ވޯލްޑް ކަޕް ކޮލިފައިންގައި އަންނަ މަހު ގަތަރާއި ހޮންކޮންގްއާ ދެކޮޅަށް ދިވެހިރާއްޖޭގެ ގައުމީ ޓީމު ކުލޭ ދެ މެޗަށް ގައުމީ ޓީމުގެ ކޯޗު ވެލީޒާ ޕޮޕޯފް ނެގި 25 ކުޅުންތެރިންގެ ސްކޮޑުގައި ހިމެނޭ ނިއު ރޭޑިއަންޓްގެ ޑިފެންޑަރު މުހައްމަދު ރަޝީދު (ހޮކޭ)، ސްކޮޑުން ބަކީކުރަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.
އެފްއޭއެމް އިން އިއްޔެ ނެރުނު ބަޔާނެއްގައި ބުނެފައިވަނީ ހޮކޭ ހަ މެޗަށް ސަސްޕެންޑްކުރަން އެފްއޭއެމްގެ ޑިސިޕްލިނަރީ ކޮމެޓީން ނިންމާފައިވާއިރު، ސަސްޕެންޝަނެއްގައި ހުރި ކުޅުންތެރިއެއް ގައުމީ ސްކޮޑްގައި ހިމެނުމަކީ އެންމެ އެދެވޭ ގޮތް ކަމަށް އެފްއޭއެމްގެ މެނޭޖްމަންޓަށް ނުފެންނާތީ އޭނާ ސްކޮޑުން ބާކީކުރަން ނިންމާފައިވާ ކަމަށެވެ.
ހޮކޭ ހިމަނައިގެން ބުރާސްފަތި ދުވަހުގެ ރޭ ގައުމީ ސްކޮޑް އިއުލާންކުރިއިރު، ޕޮޕޯފް ބުނީ "މިއީ މި ވަގުތު ނެގެން އޮތް އެންމެ ރަނގަޅު ސްކޮޑް" ކަމަށެވެ.
އެފްއޭއެމްގެ ނިންމުމާމެދު ޕޮޕޯފް ވަނީ ހިތްހަމަނުޖެހުން ފާޅުކޮށްފަ އެވެ. ޕޮޕޯފްގެ އޭނާގެ ރަސްމީ ފޭސްބުކް ޕޭޖުގައި އިއްޔެ ބުނެފައިވަނީ އެފްއޭއެމްގެ ނިންމުމާމެދު އޭނާ ހިތްހަމަނުޖެހޭ ކަމަށެވެ.
"އެފްއޭއެމްގެ ނިންމުމާމެދު ހިތްހަމައެއްނުޖެހޭ. އަހަރެން މިކަމާ ގުޅޭގޮތުން އެފްއޭއެމްގެ ޗެއާމަންއާ ވާހަަކަދައްކަނާނަން،" ޕޮޕޯފް ބުނެފައިވެ އެވެ.
އެފްއޭއެމްގެ ޑިސިޕްލިނަރީ ކޮމެޓީން ހޮކޭ ހަ މެޗަށް ސަސްޕެންޑްކޮށް، 15000ރ. އިން ޖޫރިމަނާކުރީ ޕީޕަލްސް ކަޕްގައި ނިއު ރޭޑިއަންޓާއި ސިންގަޕޫރުގެ ލަޔަންސް ބައްދަލުކުރި މެޗުގައި ލަޔަންސްގެ ކުޅުންތެރިއެއްގެ ކަރަށް ފައިން އެރި މައްސަލައިގަ އެވެ. އެ ނިންމުން އެޕީލްކުރި ނަމަވެސް، އެ ނިންމުމަށް ބަދަދެއް ނުގެންނަން އެފްއޭއެމް އިން ވަނީ ނިންމައިފަ އެވެ.