އިންޑިއާގެ އަސްކަރިއްޔާ ރާއްޖެއަށް ނާންނާނެ ކަމަށާއި އަސްކަރީ ބަޔަކު ރާއްޖެއަށް ގެންނަންޖެހޭ ވަރުގެ ކަމެއް ރާއްޖޭގައި ނުހިނގާ ކަމަށް ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ. ރައީސް ވަނީ އިންޑިއާ އަކީ 'އެންމެ ރަހުމަތްތެރި' ގައުމުގެ ގޮތުގައި ސިފަކުރައްވާފަ އެވެ.
ޔޫތް ނޭޝަންގެ ނަމުގައި ވެސްޓް ޕާކް ސަރަހައްދުގައި މިރޭ ޕީޕީއެމުން ކުރިއަށްގެންދިޔަ ޖަލްސާގައި ވާހަކަފުޅު ދައްކަވަމުން ރައީސް މިރޭ ވިދާޅުވީ، ކުރީގެ ރައީސް މުހައްމަދު ނަޝީދު ކެނޑިނޭޅި މަސައްކަތްކުރައްވަނީ ރާއްޖެއަށް އިންޑިއާގެ އަސްކަރިއްޔާ ގެންނަން ކަމަށެވެ. ނަމަވެސް އިންޑިއާގެ އަސްކަރިއްޔާގެ ސިފައިން ރާއްޖެއަށް ނާންނާނެ ކަމަށެވެ.
ރައީސް ވދާޅުވި ގޮތުގައި އިންޑިއާ ސިފައިން ރާއްޖެ އަންނަންޖެހޭ އެއްވެސް ސަބަބެއް ނެތެވެ. އެފަދަ ކަމެއް ރާއްޖެއަކު ނުހިނގަ އެވެ. އެހެން ނަމަވެސް ރާއްޖޭގައި އިންޑިއާއަށް އުނދަގޫވާ ކަންތައްތަކެއް ރާއްޖޭގައި ހުރެދާނެ ކަމަށާއި ގައުމުތަކުގެ މެދުގައި ހުންނަ އެފަދަ މައްސަލަތަކަކީ "ޖިއޯ ޕޮލިޓިކްސް"ގެ ގޮތުގައި ރައީސް ސިފަކުރެއްވި އެވެ.
"ބޮޑެތި ގައުމުތަކުގެ މެދުގައި މަސްލަހަތު ގެއްލޭ ކަންތައް ހުރެދާނެ، އެއްގަލަށް ނާރާ ކަންތައް ހުންނާނެ، އެއީ ޖިއޯ ޕޮލިޓިކްސް،" ރައީސް ވިދާޅުވި އެވެ.
އިދިކޮޅުން މަސައްކަތްކުރަނީ ރާއްޖޭގެ މަސްލަހަތު ނަގާލައި ރާއްޖެއަކީ ހަނގުރާމައިގެ މައިދާނަކަށް ބަދަލުކޮށްލަން ކަމަށް ވެސް ރައީސް މިރޭ ތަކުރާރުކޮށް ވިދާޅުވި އެވެ. އަދި ވިދާޅުވީ އެފަދައިން ކުރާ މަސައްކަތް ނާކާމިޔާބުކޮށްލަން ޒުވާނުން އެކުގައި ނުކުންނަންޖެހޭ ކަމަށެވެ. ރާއްޖެ އަމާން "ސުވަރުގެ" އަކަށް ހެދޭނީ ޒުވާނުންނަކީ ގައުމު ދެކެ ލޯބި ހުންނަ ބަޔަކަށް ވެގެން ކަމަށް ވެސް ވިދާޅުވި އެވެ.
ރާއްޖެ އޮތީ އެންމެ މުހިންމު ސަރަހައްދެއްގައި ކަން ފާހަގަކުރައްވައި، ރައީސް ވިދާޅުވީ އެކަމުގެ ފައިދާ ނަގައިގެން ރާއްޖެއަކީ ހަނގުރާމައިގެ މައިދާނަކަށް ބަދަލު ކުރަންވީ ނޫން ކަމަށާއި ހޯދަންވީ އިގްތިސާދީ ފައިދާ ކަމަށެވެ. ކުރީގެ ހުރިހާ ރައީސުންނަށް ވެސް އެ ފުރުސަތު ލިބުނުކަން ފާހަގަ ކުރައްވައި، އެމަނިކުފާނަށް ވެސް ފުރުސަތު ދެއްވުމަށް ރައީސް ގޮވާލެއްވި އެވެ.
"އަބަދުވެސް މިބުނަނީ ރާއްޖެ މޮއިތީ ޖިއޯ ޕޮލެޓިކަލީ އެންމެ ސްޓޭބަލް ރީޖަންގައޭ. މި ލޮކޭޝަން ބޭނުންކޮށްގެން އަހަރެމެންގެ ވެރިން މަސައްކަތް ކުރަންވީ މިތަން ވޯ ޒޯނަކަށް ހަދާކަށްނޫން، އެހެންވީމަ ސުވާލު ކުރަންވީ، ޒުވާނުން ސުވާލުކުރަންވީ، ބުނަންވީ މީ އަހަރުމެންގެ ގައުމޭ، ތިޔަމީހުންގެ ގައުމަށް މިތަން ވާހެން މީ ހަރެމެންގެ ވެސް ގައުމޭ،" ރައީސް ވިދާލުވި އެވެ.
ރައީސް ވިދާޅުވީ ކަންކަން ނިންމުމުގެ އެންމެ ބޮޑު ދައުރެއް އަދާކުރާ ބަޔަކީ ޒުވާނުން ކަމަށެވެ. ސިޔާސީ މަގްސަދުތައް ހާސިލް ކުރަން ޒުވާނުން ބޭނުން ކޮށްގެެން ކުރާ ކަންކަމަށް ޒުވާނުން ނޫނެކޭ ބުނަން ޖެހޭ ކަމަށާއި އެފަދަ ކަންކަމުގައި ބައިވެރިވުމުން އޭގެ ގެއްލުން ވެސް ލިބޭނީ ޒުވާނުންނަށް ކަމަށް އެމަނިކުފާނު ވިދާޅުވި އެވެ. އެކަންކަން ކުރަނީ އިދިކޮޅު ފަރާތްތައް އަޑީގައި ތިބެގެން ކަމަށް ވެސް ވިދާޅުވި އެވެ.