ސުޕްރީމް ކޯޓަށާއި ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަށް ފޮނުވާ ސިޓީތަކާއި ލިޔުންތައް ސުޕްރީމް ކޯޓުގެ ފަނޑިޔާރު އަބްދުﷲ އަރީފަށް އެޑްރެސް ކުރުމަށް ސުޕްރީމް ކޯޓުން ހަމަޖައްސައިފި އެވެ.
ސުޕްރީމް ކޯޓުން މައަދު ނެރުނު ސާކިއުލާގައި ވަނީ، ސުޕްރީމް ކޯޓުގެ ފަނޑިޔާރުންގެ މަޖިލިސް ބަލަހައްޓާނީ އުއްތަމަ ފަނޑިޔާރު ކަމަށާއި އުއްތަމަ ފަނޑިޔާރު ނެތް ހާލަތެއްފައި އެމަޖިލީހުގެ ރިޔާސަތު ބަލަހައްޓާނީ އެންމެ ސީނިއާ ފަނޑިޔާރު ކަމަށް ސުޕްރީމް ކޯޓުގެ ފަނޑިޔާރުންގެ މަޖިލީހުގެ ގަވާއިދުގައި ބުނެފައިވާ ކަމަށެވެ. އުއްތަމަ ފަނޑިޔާރު މިވަގުތު ސަސްޕެންޑް ކޮށްފައި ހުރުމުން، މިއަދުން ފެށިގެން ސުޕްރީމް ކޯޓަށާއި ޑީޖޭއޭ އަށް ފޮނުވާ ސިޓީތަކާއި ލިޔުންތައް އެޑްރެސް ކުރަން ވާނީ ފަނޑިޔާރު އަރީފަށް ކަމަށް އެ ކޯޓުގެ ފަނޑިޔާރުންގެ މަޖިލީހުން ނިންމާފައިވާ ކަމަށް ސާކިއުލާގައި ވެ އެވެ.
ސުޕްރީމް ކޯޓުން މިގޮތަށް ސާކިއުލާއެއް ނެރެފައި މިވަނީ، އުއްތަމަ ފަނޑިޔާރު އަބްދުﷲ ސައީދު ހައްޔަރުކޮށް، ސަސްޕެންޑް ކޮށްފައިވާތީ އެވެ. އުއްތަމަ ފަނޑިޔާރާއެކު ފަނޑިޔާރު އަލީ ހަމީދުވެސް ވަނީ ހައްޔަރުކޮށްފަ އެވެ. ފަނޑިޔާރު އަލީ ހަމީދުވެސް ވަނީ ސަސްޕެންޑް ކޮށްފަ އެވެ.
މިވަގުތު ސުޕްރީމް ކޯޓުގެ ފަނޑިޔާރުންގެ ގޮތުގައި ތިއްބެވީ ފަނޑިޔާރު އަރީފާއި ފަނޑިޔާރު އާދަމް މުހައްމަދު އަދި ފަނޑިޔާރު ޑރ. އަހުމަދު އަބްދުﷲ ދީދީ އެވެ.
އުއްތަމަ ފަނޑިޔާރު އަބްދުﷲ ސައީދުގެ މައްޗަށް ކުރެވިފައިވާ ތުހުމަތުތަކަކީ، ވަކި ބަޔަކު ބޭނުންވާ ގޮތަށް ހުކުމް ކުރުމަށް ރިޝްވަތުގެ ފައިސާ ނެގުމާއި ބަޔަކާ ބައިވެރިވެގެން ސަރުކާރު ވައްޓާލަން އުޅުން ފަދަ ތުހުމަތުތަކެކެވެ. އެ މައްސަލައިގައި އުއްތަމަ ފަނޑިޔާރާ އެކު ހައްޔަރުކުރި، ފަނޑިޔާރު އަލީ ހަމީދުގެ މައްޗަށް ވެސް ކުރަނީ ހަމަ މިފަދަ ތުހުމަތުތަކެކެވެ.
އެބޭފުޅުން ހައްޔަރުކޮށްގެން ދޫނިދުއަށް ގެންދިޔައީ، ގައުމީ ކުއްލި ނުރައްކަލުގެ ހާލަތު އިއުލާން ކުރުމަށް ފަހު އެބޭފުޅުންނަށް ލިބިފައިވާ އިމްތިޔާޒުތަކުގެ ގާނޫނާއި އެކޯޓްގެ ބާރުތައް ހިފެހެއްޓުމަށް ފަހު ސިފައިންނާއި ފުލުހުންގެ ބަޔަކު ފާރުމަތިން ސުޕްރީމް ކޯޓްގެ ތެރެއަށް ވަދެ ގަދަކަމުން އެވެ. އެބޭފުޅުންގެ ވަކީލުން ވިދާޅުވެފައި ވަނީ އުއްތަމަ ފަނޑިޔާރު ހައްޔަރު ކުރީ ބިން މައްޗަށް ވައްޓާލައި ދަމައި ކޫއްތައިގެން ކަމަށެވެ. އަދި ސުޕްރީމް ކޯޓްގެ ތެރެއަށް ވަދެގަތް ސިފައިންނާއި ފުލުހުންނަށް 15 ދުވަހަށް ޖަލަށްލާން ހުކުމް ކޮށްފައިވާ ކަމަށް ވެސް ވަކީލުން ވިދާޅުވެ އެވެ.