ޕީޕީއެމް އަދި އެމްޑީއޭގެ ކޯލިޝަނުން ގާނޫނު އަސާސީ އާއި ގާނޫނީ ހުދޫދުގެ ތެރެއިން ގަރާރު ފާސްކޮށް، ވޯޓް ކާމިޔާބު ކުރާނެ ކަމަށް ޕީޕީއެމް ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ހުސައިން މަނިކު މިއަދު ވިދާޅުވެއްޖެ އެވެ.
ޕީޕީއެމްގެ ފަރާތުން މިއަދު މެންދުރުފަހު އެއޮފީހުގައި ބޭއްވި ނޫސްވެރިންގެ ބައްދަލުވުމުގައި ނިހާން ވިދާޅުވީ، މަޖިލީހަށް ހުށަހެޅުއްވި ގަރާރު އެއްވެސް ދެކޮޅު ހެދުމެއްނެތި ސަރުކާރު ކޯލިޝަނުން ބަލައިގެންފައިވާ ކަމަށާއި ދެން ކުރިއަށް އޮތީ އެކަމަށް ވޯޓު ލުން އެކަނި ކަމަށެވެ. އަދި ވަރަށް އަވަހަށް ގަރާރަށް ވޯޓަށް އަހައި ފާސްކުރާނެ ކަމަށް ނިހާން ވިދާޅުވި އެވެ.
ނިހާން ވިދާޅުވީ، ކުއްލި ނުރައްކަލުގެ ހާލަތު ރައީސް އަބުދުﷲ ޔާމީން އަބުދުލްގައްޔޫމް ވަނީ މަޖިލީހަށް ހިއްސާކުރައްވަން ޖެހޭ ހުރިހާ މައުލޫމާތެއް ފުރިހަމަ ޕްރޮޓޮކޯލްގެ ހަމައަށް ކުރަށްވާފައި ކަމަށާއި އެކަން މަޖިލީހުން ބަލައިގަނެ މަޖިލީހުގެ ތަރުތީބުގެ ތެރެއިން މިވަނީ ކޮމިޓީއަށް ފޮނުވާފައި ކަމަށެވެ.
"މިތިބީ ހިތުގެ ފުންމިނުން ގަރާރު ފާސްކޮށް ނިންމައިގެން، ހަމަ އެކަނި ކަމަކީ ވޯޓަށް ނާހާކަން، އެކަން ލަސްނުވެ ވަރަށް އަވަހަށް ކުރިއަށް ދާނެ، މަޖިލީހުގެ ޕްރޮސީޖާގެ ތެރެއިން ގަރާރުގެ ކަންތަކަށް ވޯޓަށް އަހަން ގެނެވޭ ހިނދު، ޕީޕީއެމް އަދި އެމްޑީއޭ ކޯލިޝަނުން ގާނޫނު އަސާސީގެ ހުދޫދުގެ ތެރެއިން ވޯޓް ކާމިޔާބު ކުރާނަން،" ނިހާން ވިދާޅުވި އެވެ.
ނިހާން ވިދާޅުވީ، ގަރާރާ މެދު ހިތްހަމަ ނުޖެހޭ ފަރާތްތައް ތިއްބެވީ މަޖިލީހުން ބޭރުގައި ކަމަށާއި 43 މެންބަރުން ހަމަ ކޮށްގެން ގަރާރު ބާތިލް ކުރަން ބޭނުން ނަމަ އެކަން މަޖިލީހުގެ ތެރެއިން ކުރެއްވުމަށް ށެވެ. ނަމަވެސް އިދިކޮޅު ފަރާތްތަކުން ތިއްބެވީ ބޭރުގައި ކަމަށާއި މިއަދު ބޭއްވި ޖަލްސާގައި ހިނގާ ދިޔަ އެއްވެސް ކަމެއް އެބޭފުޅުންނަށް އިނގިވަޑައިނުގަންނަވާ ކަމަށް ނިހާން ވިދާޅުވި އެވެ.
"ގަރާރާ މެދު ހިތް ހަމަނުޖެހޭ އެކަމަށް ނޫނެކޭ ބުނާނެ ބަޔަކު މަޖިލީހަށް ހާޒިރެއް ނުވޭ، ގަރާރާ މެދު ހިތްހަމަ ނުޖެހޭ ފަރާތްތައް ތިބެންވާނީ 43 މެންބަރުން ހަމަ ކޮށްގެން ގަރާރު ބާތިލް ކުރަން، އެ ގަރާރުގެ ސަބަބުން ބޭގަރާރުވެ އެބޭފުޅުން އެތިއްބެވީ ބޭރުގައި،" ނިހާނު ވިދާޅުވި އެވެ.
ކުއްލި ނުރައްކަލުގެ ހާލަތު 30 ދުވަހަށް އިތުރުކުރުމަށް ރައީސް ޔާމީން މިއަދު މަޖިލީހަށް ހުށަހެޅުއްވި ގަރާރު އެވަގުތު މަޖިލީހަށް ހާޒިރިވެ ތިއްބެވި ސަރުކާރު ކޯލިޝަންގެ ބޭފުޅުން ނިންމެވީ ކުއްލި ހާލަތާ ގުޅޭ ގޮތުން ހުށަހެޅި މައްސަލަ ދިރާސާކުރުމަށް ގައުމީ ސަލާމަތާ ބެހޭ ކޮމެޓީއަށް ފޮނުވުމަށެވެ. ކުއްލި ނުރައްކަލުގެ ހާލަތުގެ ގަރާރުން ބައެއް ބައިތައް އުނިކޮށް، އެ ގަރާރަށް ރުހުން ދޭން ރައްޔިތުން މަޖިލީހުގެ ގައުމީ ސަލާމަތުގެ ކޮމެޓީގެ މެންބަރުންގެ އިއްތިފާގުން ފާސްކޮށްފަ އެވެ.
ކުއްލި ހާލަތުގެ ގަރާރަށް ވޯޓަށް އެހުމަށް މިރޭ 8:00 ގައި މަޖިލީހުގެ ޖަލްސާއެއް ބޭއްވުމަށް ވަނީ ތާވަލުކޮށްފަ އެވެ.