ހައުސިން މިނިސްޓްރީން ހިންގި އިމާރާތް ކުރުމުގެ އެކި މަޝްރޫއުތަކަށް، މިނިސްޓްރީގެ މަސައްކަތްތައް ކުރުމުގެ ހުއްދަ ނެތް ގިނަ އަދަދެއްގެ ބިދޭސީ މަސައްކަތު މީހުން ބޭނުން ކޮށްފައިވާ ކަމަށް އެ ހައުސިންގެ 2015 ވަނަ އަހަރުގެ އޮޑިޓް ރިޕޯޓުން ހާމަވެއްޖެ އެވެ.
އޮޑިޓާ ޖެނަރަލްގެ އޮފީހުން މިއަދު ރިޕޯޓުގައި ބުނީ، 2015 ވަނަ އަހަރު މާލޭގެ މަގުތައް މަރާމަތުކުރުމަށާއި ތިން ރުއް ޕާކް ތަރައްގީ ކުރުމުގެ މަޝްރޫއު ކުރިއަށް ގެންދިޔައީ، އަމިއްލަ ފަރާތްތަކުން އެކި މަސައްކަތްތައް ގެނެސްފައިވާ 59 ބިދޭސީއަކު ލައްވައި ކަމަށެވެ. އަދި އެ ބިދޭސީންގެ މުސާރައިގެ ގޮތުގައި ޖުމުލަ 619،986 ރުފިޔާ ހައުސިން އިން ދީފައިވާއިރު އެއީ އިމިގްރޭޝަންގެ ގާނޫނާ ހިލާފަށް އެ މިނިސްޓްރީން ކޮށްފައިވާ ކަމެއް ކަމަށެވެ.
"މިފަރާތްތަކަކީ މިނިސްޓްރީގެ މަސައްކަތްތަކެއް ކުރުމަށް ރާއްޖެ ގެނެވިފައިވާ ބައެއް ނޫންކަން ފާހަގަކުރެވެ އެވެ،" އޮޑިޓް ރިޕޯޓްގައި ބުނެފައިވެ އެވެ.
ރާއްޖޭގައި މަސައްކަތް ކުރަން އަންނަ ބިދޭސީންގެ ވޯކް ވިސާއާބެހޭ ގަވާއިދު ބުނާ ގޮތުން ރާއްޖެއަށް އެތެރެވެވޭ ކޮންމެ ބިދޭސީއަކު ވެސް މަސައްކަތްކުރަން ޖެހޭނީ އޭނާއަށް ދީފައިވާ ހުއްދާގައި ހިމެނޭ ދާއިރާތަކުގެ ތެރޭންނެވެ. އެނޫން ގޮތަކަށް މަސައްކަތް ކުރުމަކީ މަނާކަމެއް ކަމަށެވެ.
ނަމަވެސް ހައުސިން މިނިސްޓްރީގެ މަސައްކަތްތަކަށް ނެގި 59 ބިދޭސީންގެ ތެރޭގައި ވެއިޓަރުކަމުގެ މަސައްކަތު ހުއްދައާއި ޑޮމެސްޓިކް ސާވަންޓް ފަދަ މަސައްކަތު ހުއްދައިގެ ދަށުން ރާއްޖެއަށް އައިސްފައިވާ ބިދޭސީން ވެސް ހިމެނެ އެވެ.
އެމައްސަލައާ ގުޅިގެން ގަވާއިދާ ހިލާފަށް ބިދޭސީން ނުގެންގުޅުމަށް އޮޑިޓާޖެނަރަލް ވަނީ ލަފާ ދީފަ އެވެ.