ސިވިލް ސާވިސްގެ 73.6 ޕަސެންޓް މުވައްޒަފުންގެ މުސާރަ މިމަހުން ފެށިގެން ބޮޑުވާނެ ކަމަށް ސިވިލް ސާވިސް ކޮމިޝަން (ސީއެސްސީި) އިން ބުނެފި އެވެ.
ސިވިލް ސާވިސް ކޮމިޝަނުގައިި މިއަދު ބޭއްވި ނޫސްވެރިންގެ ބައްދަލުވުމެއްގައި އެކޮމިޝަނުގެ ރައީސް ޑރ. އަލީ ޝަމީމް ވިދާޅުވީ، ސަރުކާރާއި ސީއެސްސީ ގުޅިގެން އެކުލަވާލާފައިވާ ކޮމިޓީ، ވިލަރެސް ކޮމިޓީން ނިންމާފައިވަނީ މުސާރަ ބޮޑު ކުރުމުގެ ބަދަލުގައި އިތުރު އެލަވަންސް ތަކެއް އިތުރު ކުރުމަށް ކަމަށެވެ. އެގޮތަށް ނިންމީ ލިބޭ މުސާރަ އެއްކޮށް ގެއަށް ގެންދަން ލިބޭނެ ގޮތް ފަހި ކުރުމަށް ކަމަށް ޝަމީމް ވިދާޅުވި އެވެ.
ސަރުކާރުން "ސިވިލް ސާވަންޓުން" ގެ މުސާރަ ބޮޑުކުރަން ނިންމާފައިވަނީ މުވައްޒަފުން އެކި ކެޓަގަރީތަކަށް ބަހާލައިގެނެވެ. މި ބައިތަކުގައި ސިވިލް ސާވިސްގެ ޓެކްނިކަލް މަސައްކަތް ކުރާ މުވައްޒަފުންނާއި އެ މަސައްކަތަށް އެހީތެރިކަންދޭ އިދާރީ މުވައްޒަފުންނާއި ސަޕޯޓް ސާވިސް މުވައްޒަފުން ހިމެނެ އެވެ.
ޝަމީމް ވިދާޅުވީ، އެލަވަންސްގެ ގޮތުގައި ތިރީފަންތީގެ މުއައްޒަފުންނަށް މަދުވެގެން މުސާރައިގެ 37 ޕަސެންޓް ބޮޑުވާނެ ކަމަށާއި އެފަންތީގެ މުއައްޒަފުންނަށްދޭ އެލަވަންސް އަކީ ސަޕޯޓިން ކޯ އެލަވަންސް އެކެއް އަދި ދޭއް ކަމަށެވެ. އެންމެ ދަށް ފަންތީގެ މުއައްޒަފުންނަކީ ސަޕޯޓް ސާވިސް މުއައްޒަފުން ކަމަށާއި އެރޭންކް ތަކުގައި މަސައްކަތް ކުރާ މުއައްޒަފުުންނަށް ހުރިހާ އެލަވަންސްތަކާއެކު އެންމެ ދަށްވެގެން 5300ރ. ގެ މުސާރައެއް މިމަހުން ފެށިގެން ލިބިގެންދާނެ ކަމަށް ޝަމީމް ވިދާޅުވި އެވެ.
"މުސާރައިގެ ބަދަލުގައި އެލަވަންސްތަކެއް ތައާރަފް ކުރަން ނިންމެވީ، މުސާރަ ބޮޑު ކޮށްފިނަމަ އޭގެން ކޮންމެސް ވަރެއް ޕެންޝަނަށް ކެނޑޭނެ، ބޭނުމަކީ އެއްވެސް ވަރެއް ނުކެނޑި މިފަހަރު ބޮޑު ކުރާ މިންވަރު ގެއަށް ގެންދަން ލިބުން ފަހި ކުރުން، އެންމެ އެލަވަންސް ބޮޑުވެގެންދާނީ އެންމެ ދަށް ފަންތީގެ މުއައްޒަފުންނަށް، އެއީ 28 ޕަސެންޓާއި 39 ޕަސެންޓާ ދެމެދުގެ އެލަވަންސް އެއް، ގާތްގަނޑަކަށް 1200ރ. އެލަވަންސްއެއް ލިބިގެންދާނެ،" ޝަމީމް ވިދާޅުވިި އެވެ.
ޝަމީމް ވިދާޅުވީ، މެދުފަންތި އަދި މަތީ ފަންތީގެ މުއައްޒަފުންނަށް މުސާރައިގެ 28 ޕަސެންޓާއި ހަމައަށް އެލަވަންސްއެއް ލިބިގެންދާނެ ކަމަށެވެ. ޕަސެންޓޭޖް ބަލަނީ މުސާރައިން ކަމަށްވާތީވެ އެފަރާތްތަކަށް ލިބޭ އެލަވަންސް މަތިވި ނަމަވެސް ޕަސެންޓޭޖްގެ ގޮތުން އެންމެ ބޮޑު އެލަވަންސް އެއް ލިބިގެންދާނީ އެންމެ ދަށް ފަންތީގެ މުއައްޒަފުންނަށް ކަމަށް ޝަމީމް ވިދާޅުވި އެވެ.
ޝަމީމް އިތުރަށް ވިދާޅުވީ، 2012 ވަނަ އަހަރުން ފެށިގެން މިހާތަނަށް ބޮޑު ނުވާ ހުރިހާ މުއައްޒަފުންގެ މުސާރަ މިފަހަރު ބޮޑުވެގެންދާނެ ކަމަށެވެ.
މުވައްޒަފުންގެ މުސާރަ ބޮޑު ކުރުމަށް ސަރުކާރުން ވަނީ މި އަހަރުގެ ބަޖެޓުގައި 234 މިލިއަން ރުފިޔާ ހިމަނާފަ އެވެ. އަދި އެންމެ ފަހުން މުސާރަ ބޮޑުކޮށްފައިވަނީ 2009 ވަނަ އަހަރު އެވެ. ސަރުކާރު މުވައްޒަފުންގެ ގޮތުގައި ގާތްގަނޑަކަށް 23،000 މީހުން މަސައްކަތް ކުރެ އެވެ.