ރާއްޖެ ޓީވީ ބަންދުކުރަން ޕީޕީއެމުން ގޮވާލުމަކީ ވެރިކަންކުރާ ޕާޓީން ގާނޫނާއި ގަވާއިދާ ހިލާފަށް ކަންކަން ހިންގުމަށް ކުރަން ބޭނުންވެގެން އުޅޭ ކަމެއް ކަމަށާއި އެއީ ރާއްޖޭގެ ހުރިހާ ނޫސްވެރިންނަށް ދިން އިންޒާރެއް ކަމަށް ރާއްޖެ ޓީވީން ބުނެފި އެވެ.
ރާއްޖެ ޓީވީން ދަނީ ރާއްޖެ މިވަގުތު އޮތް ހާލަތުގައި ފިތުނަ ފަސާދަ އުފައްދަމުން ކަމަށް ބުނެ އެ ޓީވީ ބަންދުކުރުމަށް ސަރުކާރުގެ ކަމާބެހޭ ފަރާތްތަކަށް ވެރިކަން ކުރާ ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ މިއަދު ވަނީ ގޮވާލައްވާފައެވެ. އަބްދުއްރަހީމްގެ އެ ގޮވާލުމާ ގުޅިގެން އިންތިހާއަށް ކަންބޮޑުވެ އެކަން ކުށްވެރިކުރާ ކަމަށް އެޓީވީން މިއަދު ނެރުނު ނޫސްބަޔާނެއްގައި ބުންޏެވެ.
ރާއްޖެ ޓީވީން ބުނީ، އަބްދުއްރަހީމްގެ ގޮވާލުމަކީ ރާއްޖެ ޓީވީ އާއި ރާއްޖޭގެ ހުރިހާ ނޫސްވެރިންނަށް ދިން ބިރުވެރި އިންޒާރެއް ކަމަށެވެ.
"ހިޔާލުފާޅުކުރުމުގެ މިނިވަންކަމަކީ ދިވެހި ޖުމްހޫރިއްޔާގެ ގާނޫނު އަސާސީއާއި ގާނޫންތަކާއި ރާއްޖެ ބައިވެރިވާ ބައިނަލްއަގުވާމީ މުއާހަދާތަކުން ކަށަވަރު ކޮށްދީފައިވާ ކަމަކަށް ވީ ނަމަވެސް، ވެރިކަން ކުރާ ޕާޓީން ރާއްޖެ ޓީވީ ބަންދުކުރަން ގޮވާލުމަކީ ދަށު ދަރަށައިގެ ނާތަހުޒީބު، ޑިމޮކްރަސީއާ ބީރައްޓެހި ކަމެއް ކަމަށް ދެކެމެވެ،" އެ ޓީވީގެ ބަޔާނުގައި ބުންޏެވެ.
ރާއްޖެޓީވީގެ މަސައްކަތްތައް ހުއްޓުވަން ބޭނުންވެ އެކަމުގެ އިންޒާރު ދިންއިރު، އެ ޓީވީން ކުރަމުންގެންދާހާ ވެސް މަސައްކަތަކީ ގާނޫނީ ހަމަތަކުގެ ތެރޭން މުހިންމު ދަނޑިވަޅުތަކުގައި ގައުމުގައި ހިނގަމުންދާ ކަންކަން ހުއްޓުމެއް ނެތި ވަގުތުން ގެނެސްދިނުމުގެ މަސައްކަތް ކަމަށް އެ ޓީވީން ބުންޏެވެ. އެހެން ކަމުން ޓީވީ ބަންދުކުރުމަށް ގޮވާލާ ގޮވާލުންތަކަކީ ގާނޫނާ ހިލާފު ކަންކަން ކުރުމަށް ފުރުސަތު ހޯދަން ސަރުކާރުން ކުރަން ބޭނުންވެގެން އުޅޭ ކަމެއް ކަމަށް ވެސް އެ ބަޔާނުގައި ބުނެފައިވެ އެވެ.
"މުހައްމަދު ނަޝީދު ބޭނުންވާހާ އެއްޗެއް ވިދާޅުވުމަށް ފުރުސަތު އޮތުމަކީ ގައުމުގެ ހަމަޖެހުން ނަގާލަން ކަމަށް ބުނެ، މި ސްޓޭޝަން ބަންދުކުރުމަށް ގޮވާލުމަކީ ގަބޫލުކުރެވޭނެ ސަބަބެއް ނޫނެވެ. މިނިވަން މީޑިއާއަކީ ދައުލަތުގެ މައްޗަށް ފާރަވެރިވުމުގެ ޒިންމާ އޮތް ބަޔަކަށް ވީއިރު، ރާއްޖެ ޓީވީ ބަންދުކުރަން ވެރިކަންކުރާ ޕާޓީން ބޭނުން ވަނީ ގާނޫނާއި ގަވާއިދާ ހިލާފަށް ކަންކަން ހިންގުމަށް މަގުފަހިކުރުމަށް ކަމަށް މި ސްޓޭޝަނުން ދެކެމެވެ،" ރާއްޖެ ޓީވީގެ ބަޔާނުގައި ބުނެފައިވެ އެވެ.
އެ ސްޓޭޝަނުން ވަނީ މިނިވަން ނޫސްވެރި ކަމަށާއި މައުލޫމާތު ހޯދައި ލިބިގަތުމުގެ ހައްގަށާއި ހިޔާލުފާޅުކުރުމުގެ މިނިވަންކަމަށް ހުރަސް އެޅުމަށް ކުރަމުންދާ ކަންކަން ހުއްޓާލުމަށް ގޮވާލާފަ އެވެ. އަދި އެފަދަ ކަންކަން ކުރުމުގެ ފުރުސަތު ސަރުކާރަށް ނުދިނުމަށް މުއައްސަސާތަކަށާއި ބައިނަލްއަގުވާމީ މުޖުތަމައަށް ގޮވާލާފަ އެވެ.