވުމުގެ ފަހު ތާރީހަކީ ފެބްރުއަރީ މަހުގެ އަށް ވަނަ ދުވަހެވެ.