ކުރީގެ ރައީސް މައުމޫން އަބުދުލްގައްޔޫމާއި މުހައްމަދު ނަޝީދާއި އަދާލަތު ޕާޓީގެ ރައީސް އިމްރާން އަބުދުﷲ އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމަކީ ގައުމުގެ "ގައްދާރުން" ކަމަށް ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ (އަދުރޭ) ވިދާޅުއްޖެ އެވެ.
ޕީޕީއެމުން މިރޭ ބޭއްވި ނޫސްވެރިންގެ ބައްދަލުވުމެއްގައި އަދުރޭ ވިދާޅުވީ، މައުމޫނާއި ނަޝީދާއި އިމްރާން އަދި ގާސިމަކީ ފަހުގެ ތާރީހެއްގައި މިގައުމުން ދެކުނު އެންމެ ބޮޑު ހަތަރު ގައްދާރުން ކަމަށެވެ. އަދި އޭގެ ތެރޭގައި ޖުމްހޫރީ ޕާޓީގެ ޑެޕިއުޓީ ލީޑަރު އަބުދުﷲ ރިޔާޒާއި މިސަރުކާރުގެ ކުރީގެ ނައިބް ރައީސް އަހުމަދު ޖަމީލް އަދި ކުރީގެ ހޯމް މިނިސްޓަރު އުމަރު ނަސީރުވެސް ހިމެނޭ ކަމަށާއި މިހާރު ވަނީ އެބޭފުޅުންގެ ޓީމެއްވެސް ހަމަވެފައި ކަމަށް އަދުރޭ ވިދާޅުވި އެވެ.
"ރައީސް މައުމޫނަކީ ގައްދާރެއް، އަންނި އަކީ ގައްދާރެއް، ޝެއިޙް އިމްރާނަކީ ގައްދާރެއް، ގާސިމް އިބްރާހީމަކީ ގައްދާރެއް، އޭގެ ތެރޭގައި އިތުރުވެގެން މިދަނީ ރިޔާޒަކާ ޖަމީލާ އުމަރު، މިހާރު މުޅި ޓީމަކަށް މިކަން ވެއްޖެ،" އަދުރޭ ވިދާޅުވި އެވެ.
އަދުރޭ ވިދާޅުވީ، އިދިކޮޅު ފަރާތްތަކުން ވެރިކަމަށް އަންނަން ނުކުރާނެ އެއްވެސް ކަމެއް ހަމަ ނޯންނާނެ ކަމަށާއި ނަމަވެސް އިދިކޮޅުން ރޭވި ބަޣާވާތް ކާމިޔާބު ނުވި ކަމަށެވެ. އަދި އިދިކޮޅު އިއްތިހާދުވެސް ވަނި ބައިބައިވެފައި ކަމަށާއި ޖޭޕީން އިއްތިހާދުން މާދަމާ ވަކިވާނެ ކަމަށް މައުލޫމާތު ލިބިފައިވާ ކަމަށް އަދުރޭ ވިދާޅުވި އެވެ.
"އަމިއްލަ ގޭގައި ލިޔެ ހުކުމް އިއްވި ބަޣާވާތެއް ކާމިޔާބެއް ނުވި، އަމިއްލަ ފައިސާ ހަރަދު ކޮށްގެން ވެރިކަމަށް އަންނަ މިހާތަނަށް ކުރި މަސައްކަތް ވަނީ ކާމިޔާބު ނުވެފަ، އެކަން އެހެންވީ އިހުލާސްތެރި ކަމެއް ނެތީމަ، ތެދުވެރިކަމެއް ނެތީމަ، އިދިކޮޅު ފަރާތްތަކުން ވެރިކަމަށް އަންނަން ނުކުރާނެ އެއްވެސް ކަމެއް ހަމަ ނޯންނާނެ، ކަން ދިމާކުރި ގޮތުން އެމީހުންގެ ބަޣާވާތެއްވެސް ކާމިޔާބެއް ނުވި، އަދި އިއްތިހާދުވެސް ވަނި ބައިބައިވެފަ، އެމްޑީޕީން އަމިއްލަ ކެނޑިޑޭޓަކު ނެއްލަން ނިންމާފައިވަނީ، ޖޭޕީން މާދަމާ އިއްތިހާދުން ވަކިވާން ނިންމާފައިވަނީ،" އަދުރޭ ވިދާޅުވި އެވެ.
އަދުރޭ ވިދާޅުވީ، އިދިކޮޅު އެއްވެސް ޕާޓީއެއްގައި ލީޑަރެއް ނެތް ކަމަށާއި ގާނޫނީ ގޮތުން އެބޭފުޅުންނަކީ އެޕާޓީ ތަކުގެ ލީޑަރުން ނޫން ކަމަށެވެ. އަދި ވިދާޅުވީ، ޕީޕީއެމަކީ އަބަދުވެސް މަޝްވަރާތަކަށް ތާއީދު ކުރާ ބައެއް ކަމަށާއި އެފުރުސަތު ކޮންމެ ފަރާތަކަށްވެސް އޮންނާނެ ކަމަށެވެ. ނަމަވެސް ގައުމަށް ގައްދާރުވެފައި ތިބި މީހުންނާއެކު މަޝްވަރާއެއް ނުކުރާނެ ކަމަށާއި ޕީޕީއެމަކީ ގައުމަށް ގައްދާރުވެފައިވާ މީހުންނާއެކު މަޝްވަރާ ކުރާ ޕާޓީއެއް ނޫން ކަމަށް އަދުރޭ ވިދާޅުވި އެވެ.
އަދުރޭ އިތުރަށް ވިދާޅުވީ، މިމަހުގެ 16 ވަނަ ދުވަހު އިދިކޮޅު ފަރާތްތަކުން މީހުން މާލެ ގެނެސް ބޮޑު ހަމަނުޖެހުމެއް ހިންގަން މަސައްކަތް ކުރާ ކަމަށާއި އެފަދަ އަމަލެއް ނުކުރުމަށް ގޮވާލާ ކަމަށެވެ. އަދި ގާނޫނާ ހިލާފް އަމަލުތައް ކުރާ ފަރާތްތަކާމެެދު ފިޔަވަޅު އެޅުމަށް ސަރުކާރު އޮތީ ވަރަށް ސާބިތުކަމާއެކު ކަމަށް އަދުރޭ ވިދާޅުވި އެވެ.
"ފެބްރުއަރީ 16 ވަނަ ދުވަހު މާލެ ގެންނަން މަސައްކަތް އެބަ ކުރޭ، ބޮޑު ހަމަނުޖެހުމެއް ހިންގަން، އިދިކޮޅު ފަރާތްތަކުން މިފަހަރުވެސް އެރާވަނީ ގަސްތުގައި ރައްޔިތުންނަށް ލަނޑެއް ދޭންވެގެން، އެމީހުންގެ ރޭވުމުގައި އެއްވެސް ގޮތަކަށް ނުޖެހޭތި، އަނެެއްކާވެސް މިއުޅެނީ ރައްޔިތުން ހަލާކު ކޮށްލަން ވެގެން އުޅުއްވަނީ، ފެބްރުއަރީ 8 ގައި ގައުމަށް ދިން ކަހަލަ ބޮޑު ގެއްލުމެއް އަނެއްކާވެސް ދޭން އެއުޅެނީ،" އަދުރޭ ވިދާޅުވި އެވެ.
ނޫސްވެެރިންގެ ބައްދަލުވުމުގައި ވިލުފުށީ ދާއިރާގެ މެންބަރު ރިޔާޒު ރަޝީދު ވިދާޅުވީ، ސަރުކާރަކާއި ދެކޮޅަށް ނިކުމެގެން ކުރެވޭނެ ކަމެއް ނޯންނާނެ ކަމަށާއި ގާނޫނީ އިމުގެ ތެރޭގައި އޮތް ސަރުކާރެއް ވައްޓާލަން ނިކުމެއްޖެ ނަމަ ކުރެވެން ހުރި ހުރިހާ ކަމެއް ކުރާނެ ކަމަށެވެ. އަދި އެކަން ކުރުމަށް ސަލާމަތީ ބާރުތަކުންވެސް އޮތީ ތައްޔާރަށް ކަމަށާއި އެކަަން ވިޔަ ނުދޭނެ ކަމަށް ރިޔާޒު ވިދާޅުވި އެވެ.
ޕީޕީއެމްގެ ޕީޖީ ގުރޫޕްގެ ލީޑަރު އަހުމަދު ނިހާނު ހުސެން މަނިކު ވިދާޅުވީ، އިދިކޮޅުގައި އެއްވެސް ފެންވަރެއް ނެތް ކަމަށާއި މިމަހު 16 ދުވަހުވެސް އިދިކޮޅަށް އެއްވެސް ކަމެއް ނުކުރެވޭނެ ކަމަށެވެ. އަދި ވިދާޅުވި، އިދިކޮޅު ފަރާތްތަކުން ވެރިކަމާއި ގާތަށްވެސް ނާދެވޭނެ ކަމަށާއި މިހާތަނަށް އިދިކޮޅުން ރޭވި ހުރިހާ ކަމެއް ވަނީ ފެއިލްވެފައި ކަމަށެވެ.