ޒުވާން ދެ ތަރިން ކަމަށްވާ ރަންބީރު ކަޕޫރާއި އާލިއާ ބަޓް އެކުގައި ކުޅޭ ފުރަތަމަ ފިލްމު "ބްރަހަމަޝްތުރާ" ގެ ޝޫޓިން އަށް ބަލްގޭރިއާ އަށް ގޮސްފި އެވެ. އާލިއާ އާއި ރަންބީރާ އެކު މި ފިލްމުގައި ނުބައިބައި ރޯލަކުން ފެނިގެންދާ މޯނީ ރޯއި ވެސް ވަނީ ބަލްގޭރިއާ އަށް ގޮސްފަ އެވެ.
ދެހާސް ތޭރަ ވަނަ އަހަރު ނިކުތް "ޔޭ ޖަވާނީ ހޭ ދިވާނީ" ގެ ފަހުން އަޔާން މުކަރްޖީ ޑައިރެކްޓްކުރާ "ބްރަހަމަޝްތުރާ" އަކީ ތިން ފިލްމުގެ ސީރީޒްއެއްގެ ގޮތުގައި އުފައްދާ ފެންޓަސީ އެޑްވެންޗާ އެކެވެ. މި ފިލްމަކީ ކަރަން ޖޯހަރުގެ ޕްރޮޑަކްޝަން ކުންފުނި ދަރްމާ ޕްރޮޑަކްޝަނުން އުފައްދާ އެންމެ އަގުބޮޑު ފިލްމެވެ.
މި ފިލްމުގެ މުހިންމު މަންޒަރުތަކެއް ބަލްގޭރިއާގައި ނެގުމަށް ހަމަޖެހިފައިވާއިރު، އާލިއާ ބަލްގޭރިއާ އަށް ގޮސްފައިވަނީ އާދިއްތަ ދުވަހު އެވެ. އާލިއާ އަށް ވުރެ ކުރިން ރަންބީރު ވަނީ އެ ގައުމަށް ގޮސްފަ އެވެ.
އާލިއާ މި ފިލްމުގެ ޝޫޓިން އަށް ދިޔައިރު، އޭނާ އައީ މުމްބައިގައި ރަންވީރު ސިންގާ އެކު "ގަލީ ބޯއި" ގެ މަންޒަރުތައް ނަގަމުންނެވެ. އަދި ރަންބީރު ވަނީ މިފަހުން ސަންޖޭ ދަތުގެ ހަޔާތުގެ މައްޗަށް ކުޅެމުން އައި ފިލްމުގެ ޝޫޓިން ނިންމާލާފަ އެވެ.
އަޔާން މި ފިލްމަށް ތައްޔާރުވުމުގެ މަސައްކަތް ކުރަމުން އަންނަތާ ދެ އަހަރުވެއްޖެ އެވެ. އަންނަ އަހަރުގެ އޮގަސްޓް މަހުގެ 15 ވަނަ ދުވަހު ރިލީޒްކުރުމަށް ހަމަޖެހިފައިވާ މި ފިލްމުގެ މުހިންމު ރޯލަކުން މެގަސްޓާ އަމީތާބް ބައްޗަން ވެސް ފެނިގެންދާނެ އެވެ.