މިއަދުގެ ހުކުރު ހުތުބާ ސިޔާސީ ވެފައިވާ ކަމަށް ބުނެ ބައެއް ދީނީ އިލްމުވެރިންނާއި ބައެއް އާންމުންގެ ފާޑުކިޔުން އަމާޒުވެއްޖެ އެވެ.
މިއަދުގެ ހުކުރު ހުތުބާގެ މައުލޫއަކީ "ހާކިމާ (ވެރިމީހާ) އަކީ ނިއުމަތެއް" މި މައުލޫ އެވެ. އިސްލާމިކް މިނިސްޓްރީގެ ވެބްސައިޓުގައި ޝާއިއު ކޮށްފައިވާ މިއަދުގެ ހުތުބާ ވަނީ ހާކިމަކު ނުވަތަ ވެރިއަކު ހުރުމަކީ ނިއުމަތެއް ކަމަށެވެ. އަދި ވެރިމީހާއަށް ކިޔަމަންވުމަކީ ވާޖިބެއް ކަމަށާއި ވެރިމީހާއަށް އިހާނެތިކޮށް ހިތުމަކީ ހަރާމް ކަމެއް ކަމަށް ހުތުބާގައި ވެއެވެ.
ހުތުބާ މައުލޫ ސިޔާސީ ވެފައިވާ ކަމަށްބުނެ އެކަމަށް ފާޑު ވިދާޅުވެ ޝެއިހް އަލީ ޒައިދު ވިދާޅުވީ، ހުކުރު ހުތުބާގެ ސުރުހީ ފެނިގައި ހައިރާންވެ ވަޑައިގެންނެވި ކަމަށާއި ކޮންމެ ކަމެއް ސިޔާސީ ކުރަން ނުޖެހޭ ކަމަށެވެ. އަދި ވިދާޅުވީ، ކޮންމެ ހާލަތެއްގައި ވެރިއަކީ ނިއުމަތަކަށް ނުވާނެ ކަމަށާއި ބައެއް ފަހަރު ވެރިމީހާ މުސީބާތަކަށް ވެސް ވާކަމަށެވެ.
ޑރ. މުހައްމަދު އިޔާޒް ވިދާޅުވީ، އަނިޔާވެރި ވެރިންނަކީ ނިއުމަތެއް ނޫން ކަމަށާއި އެއީ ރައްޔިތުންގެ އަމަލުތައް ގޯސްވެ، އެފަރާތްތަކުގެ މައްޗަށް ފާކުރައްވާ ވަބާއެއް ކަމަށެވެ. އެކަމުން ސަލާމަތް ވުމަށް ގިނަ ގިނައިން ދުއާ ކުރުމަށް ގޮވާލާފައި ވެއެވެ.
ހުތުބާގެ މައުލޫއަށް ފަޑު ވިދާޅުވެ ގާޒީ އަބްދުލްބާރީ ޔޫސުފް ވިދާޅުވީ، ކޮށްފައިވާ ވިޔާނުދާ އަމަލުތައް ފޮރިވުމަށްޓަކައި ކީރިތި ގުރުއާނާއި ރަސޫލާގެ ސުންނަތް ހިތުހުރި ގޮތަކަށް ބޭނުން ކުރަމުންދާ ކަމަށެވެ، އެކަން އެގޮތަށް ނުކުރުމަށް ބާރީ ވަނީ ގޮވާލާފަ އެވެ.
އަދި ޝެއިހް މުހައްމަދު އަނީލު ވެސް ވަނީ ހުތުބާ އަށް ފާޑު ވިދާޅުވެ، ހުތުބާާ ސިޔާސީ ނުކުރުމަށް ގޮވާލައްވާފަ އެވެ.
އެފަރާތްތަކަށް ރައްދު ދެއްވައި ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ، އިސްލާމް ދީނުގައި ދީނާ ސިޔާސަތަކީ ވަކި ނުކުރެވޭނެ ދެކަންތައް ކަމަށާއި މިއަދުގެ ހުތުބާއާމެދު ހިތްހަމަ ނުޖެހޭ ބޭފުޅުން އަދި އިތުރަށް ވިސްނާލަންޖެހޭ ކަމަށެވެ.
މީގެ އިތުރުން، ހުތުބާގެ މައުލޫ ސިޔާސީވެފައިވާ ކަމަަށްބުނެ ލ. މާމެންދޫ އިމާމު ވަނީ ހުތުބާ ކިޔަން ދެކޮޅު ހަދާފައި އެވެ. އިމާމު ދެކޮޅު ހެދުމުން އެރަށުގައި މިއަދު ހުކުރު ކޮށްފައިވަނީ އެ އަތޮޅު ގަމުން އިމާމެއް ގެންގޮސްގެން ނެވެ.
އަދި އިސްލާމިކް މިނިސްޓްރީން ވަނީ ހުތުބާއިން ބައެއް އުނިކުރުމަށް ފަހު ކިޔުމަށް ވެސް އިމާމުންނަން އަންގާފަ އެވެ. އިސްލާމިކް މިނިސްޓްރީން އިމާމުންނަން ފޮނުވާފައިވާ މެސެޖެއްގައި ބުނީ، ހުތުބާގައި ރަތްކޮށް ކަނޑާފައި ހުރި ބައިތައް ނުލާ ހުތުބާ ވިދާޅުވުމަށެވެ. ހުތުބާއިން އުނި ކޮށްފައިވަނީ ބައެއް ހަދީސް އާއި ގޭގެ މާނަ އެވެ.
ހުތުބާ ސިޔާސީވާ ކަމަށްބުނެ އިދިކޮޅު ފަރާތްތަކުން މީގެ ކުރިންވެސް ވަނީ ސަރުކާރަށާއި އިސްލާމިކް މިނިސްޓްރީއަށް ވަރަށް ބޮޑަށް ފާޑު ކިޔާފަ އެވެ.