ސިޔާސީ މީހުން ބޭނުން ގޮތަކަށް ކުޅެން ގައުމު ދޫކޮށްލައިގެން ޒުވާނުން ތިބެގެން ނުވާނެ ކަމަށާއި އަމިއްލަ މުސްތަގުބަލުގެ ހައްގުގައި ހެޔޮ ބަދަލު ގެންނަ ބަޔަކަށް ވުމަށް ދިވެހި ޒުވާނުންނަށް ރައީސް އަބްދުﷲ ޔާމީން އަބްދުލް ގައްޔޫމް ރޭ ގޮވާލައްވައިފި އެވެ.
ޔޫތް ނޭޝަންގެ ނަމުގައި ރޭ ޕީޕީއެމް އިން ބޭއްވި ޖަލްސާގައި ރައީސް ވަނީ ވަރަށް އަސަރުގަދަ އިބްރަތްތެރި ވާހަކަފުޅުތަކެއް ދިވެހި ޒުވާނުންނާ މުހާތަބުކޮށް ވިދާޅުވެފަ އެވެ. އެމަނިކުފާނު ވަނީ ދިވެހި ޒުވާނުން ގައުމުގެ "ގޯސްކޮށް ހުންނަ ކަންކަން ބަދަލުކުރާ ބާރު،"ގެ ގޮތުގައި ހިއްވަރާއެކު ނިކުރުމަށް ގޮވާލައި އަގުހުރި ވާހަކަފުޅުތަކެއް ދައްކަވާފަ އެވެ. ރާއްޖެ މިއަދު މިދެކޭ ދުވަސްތައް މީގެ އެތައް ގުނައެއް އަމާން، ރައްކާތެރި ދުވަސްތަކަކަށް ބަދަލުކޮށްލުމުގެ ބާރު ޒުވާނުންނަށް ލިބިގެންވާކަމަށް ރައީސް ވިދާޅުވި އެވެ.
"ތިޔައިން ކޮންމެ ޒުވާނަކީ، ކޮންމެ ކުއްޖަކީ ބަދަލެއް. ސިޔާސީ ކަންކަމުގައި ވެސް ބަދަލު ގެންނާނެ ބަޔަކީ ޔޫތް. އެއީ މުޖުތަމައުގައި ދިރުން ހުންނަ ގިންތި. ޔޫތު ރާއްޖެ ދިފާއުކުރަން ތެދުވާ ތެދުވުމަކީ އެހެން އެންމެންނަށް އެއިން އިބްރަތްތަކެއް ނަގައިދޭނެ ކަމެއް. ތިޔައީ ވިންޑް އޮފް ޗޭންޖް،" ރައީސް ވިދާޅުވި އެވެ.
އެމަނިކުފާނު ވިދާޅުވީ ގައުމުގެ ދަރިންގެ ހަށިގަނޑުގައި ވަކި ކުލައެއްގެ ލެއެއް ދައުރުވާކަށް ނުޖެހޭ ކަމަށެވެ. ކޮންމެ މީހަކީ، ކޮންމެ ޒުވާނަކީ ދިވެހި ގައުމު ރަމްޒުކޮށްދެވޭ މީހަކަށް ވާއިރު ގައުމަށް ގެއްލުމެއް ދޭން ހިފާ ކޮންމެ މީހަކާ ސުވާލުކުރުމުގެ ހިއްވަރު ދިވެހި ޒުވާނުން ނެރެންޖެހޭނެ ކަމަށެވެ.
"ސިޔާސީ މީހުން ކައިރީ ބުނަންވީ ކަލޭމެންތި އުޅެނީ ވަރަށް ސެލްފިޝްކޮށޭ. އެންމެން ތި އުޅެނީ ވެރިކަމަށް އަރާށޭ. ހަމީހުން ކޯލިޝަން ހަދައިގެން އުޅޭ އިރު އެންމެން އުޅެނީ ވެރިކަމަށް އަރާށޭ. އެއެއް ނޫނޭ ވިސްނުންތެރި ގޮތަކީ. ސިޔާސީ މީހުން ކޮށްދޭންޖެހޭ ކަންކަމަކީ ގައުމަށް، ޒުވާނުންނަށް މަހުރޫމްވެފައިވާ ކަންކަން ހޯދައިދިނުމޭ. އެގޮތަށް މަސައްކަތްކޮށްދޭށޭ، އެހެން ބުނަންވީ. އެ ހިއްވަރުގައި ސުވާލުކުރަންވީ،" ރައީސްގެ ނަސޭހަތް އަޑުއެއްސެވުމަށް އެދިވަޑައިގެން އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި ދިވެހި ޒުވާނުންގެ ހުރި ގައުމީވަންތަކަން ދައްކާލައިފިނަމަ ގައުމު ތަޣައްޔަރުކޮށްލަން ނިކުންނަން ކޮންމެ ފަދަ މީހަކުވެސް ޖެހިލުންވާނެ އެވެ. ޒުވާނުންނަކީ ވަޒަން ނުކުރެވުނު ކަމުގައިވިޔަސް އެވަރުގެ ނުފޫޒުގަދަ ބައެއްގެ ގޮތުގައި ރައީސް ސިފަކުރެއްވި އެވެ.
"ގަބޫލުކުރަންވީ ޔޫތަކީ ނުފޫޒް ގަދަ ބައެއް. ބަދަލު ގެނެވޭނެ އޭޖެންޓެއް. ކޮންމެ ކުއްޖަކާއެކީ ރައްޓެހި އެތައް ކުދިންނެއް އެބަވޭ. އެއިން ކޮންމެ ކުއްޖަކީ މުޖުތަމައު ބަދަލުކުރެވޭނެ ކުއްޖެއް. މުޖުތަމައުގެ ގިނަ ކަންތައްތަކެއް ބަދަލުކޮށްލެވޭނެ ކުއްޖެއް. އެހެންވީމަ އެވްރީ ވަން އޮފް ޔޫ މެޓާސް. ކޮންމެ ކުއްޖަކީ މުހިއްމު ކުއްޖެއް ކަމަށް ގަބޫލުކުރާތި،" ރައީސް ވިދާޅުވި އެވެ.
ރާއްޖޭގެ ލީޑަރުންގެ ގޮތުގައި މިވަގުތު ތިބި ހުރިހާ ފަރާތްތައް ޖަވާބުދާރީކުރަން ދިވެހި ޒުވާނުން ނިކުންނަންވީ ހަމަޖެހޭ ޒަމާނީ މުސްތަގުބަލެއް ހޯދުމަށް ކަމަށް ރައީސް ވިދާޅުވި އެވެ.
"ރާއްޖޭގެ ހުރިހާ ގިންތިއެއްގެ މީހުންނަށް ދައްކަންވީ ދިވެހި ޒުވާނުން ކުރާ އުންމީދު. ދިވެހި ރާއްޖޭގެ ލީޑަރުންގެ ގޮތުގައި ތިބި މީހުންގެ ކިބައިން ދިވެހި ޒުވާނުން ބޭނުންވަނީ ކޮން ކަމެއްތޯ ބުނެދޭ ބުނެދިނުން މުހިއްމު. އެހެންވީމަ މިއަދު ލީޑަރުންގެ ގޮތުގައި ތިބި މީހުންނާ ސުވާލުކުރޭ،" ރައީސް ވިދާޅުވި އެވެ.
ރައީސް ވަނީ ގައުމުގެ ކުރިމަގު ބައްޓަންކޮށް ގައުމަށް އެންމެ ރަނގަޅު ގޮތް ހޯދަން ދިވެހި ޒުވާނުންނަށް އިލްތިމާސްކޮށް އެގޮތަކީ ކޮބައިކަމާމެދު ފުންކޮށް ވިންނުމަށް ދިވެހި ޒުވާނުންނަށް ދޫކޮށްލައްވާފަ އެވެ.