ސަރުކާރުގެ މައި ކަރަންޓު ކުންފުނި، ސްޓެލްކޯގެ ސަބް ސްޓޭޝަނެއްގެ ޑިސްޓްރިބިއުޝަން ފޮއްޓެއްގައި ރޭ އަލިފާން ރޯކޮށްލާފައި ވަނީ އިދިކޮޅުގެ ދެ ޒުވާނުން ކަމަށް ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
ރައީސް މިހެން ވިދާޅުވިއިރު ރޭގެ ހާދިސާއާ ގުޅިގެން ފުލުހުން ވަނީ 34 އަހަރާއި 28 އަހަރުގެ ދެ ފިރިހެނަކު ހައްޔަރުކޮށްފަ އެވެ. ނަމަވެސް އެކަމާ ގުޅޭ އިތުރު ތަފްސީލެއް ފުލުހުން ނުދެ އެވެ.
ނަމަވެސް މިރޭ ބޭއްވި ޕީޕީއެމްގެ ޒުވާނުންގެ އިވެންޓުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ އިދިކޮޅު ޕާޓީތަކުގައި މަސައްކަތް ކުރަނީ ފަނާ ކުރެނިވި ފިކުރުގެ ބައެއް ކަމަށާއި އެކަންކަމާ މެދު ޒުވާނުން ވިސްނަން ޖެހޭ ކަމަށެވެ. އެގޮތުން ބާ އިންޖީނުގޭ ކައިރިން ރޭ ސަބް ސްޓޭޝަނެއްގައި ރޯކޮށްލީ އިދިކޮޅު ދެ ޒުވާނުން ކަމަށާއި އޭގެ ސަބަބުން 59 ގޭބިސީން ކަރަންޓު ކެނޑުން ކަމަށެވެ.
"މީގެ ގެއްލުންވީ ކޮން ބަޔަކަށް ކުޑަކުދިން ނިދާފައި ތިބެ ހޭލާނީ، ފާހަނާގައި ފެންވަރަން ހުރި ފެން ނުލިބޭނީ، އެއިން ދެރަވާނީ ރައީސް ޔާމީންއެއް ނޫނޭ، ރައްޔިތުން މިހާލުގައި އުޅޭތީ ރައީސް ޔާމީން ދެރަވޭ، ނަމަވެސް މިއީ ގެއްލުންދިނުންތަކުން ކާކަށް ދެރަވާނީ، ހަމައެކަނި ރައްޔިތުންނަށް،" ރައީސް ޔާމީން ވިދާޅުވި އެވެ.
އޭގެ އިތުރުން މިދިޔަ އަހަރު ގދ. ތިނަދޫގެ އިންޖީނުގޭގައި ކަރަންޓު ނެތި ދުވަސްތަކެއް ހޭދަ ކުރަން ޖެހުން އިރު އެއީ ވެސް އިދިކޮޅު ފަރާތްތަކުން ޒުވާނުންތަކެއް ލައްވާ ކުރުވި ކަމެއް ކަމަށް ވެސް ރައީސް ވިދާޅުވި އެވެ.
"މި ހަމަ ނުޖެހުމާ ގުޅިގެން އަބަދުބަދު ވެސް ތައްޔާރަށް އެ ތިބީ، މާލޭގައި އަބަދުވެސް ދަނީ ޕެޓްރޯލް ކުރަމުން، ދެން ނޭނގެ، ކޮން އިރަކުން ކަމެއް ފެންކަނޑާލާނީ، ކޮން އިރަކުން ކަމެއް ސްޓޭލްކޯގައި ރޯކޮށްލާނީ، އިސް ދިސް ވަޓް ވީ ޑިޒާވް،" ރައީސް ވިދާޅުވި އެވެ.
ރައީސް ވިދާޅުވީ މިހާރު ހިނގަމުންދާ ހަމަނުޖެހުންތަކުގެ ސަބަބުން ސަލާމަތީ ބާރުތަކަށް ކަނޑައެޅިފައިވާ ބަޖެޓުގެ އިތުރުން ގިނަ އަދަދަކަށް ފައިސާ ހަރަދު ކުރަން ޖެހިފައިވާ ކަމަށެވެ. އެގޮތުން އެ ފައިސާގެ އަދަދުތައް އެއްކޮށްލުމުން 3000 އެއްހާ ކުދިންނަށް ސްކޯލާޝިޕް ދެވޭނެ ކަމަށް ވެސް ރައީސް ޔާމީން ވިދާޅުވި އެވެ. އަދި ހަމަނުޖެހުންތައް ނުހިނގި ނަމަ އިތުރު ކުދިންތަކަކަށް އެ ފުރުސަތު ލިބުން އެކަށީގެންވާ ކަމަށް ވެސް ރައީސް ވިދާޅުވި އެވެ.
"އެހެންވެ ޒުވާނުން ގޮތެއް ނިންމަން ޖެހޭ، މިކަން ކުރަން މި ވިޔާނުދާ މީހުންނަށް ދޫކޮށްލާނީ ހޭ، ނޫނީއާ އަހަރުމެންގެ ކަންކަން ކުރުމުގައި އެފަދަ ކަންކަމަށް ޖާގަ ނުދޭންވީހޭ، ޖާގަ ނުދޭންވީ، ޖާގަ ނުދީ އަހަރުމެންނަށް މިލިބޭ ލާރި ކޮޅަކީ ހެޔޮގޮތުގައި ބޭނުން ކުރަން ހުރި ލާރި،" ރައީސް ޔާމީން ވިދާޅުވި އެވެ.