އުރީދޫ ދިވެހި ޕްރިމިއާ ލީގުގައި މިއަދު ހަވީރު މަހިބަދޫ ސްޕޯޓްސް ކްލަބް އަތުން 3-0 އިން ކްލަބް އީގަލްސް މޮޅުވެއްޖެ އެވެ.
މެޗުގެ 13 ވަނަ މިނިޓުގައި އީގަލްސް އިން ލީޑު ނެގީ ހަސަން އަދުހަމް (ސަޑޭ) ޖެހި ލަނޑުންނެވެ. މަހިބަދޫގެ ޑިފެންޑަރެއް ކައިރިން ނައްޓާލުމަށް ފަހު އީގަލްސްގެ ކެޕްޓަން އިސްމާއިލް އީސާ (މެސީ) ތިރިތިރިން ހުރަސްކޮށްލި ބޯޅަ، ސަޑޭ ވަނީ ގޯލުގެ ތެރެއަށް ވައްދާލައިފަ އެވެ.
އަދި އޭގެ ފަސް މިނިޓު ފަހުން ސަޑޭ ވަނީ އިތުރު ލަނޑެއް ޖަހައި، އީގަލްސްގެ ލީޑު ފުޅާކޮށްފަ އެވެ. ޕެނަލްޓީ އޭރިޔާ ތެރެއިން އިމްރާން ނަޝީދު ދިން ބޯޅަ، ސަޑޭ ވަނީ ފަސޭހަކަމާއެކު ގޯލު ބުޑުން ގޯލަށް އަމާޒުކޮށްލައިފަ އެވެ.
މެޗުގެ 73 ވަނަ މިނިޓުގައި އީގަލްސްގެ ތިން ވަނަ ލަނޑު ޖެހީ ބަދަލު ކުޅުންތެރިއެއްގެ ގޮތުގައި ކުޅެން އެރި ޒުވާން ފޯވަޑް އަހުމަދު ރިޒްވާނެވެ. ހިލޭ ޖެހުމަކުން އީސަ ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ ރިޒޭ ގޯލަށް އަމާޒުކޮށްލީ ބޮލުންނެވެ.
އީގަލްސްގެ ދެވަނަ ގޯލްކީޕަރު އިބްރާހިމް ލަބާން ޝަރީފް ފުލަހަކަށް ހަމަލާ ދިން މައްސަލައެއްގައި ހައްޔަރުކުރުމާ ގުޅިގެން، މިއަދު އެ ޓީމުގެ ގޯލް ބެލެހެއްޓީ އާ ކީޕަރެއް ކަމަށްވާ ހުސެއިން އަނީސް އެވެ. މިއީ އަނީސް ފުރަތަމަ ޑިވިޝަންގެ މެޗެއްގައި ކުޅުނު ފުރަތަމަ ފަހަރެވެ. އީގަލްސްގެ އެއްވަނަ ގޯލްކީޕަރު މުހައްމަދު ފައިސަލް އަށް އަނިޔާވެ، އޭނާ އަށް ވަނީ ސީޒަން ނިމިފަ އެވެ.
މެޗަށް ފަހު އީގަލްސްގެ ކޯޗު އިހުސާން އަބްދުލް ގަނީ (ސާންތީ) ބުނީ މި މޮޅާއެކު ވަރަށް ހިތްހަމަޖެހިއްޖެ އެވެ.
"މިއަދު ބޭނުންވީ ބޮޑު ބްރޭކް ނިންމާލާއިރު އެއްވަނައިގައި ނިންމާލުން. މިއީ ހުރިހާ ގޮތަކުން ވެސް މުހިންމު މެޗެއް. ކުޅުމާ ދޭތެރޭ ހިތްހަމައެއް ނުޖެހޭ، އެކަމަކު ތިން ޕޮއިންޓާއި ތިން ގޯލު މިއަދު މުހިންމުވީ،" ސާންތީ ބުންޏެވެ.
މަހިބަދޫގެ ކޯޗު ސްޓޮއިކޯފް އިވަނޯފް ބުނީ ލީގުގައި ކުޅުނު ފުރަތަމަ މެޗާ އަޅާބަލާއިރު މަހިބަދޫގެ ކުޅުން ރަނގަޅުވިޔަސް، އީގަލްސް ކަހަލަ ޓީމެއް ބަލިކުރެވޭ ފެންވަރުގެ ކުޅުމެއް ނުދެއްކުނު ކަމަށެވެ.
"ފުރަތަމަ މެޗާ އަޅާބަލާއިރު ކުޅުން ރަނގަޅު. އެކަމަކު އީގަލްސް ބަލިކުރެވޭ ފެންވަރުގެ ކުޅުމެއް ނުދެއްކުނު. ޑިފެންސްގައި އަދި އެޓޭކްގައި ވެސް އެބަހުރި މައްސަލަތަކެއް،" ސްޓޮއިކޯފް ބުންޏެވެ.
މި މެޗަށް ފަހު، އަންނަ މަހު ފަށާ ވޯލްޑް ކަޕް ކޮލިފައިންނަށް ގައުމީ ޓީމު ތައްޔާރީތައް ފަށާތީ ލީގުގެ ކުޅުން ވަނީ މެދުކަނޑާލައިފަ އެވެ. ލީގުގެ ކުޅުން ދެން ފަށާނީ އަންނަ މަހުގެ 21 ވަނަ ދުވަހު އެވެ.