ބިދޭސީ ގޯލްކީޕަރެއް ގެންނަން ކްލަބު އީގަލްސް އިން ނިންމާފައިވާ ކަމަށް އެ ޓީމުގެ ކޯޗު އިހުސާން އަބްދުލް ގަނީ (ސާންތީ) ބުނެފި އެވެ.
އުރީދޫ ދިވެހި ޕްރިމިއާ ލީގުގައި މަހިބަދޫ ސްޕޯޓްސް ކްލަބް އަތުން ބުރާސްފަތި ދުވަހު އީގަލްސް މޮޅުވި މެޗަށް ފަހު ސާންތީ "އަވައްޓެރި ގައުމެއްގެ" ގައުމީ ޓީމުގެ އެއްވަނަ ގޯލްކީޕަރާއެކު މިހާރު އެއްބަސްވުމަކަށް އާދެވިފައިވާ ކަމަށެވެ.
"އަވައްޓެރި ގައުމެއްގެ ގައުމީ ޓީމުގެ އެއް ނަމްބަރު ގޯލްކީޕަރެއް އަޅުގަނޑުމެން ގެންނާނީ. މި ވަގުތު ނެތް ގައުމުގެ ނަމެއް ހާމަކުރެވޭކަށް. އެކަމަކު ދެން އަޅުގަނޑުމެންގެ ފަރިތަކުރުންތައް ފަށާއިރު އާ ކީޕަރު ފެންނާނެ،" ސާންތީ ބުންޏެވެ.
އީގަލްސް އިން އާ ގޯލްކީޕަރު މި ހޯދަނީ އެ ޓީމުގެ އެއްވަނަ ގޯލްކީޕަރު މުހައްމަދު ފައިސަލް އަށް އަނިޔާވެ މި ސީޒަންގައި ކުޅުމުގެ އުންމީދު ގެއްލުމުގެ އިތުރުން، އެ ޓީމުގެ ދެވަނަ ގޯލްކީޕަރު އިބްރާހިމް ލަބާން ޝަރީފް ދޫކޮށްލަން ޖެހުމުންނެވެ. އީގަލްސް އިން ލަބާން ދޫކޮށްލީ ފުލަހަކަށް ހަމާލާ ދިން މައްސަލައިގައި ލަބާން ފުލުހުންގެ ބެލުމުގެ ދަށަށް ގެންދިއުމުންނެވެ. ލީގުގައި އެންމެ ފަހުން ކުޅުނު މެޗުގައި އެ ޓީމުގެ ގޯލް ބެލެހެއްޓީ އާ ކީޕަރެކެވެ.
ސާންތީ ބުނީ ބްރޭކަށް ފަހު އީގަލްސް ފެންނާނީ "ތަފާތު ޓީމެއް"ގެ ގޮތުގައި ކަމަށެވެ.
"އިރާދަ ކުރެއްވިއްޔާ ބްރޭކަށް ފަހު ތަފާތު އީގަލްްސް އެއް ފެންނާނީ. ބިދޭސީ ޑިފެންޑަރަކަށް ވެސް ބަލަމުން މި ދަނީ،" ސާންތީ ބުންޏެވެ.