ހަރުކަށި ފިކުރު ފަތުރާ ޖަމާއަތެއްގެ ގޮތުގައި ބައެއް ގައުމުތަކުން ދެކޭ އިސްލާމިކް ސްޓޭޓް (އައިއެސް)ގެ ފަރާތުން ރާއްޖޭގައި އިސްކޮށް މަސައްކަތް ކުރާ ކަމަށް ތުހުމަތު ކުރެވޭ ވ. ދެލްވައްތަ، ހޫދު މުހައްމަދު ޒާހިރު ބަންދުން ދޫކޮށްލާފައިވަނީ ގޯސްކޮށް ކަމަށް ހައި ކޯޓުން ކަނޑައަޅައިފި އެވެ.
އެމެރިކާގެ އެފްބީއައި އާއި ޔޫރަޕްގެ ތަހުގީގީ އިދާރާތައް ގުޅިގެން ހިންގި އޮޕަރޭޝަނުގައި ޖެނުއަރީ 6، 2022 ގައި ދިވެހި ފުލުހުން ހައްޔަރުކުރި އުމުރުން 32 އަހަރުގެ ހޫދަށް ފަސް ދައުވާއެއް ދައުލަތުން ކޮށްފައިވެ އެވެ. އެ ދައުވާތައް ސާބިތުވެއްޖެ ނަމަ 53 އަހަރުގެ ހުކުމެއް އަންނާނެ އެވެ.
ހޫދުގެ މައްޗަށް އުފުލާފައިވާ ދައުވާތައް
- އިންޓަނެޓް މެދުވެރިކޮށް ޓެރަރިޒަމްގެ އަމަލެއް ކުރުމަށް ހިތްވަރުދިނުމުގެ ކުށުގެ ދައުވާ
- އިންޓަނެޓް މެދުވެރިކޮށް ޓެރަރިސްޓް ޖަމާއަތެއްގެ ލިޔެކިޔުންތައް ފެތުރުން
- ޓެރަރިސްޓް ޖަމާއަތެއްގެ މެންބަރަކަށްވުން
- ޓެރަރިސްޓް ޖަމާއަތަކަށް ތާއީދުކުރުން
- ޓެރަރިސްޓް ޖަމާއަތަކަށް ތާއީދުކުރާ މީހެއްކަން ދޭހަވާ ފަދަ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުން
ހޫދު ދޫކޮށްލި މައްސަލައިގައި ހައިކޯޓުގެ ހުކުމްގައި ބުނީ ހޫދުގެ ޝަރީއަތް ނިމެންދެން ބަންދުކޮށްފައިވަނީ ޓެރަރިޒަމްގެ ގާނޫނުގެ ދަށުން ކަމަށެވެ. ނަމަވެސް ބަންދު މުރާޖައާ ކޮށްފައިވަނީ ޖިނާއީ އިޖުރާއަތުގެ ގާނޫނުގެ ދަށުންނެވެ. އެހެންކަމުން ހޫދުގެ ބަންދު މުރާޖައާ ކޮށްފައިވަނީ ރަނގަޅު އިޖުރާއަތެއްގެ ތެރެއިން ނޫން ކަމަށް ހައި ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ހުކުމްކުރި އެވެ.
ހޫދަކީ 2015 ވަނަ އަހަރުން ފެށިގެން އައިސިސްގެ ޕްރޮޕަގެންޑާ ފަތުރަމުން ދިޔަ މީހެއް ކަމަށާއި އެކަން ކޮށްފައިވަނީ ޓެލެގްރާމާއި އެ ނޫންވެސް އެންކްރިޕްޓް ކޮށްފައިވާ މެސެޖިން ޕްލެޓްފޯމްތަކުގައި ކަމަށް ފުލުހުން ބުނެފައިވެ އެވެ. އެކަމަކު ކޯޓުގައި ހޫދު ބުނީ އޭނާ އަކީ "ކޮމްޕިއުޓަ ސައިންސް އެނގޭ މީހެއް ނޫން" ކަމަށެވެ.