މި އަހަރަކީ ގިނަ ޓީވީ ތަރިން ބޮލީވުޑަށް ނިކުންނާނެ އަހަރެކެވެ. މޯނީ ރޯއި އޭނާގެ ފުރަތަމަ ފިލްމުގެ ޝޫޓިން ނިންމާލާފައިވާއިރު، މުރްނާލް ތާކުރް ވަނީ މިދިޔަ ހަފުތާގެ ތެރޭގައި އޭނާގެ ފުރަތަމަ ފިލްމުގެ ޝޫޓިން ފަށާފަ އެވެ. މި ދެ ތަރިންގެ އިތުރުން މަޝްހޫރު ޓީވީ ތަރި ދިޕިކާ ކައްކަރް ވެސް މި އަހަރު ބޮލީވުޑަށް ނިކުންނާނެ އެވެ.
ކަލާސް ޗެނަލުން ދައްކާ އެންމެ މަޝްހޫރު އެއް ޝޯގައި ސިމަރްގެ ރޯލު ކުޅޭ ދިޕިކާ ބޮލީވުޑަށް ނިކުންނަ ފިލްމަކީ ޖޭޕީ ދައްތާގެ "ޕަލްޓަން" އެވެ.
އިންސްޓަގްރާމްގައި އެ ފިލްމުގެ ޕޯސްޓަރު އާންމުކުރަމުން ސިމަރް ވަނީ އޭނާގެ ފުރަތަމަ ފިލްމަކަށް ޖޭޕީ ދައްތާގެ ފިލްމަކުން ފުރުސަތު ލިބުމަކީ އުފަކުރާ ކަމެއް ކަމަށާއި "ޕަލްޓަން" އިން ރޯލެއް ލިބުމަކީ ފަހުރެއް ކަމަށެވެ.
ސުނިލް ޝެޓީ އާއި އަރްޖުން ރާމްޕަލް އަދި ހަރްޝްވަރްދަން ރަނޭ އަދި ލަވް ސިންހަ އާއި އީޝާ ގުޕްތާ ލީޑްރޯލުތަކުން ފެނިގެންދާ މި ފިލްމަކީ 1962 ވަނަ އަހަރު ހިނގި އިންޑޯ ސީނޯ ހަނގުރާމައިގެ އަސްލަކަށް އުފައްދާ ފިލްމެކެވެ.
ދެހާސް އެގާރަވަނަ އަހަރުގެ އެޕްރީލް މަހު ދައްކަން ފެށި "ސަސުރާލް ސިމަރްކާ" ގެ މިހާތަނަށް ދެހާހަށް ވުރެން ގިނަ އެޕިސޯޑް ވަނީ ދައްކާފަ އެވެ. މި ޝޯ އަކީ ހަވަނަ އަށް އެންމެ ގިނަ ދުވަސްވީ އިންޑިއަން ސީރީޒް އެވެ.