ފާއިތުވި ހަ ދުވަސްތެރޭ ޕީޕީއެމަށް 4000 އަށް ވުރެ ގިނަ މެންބަރުން ސޮއިކޮށްފައިވާ ކަމަށް އެޕާޓީން ބުނެފި އެވެ. މިއަދު ސްޓެލްކޯ މާލަމުގައި ބޭއްވި ރަސްމިއްޔާތެއްގައި 4000 މީހުންގެ ފޯމް ރައީސް އަބްދުﷲ ޔާމީންގެ އަތްޕުޅަށް ވަނީ އަރުވައިފަ އެވެ.
"މަވެސް ޕީޕީއެމް" ނަމުގައި ސްޓެލްކޯގައި މިއަދު ބޭއްވި ފޯމް ހަވާޅުކުރުމުގެ ރަސްމިއްޔާތުގައި ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ، އެކެއް ފެބްރުއަރީގެ އަމުރާއި އެއާ ވިދިގެން ސަރުކާރު ވައްޓާލަން އިދިކޮޅުން ކުރި ކަންކަން ފެއިލްވެފައިވާކަން ފާއިތުވި ހަ ދުވަސްތެރޭގައި އެ ޕާޓީއާ އެތަކެއްހާސް މީހުން ގުޅުމުން ސާބިތުވާ ކަމަށެވެ. އަދި މި ސަރުކާރު ވައްޓައި ނުލެވޭނެ ކަންވެސް އެކަމުން ހާމަވާ ކަމަށް އަދުރޭ ވިދާޅުވި އެވެ.
ޕީޕީއެމުން ބުނީ މިއަދު ހަވާލުކުރި 4000 ފޯމަކީ ރާއްޖޭގެ އެކި ކަންކޮޅުތަކުން ފާއިތުވި ހަފްތާއެއްހާ ދުވަހުގެ ތެރޭގައި އަލަށް ސޮއިކުރި މީހުން ކަމަށެވެ.
"ރާއްޖޭގެ އެކި ކަންކޮޅުތަކުން މިހާ ގިނަ އަދަދެއްގެ މީހުން ޕާޓީއާ ގުޅުނީ ރައީސް ޔާމީން ތަރައްގީއަށް ކުރައްވާ މަސައްކަތްތަކާ ގުޅިގެން،" އަދުރޭ ވިދާޅުވި އެވެ.
ފޯމްތަކާ ހަވާލުވެވަޑައިގެންނެވީ ރައީސް އަބްދުﷲ ޔާމީންގެ ދެކަނބަލުންނެއެވެ.