ކުރީގެ ރައީސް މައުމޫން އަބުދުލްގައްޔޫމްގެ ކާރު ޑްރައިވަރު ޕޮނިއިނީ ސުދާގަރަށް ގާނޫނީ ވަކީލެއްގެ ފުރުސަތު ނުދީ ހިފަހައްޓާފައިވާ ކަމަށް އޭނާގެ ވަކީލުން ވިދާޅުވެއްޖެ އެވެ.
ސުދާގަރުގެ ގާނޫނީ ވަކީލް މުހައްމަދު ފައްވާޒު ނެރުނު ބަޔާނުގައި ބުނެފައިވަނީ،، ޕޮއިނީގެ މައްޗަށް ތުހުމަތުކޮށްފައިވަނީ ގާނޫނާ ހިލާފަށް ރާއްޖޭގައި އުފެދިފައިވާ ގާނޫނީ ވެރިކަން ވައްޓާލުމަށް ރައްޔިތުންގެ މަޖިލީހުގެ މެންބަރުންތަކަކަށް ރިޝްވަތުގެ ގޮތުގައި ފައިސާދިން މައްސަލަ އާއި އިތުރު މެންބަރުންތަކަކަށް ރިޝްވަތުގެ ގޮތުގައި ފައިސާ ދޭން އުޅުނު ކަމުގެ ތުހުމަތު ކަމަށެވެ. އޭގެ އިތުރުން، ޓެރަރިޒަމް މަނާކުރުމުގެ ގާނޫނުގެ ދަށުން ޓެރަރިޒަމްގެ އަމަލެއް ހިންގަން އުޅުމުގެ ކުށުގެ ތުހުމަތުވެސް ކޮށްފައިވާ ކަމަށް ފައްވާޒު ވިދާޅުވި އެވެ.
ފައްވާޒު ވިދާޅުވީ، ޕޮނިއާ ސުދާގަރުގެ ގާނޫނީ ވަކީލު، އެ މައްސަލައިގެ ތުހުމަތުކުރެވޭ އެހެން މީހެއްގެ ވަކީލެއްގެ ގޮތުގައި އައްޔަނުވެފައިވާތީ އެނާގެ ވަކީލުކަމުން ވަނީ ތަނާޒުލުވެފައި ކަމަށާއި ފަހުން ޕޮއިނީގެ ގާނޫނީ ވަކީލަށް ވުމަށް ހުށަހެޅުމުން އެ ފުރުސަތު ބޭނުން ނުވާކަމަށް ޕޮއިނީ ބުނެފައިވާތީވެ، ވަކީލެއްގެ ގޮތުގައި އައްޔަނު ނުވެވޭނެ ކަމަށް ފުލުހުން ބުނެފައިވާ ބަޔާނުގައި ވެއެވެ.
"ޕޮނިއާ ސުދާގަރު ހައްޔަރުކުރުމަށްފަހު، އޭނާއާ ބައްދަލުކުރުމަށް ގާނޫނީ ވަކީލު ދިޔައިރު، އެރޭގެ ދަންވަރުގެ ވަގުތެއްގައި، ޕޮނިއާ ސުދާގަރު ބަންދުކޮށްފައިވާ ގޮޅިންނެރެ، ތަހުގީގަށް ސުވާލުކޮށްފައިވާކަމަށް އޭނާ ވަނީ ވަކީލަށް މައުލޫމާތު ދީފަ، އޭނާ ބުނެފައިވަނީ އޭނާ ވަކީލެއްގެ ފުރުސަތު ބޭނުންވާކަމަށް ބުނުމުން، ތަހުގީގު ކުރިއަށް ގެންދިއުމުގައި ވަކީލަކު ހުރުން މުހިންމު ނޫންކަމުގައި ތަހުގީގުކުރި ފުލުހުން ބުނެފައިވާ ކަމަށް،" ބަޔާނުގައި ވެއެވެ.
ބަޔާނުގައި ވަނީ، ސުދާގަރު ހައްޔަރުކޮށް ގާނޫނީ ވަކީލެއްގެ ފުރުސަތު ނުދީ ހިފަހައްޓާފައިވަނީ އޭނާގެ ފަރާތުން ވަކި ގޮތަކަށް ބަޔާން ހޯދައި، ހިނގަމުންދާ މައްސަލައެއްގެ ތަހުގީގު ވަކި ދިމާލަކަށް އަނބުރާލުމުގެ ބޭނުމުގައި ކަމަށެވެ. އަދި ޕޮނިއާ ހައްޔަރުކުރެވުނު ވަގުތުން ފެށިގެން އޭނާގެ މައްޗަށް ތުހުމަތުކުރެވޭ މައްސަލަ ތަހުގީގު ކުރުމުގައި އަދި އޭނާގެ ހައްގުތައް ލިބިދިނުމުގައި ފުލުހުން ހަގީގަތް އޮޅުވާލަމުންދާ ކަމަށެވެ. އަދި އޭނާއަށް ލިބިގެންވާ ގާނޫނީ ވަކީލެއްގެ އެހީތެރިކަން ލިބިގަތުމުގެ ފުރުސަތަށް ހުރަސް އަޅަމުންދިއުމަކީ ނުހަނު ކަންބޮޑުވާ ކަމެއް ކަމަށް ބަޔާނުގައި ވެއެވެ.
"ގާނޫނީ ވަކީލުންގެ އެހީތެރިކަން ދިނުމުގެ ދާއިރާއަކީ ހަމައެކަނި ތަހުގީގު ހިންގުން ކަމުގައިނުވާއިރު، މައްސަލައެއްގެ ތަހުގީގުކޮށް ގާނޫނީ ވަކީލަކު ބޭނުންނުވާކަމަށް ބުނެފައިވުމަކީ ވަކީލެއްގެ އެހީތެރިކަން ލިބުމުގެ ހައްގު އެއްކޮށް ގެއްލިގެން ދިއުމެއް ނޫން، އެއީ މީގެ ކުރިން ޢަމަލުކުރާ އުސޫލެއްވެސް ނޫން،" ބަޔާނުގައި ވެއެވެ.
ބަޔާނުގައި އިތުރަށް ވަނީ، ކޯޓުން ޕޮނިއާ 15 ދުވަހުގެ މުއްދަތަށް ބަންދުކުރަން އަމުރުކުރުމުން، ބަންދުކުރެވޭ އެހެން މީހުންނާ ހިލާފަށް އޭނާ ބަންދުކޮށްފައިވަނީ ވިލިމާލޭގައި ހުންނަ ފުލުހުންގެ މަރުކަޒުގައި ކަމަށެވެ.