މި ހަފްތާގައި ސޯޝަލް މީޑިއާއަށް ބޮޑު ތޫފާނެއް ގެނައީ މަލަޔާލަމް ޒުވާން ބަތަލާ ޕްރިޔާ ޕްރަކާޝް ވަރިއާގެ ކަތި ނަރަޒުންނެވެ. ޕްރިޔާގެ ކަތި ނަޒަރުން ފިރިހެން ކުއްޖަކު ރަކިކޮށްލާ މަންޒަރު ފެނިގެންދާ ވީޑީއޯ ވަނީ މުޅި ސޯޝަލް މީޑިއާ ފްލަޑްކޮށްލާފަ އެވެ.
"އޮރޫ އަދާރް ލަވް" ކިޔާ ފިލްމެއްގެ ލަވައެއްގެ މަންޒަރެއްގައި ފެނި، އެތަކެއް ޒުވާނުންގެ ހިތްތަކާ ޕްރިޔާ ކުޅެލާފައިވާއިރު، އޭނާ ވަނީ މަދު ވަގުތުކޮޅެއްގެ ތެރޭގައި ދުނިޔޭގައި ވެސް މަޝްހޫރުވެގެން ގޮސްފަ އެވެ.
ކަތި ނަޒަރަކަށް ލިބުނު ބޮޑު މަގުބޫލު ކަމާއެކު ޕްރިޔާ އެންމެ ފަހުން މިވަނީ ނޫސްތަކަށް ވާހަކަދައްކާފަ އެވެ.
"ވިއޮން" އަށް ދިން އިންޓަވިއުއެއްގައި ޕްރިޔާ ވަނީ އޭނާގެ ކަތި ނަޒަރުގެ ޖާދޫގައި މުޅި އިންޑިއާ ޖެހި، އޭނާގެ ބޮޑު ތަރިއަކަށްވެ މުޅި ދިރިއުޅުން ބަދަލުވެފައިވާ ކަމަށް އޭނާއަށް ވެސް ގަބޫލު ކުރެއްވިއްޖެ ކަމަށެވެ.
އިތުރަށް ޕްރިޔާ ބުނީ އޭނާގެ އެންމެ ބޮޑު ހުވަފެނަކީ ބޮލީވުޑްގައި މަސައްކަތްކުރުން ކަމަށާއި ސުޕަސްޓާ ޝާހްރުކް ޚާން އާއި ޒުވާން އެކްޓަރު ރަންވީރު ސިންގް އަދި ސިދާތް މަލްހޯތުރާއަކީ އޭނާ އަށް އެންމެ ކަމުދާ ތަރިން ކަމަށެވެ. ޝާހްރުކާއި ރަންވީރާއެކު ފިލްމެއް ކުޅެން ބޭނުންވާ ކަމަށެވެ.
ބޮލީވުޑްގެ ފިލްމަކުން ރަނގަޅު ފުރުސަތެއް ލިބިއްޖެނަމަ ހިންދީ ފިލްމު ކުޅޭނެ ކަމަށް ވެސް ޕްރިޔާ ބުންޏެވެ.
ޕްރިޔާ ވަނީ އެންމެ ރެޔަކުން ލިބުނު ބޮޑު މަޝްހޫރުކަން ބަލައިގަންނާނެ ގޮތެއް އަދިވެސް އޭނާ އަށް ނުވިސްނޭ ކަމަށް ވަނީ ބުނެފަ އެވެ.
"ކުއްލިއަކަށް އެހާ މަޝްހޫރުވުމުން ގެއިން ވެސް ނުކުންނަށް މިހާރު ބިރު ގަނޭ،" ޕްރިޔާ ބުނެފައިވެ އެވެ.
މި ފިލްމުގެ ލަވައިން ޕްރިޔާއަށް ހުއްޓުނު ބޮޑު ސަމާލުކަމާއެކު އެއް ދުވަހުގެ ތެރޭގައި އޭނާ އިންސްޓަގްރާމުގައި ފޮލޯކުރާ މީހުންގެ އަދަދު ވަނީ 2.9 މިލިއަނަށް އަރާފަ އެވެ. އިއްޔެ އިންސްޓަގްރާމުން ވަނީ ޕްރިޔާގެ އެކައުންޓް ވެރިފައި ވެސް ކޮށްދީފަ އެވެ. މިއީ އިންސްޓަގްރާމުގައި މީގެ ކުރިން އެންމެ ގިނަ ފޮލޯވަރުން ތިބި ފުޓްބޯޅަ ތަރި ކްރިސްޓިއާނޯ ރޮނާލްޑޯ އާއި އެމެރިކަން ރިއަލިޓީ ތަރި ކައިލީ ޖެނާ އަށް ވުރެން ގިނަ އަދަދެކެވެ.
ހައި ސްކޫލް ލަވް ސްޓޯރީއެއްގެ މައްޗަށް އުފައްދާފައިވާ މި ފިލްމަކީ ޕްރިޔާ ކުޅެފައިވާ ފުރަތަމަ ފިލްމެވެ.