ރާއްޖޭގެ މިނިވަންކަމާއި ސިޔާދަތަށް ބުރޫއަރާނެ ބޭރުގެ އަސްކަރީ ބާރެއްގެ އެހީ ހޯދުމުގައި ބައިވެރިވެވަޑައިނުގަންނަވާނެ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ. ގާސިމް ވިދާޅުވީ އެއީ އެމަނިކުފާނާއި ޖުމްހޫރީ ޕާޓީގެ ވިސްނުމެއް ނޫން ކަމަށެވެ.
ރާއްޖޭގައި ކުއްލި ނުރައްކަލުގެ ހާލަތު އިއުލާންކުރުމާ ގުޅިގެން އިންޑިއާގެ އަސްކަރީ އެހީތެރިކަމަށް ކުރީގެ ރައީސް މުހައްމަދު ނަޝީދުގެ އެދިވަޑައިގެންފައިވާތީ އެކަމަށް އިޝާރާތްކުރައްވައި ގާސިމް ބުނީ އެފަދަ ކަމަކަށް އެމަނިކުފާނާއި ޖުމްހޫރީ ޕާޓީ ހިއްވަރު ނުދޭނެ ކަމަށެވެ. އަދި އެއީ އޮތް ވިސްނުންފުޅެއް ނޫން ކަމަށާއި، އެއްވެސް ވަރަކަށް ހިއްސާކުރުމެއްނެތި "ބައެއް ބޭފުޅުންގެ އަމިއްލަ ވިސްނުން،" ހާމަކުރާތީ ހިތާމަކުރައްވާ ކަމަށެވެ.
ގާސިމްގެ ވާހަކަފުޅުން ނަޝީދުގެ އެގޮތަށް އެދިވަޑައިގަތީ އިދިކޮޅު ބައެއް ފަރާތްތަކާ އެއްވެސް ވަރަކަށް މަޝްވަރާކުރެއްވުމެއް ނެތި ކަމަށް ބެލެވެ އެވެ.
އިންޑިއާގެ އަސްކަރީ އެހީއަށް ނަޝީދު އެދިވަޑައިގެންފައިވަނީ ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށް، އުއްތަމަ ފަނޑިޔާރާއި ސުޕްރީމް ކޯޓްގެ އިތުރު ފަނޑިޔާރަކާއި ކުރީގެ ރައީސް މައުމޫން ހައްޔަރުކޮށްފައި ވާތީ، އެބޭފުޅުން ސަލާމަތް ކުރުމަމަށް ކަމަށް ވިދާޅުވެ އެވެ. އިންޑިއާގެ އަސްކަރީ ބާރާ އެކު މަންދޫބަކު ފޮނުވައިދިނުމަށްވެސް އެދިވަޑައިގެން ކުރެއްވި އެޓުވީޓުގައި އެމެރިކާގެ ބޭަންކްތައް މެދުވެރިކޮށް ރާއްޖޭގެ ވެރިން ކުރާ މުއާމަލާތްތައް ހުއްޓުވައި ދިނުމަށް އެމެރިކާގައިވެސް ނަޝީދު ވަނީ އެދިވަޑައިގަންނަވާފަ އެވެ.
ގާސިމް ވިދާޅުވީ ބޭރުގެ އަސްކަރިއްޔާއެއްގެ ބާރު ރާއްޖެއަށް ގެނައުމަކީ ގައުމުގެ ސިޔާދަތާއި އިސްތިގުލާލަށް ބުރޫއަރާފާނެ ކަމެއް ކަމަށެވެ.
ބޭރުގެ އަސްކަރީ އެހީތެރިކަމަށް ނަޝީދު އެދިވަޑައިގެންނެވުމުން ސަރުކާރުގެ ބައެއް އިސް ބޭފުޅުން ވެސް ވަނީ ނަޝީދަށް ވަރަށް ބޮޑަށް ފާޑުވިދާޅުވެފަ އެވެ.